ميدو يطالب برحيل 10 لاعبين عن الزمالك.. ويؤكد: عمر السعيد لا يرتقي لحجم الأبيض
طالب أحمد حسام ميدو نجم نادي الزمالك ومنتخب مصر السابق، بثورة تصحيح فنية داخل الفريق الأول لكرة القدم بنادي الزمالك، بعدما اقترب الأبيض بقوة من توديع دوري أبطال أفريقيا.
تصريحات ميدو
وقال ميدو عبر حسابه الشخصي على تويتر: “أنا آسف ما تزعلوش مني.. نادي الزمالك محتاج ثورة فنية لازم على الاقل ١٠ لعيبة يمشوا.. في لعيبة ماينفعش تلعب في الزمالك نجحنا في التعاقد مع مدرب كبير دلوقتِ.. فيريرا لازم يقود ثورة التغيير”.
وأضاف: “الزمالك بيلعب من غير رأس حربة.. عمر السعيد مهاجم مستواه لا يرتقي للاعب لفريق بحجم الزمالك.. الفريق محتاج شغل كتير”.
تعليق فيريرا
أبدى فيريرا المدير الفني لفريق الزمالك غضبه من الخسارة أمام الوداد واقتراب الأبيض من توديع دوري أبطال أفريقيا.
وأوضح فيريرا خلال المؤتمر الصحفي للمباراة: مع الأسف الزمالك تقريبا خارج البطولة عندنا مباراتين حتى لو كسبنا صعب أن بترو ما يحصلش على أي نقاط.. موقف أكيد مش مرضي للنادي ولا الجماهير.. الزمالك لم يخسر أفريقيا اليوم بل خسر من قبل.
وأضاف فيريرا: لا أعرف أساس المشكلة ولكن اللي شفته إن اللاعيبة كانت خارج الماتش من الشوط الثاني والشوط الأول كنا أفضل ومنظمين، وهدف مبكر للوداد في الشوط الثاني أدى إلى تفكك الفريق وده معناه إن في مشكلة.
وأردف: “أنا بقالي 3 أيام ما عنديش وقت ولا مقدرة إني ألم الأمور دي كلها في الوقت ده.. عارف إن في لاعيبة كتير عندها إمكانيات فنية مميزة عشان كده هبص بس للأمور الفنية وهساعد الإدارة في حل أي مشكلة غير فنية”.
وأوضح: “آخر مباراة أمام الجونة اللي شوفتها حصل نفس الأمر الشوط الأول كان شيء والتاني شيء تاني والأمور خرجت عن السيطرة بعد ربع ساعة قوية للفريق سجل فيها هدفين”.
وأكمل: “لازم نحل المشاكل والجميع يتكاتف على ذلك عشان عندنا لسه دوري وكأس نكسبهم وكمان نلعب أفريقيا السنة اللي جاية، وماتش بترو القادم له وجهين الأول إن مفيش ضغوط خلاص يقدروا يلعبوا بشكل جيد وممكن أداء سيئ وده هيؤكد أن في مشكلة تانية”.
وقال المدير الفني كل اللاعبين سواسية سواء كان مستواه جيدًا من قبل أو عنده عروض من أندية أخرى، الفيصل بالنسبة لي هو التمرين، وخرجت زيزو عشان كنت محتاج أنشط الفريق ومحتاج للاعب يلعب بعنف داخل الملعب.. أنا أعرف زيزو منذ كان في البرتغال.. أعرف كيف يحب جمهور الزمالك ويسعى دائمًا لتحقيق البطولة.
واختتم حديثه: “طريقة اللعب للمدرب يطبقها اللاعبين هم اللي ينجحوا أي طريقة.. شفت تقارير لمباريات سابقة الفريق كان بيلعب بنصه دفاع والباقي هجوم ولكن مفيش خط وسط ثابت”.
