هشام المليجي يعتذر لـ رانيا شاهين وينهي الأزمة القائمة بينهما
انتهت الأزمة بين الفنان هشام المليجي والفنانة رانيا شاهين خلال الأيام الماضية حيث ناشدت الأخيرة المنتجين لتوفير فرصة عمل للفنان هشام المليجي، وهو ما أغضبه وأعرب عن رفضه التام لحديثها.
وكتب "المليجي" من خلال حسابه الشخصي بموقع التواصل الإجتماعي "فيس بوك": “أنا مضايق من نفسي جدا لأني كنت عنيف مع زميلتي اللي كانت عاوزه تساعدني وغلطت في الأسلوب ومش عارف اعمل ايه .. اخواتي وأقرب الناس ليا ميعرفوش دواخلي ولا حياتي الشخصيه.. وأنا مطلبتش منهم مساعدة لأنهم أولى الناس بمساعدتي ده لو كان عندي أزمة.. عشان كده انا انفعلت ومكنش المفروض اكتب وانا غضبان.. متزعليش مني يارانيا وحقك عليا انتِ عارفه انك غاليه عندي وطول عمرنا جدعان مع بعض وانا بعتذرلك قدام الناس كلها”.
بداية الأزمة
وكانت بداية الأزمة عندما كتبت رانيا شاهين عبر فيسبوك قائلة: «الراجل دا جاري في العمارة اللي جنبي ومتربيين مع بعض.. مش بيشتغل وهو ممثل ممتاز.. ومكافح وعنده اكتئاب وبيرفض انه يكلم حد على شغل علشان هو حساس… تحية ليك يا جاري العزيز الصابر الصامت صاحب عزة النفس.. أنا عارفة إنه هيزعل مني لما يعرف إني كتبت الكلام ده…بس كل ما أزوره حقيقي بيصعب عليا.. مع إنه مش بيشتكي بس باين عليه».
رفض هشام المليجي
ليخرج من بعدها «المليجي» قائلًا: «فجأة لقيت الصحافة كلها بتكلمني بسبب منشور من زميلة وصديقة أكن لها كل الحب والاحترام.. أنا بخير ولا يوجد ما يعكر صفو حياتي والأمور على خير ما يرام.. الشغل ده رزق ومكتوب ولا حيلة لنا في الرزق.. أنا تمام وبصحة جيدة ولا أعاني من الاكتئاب بسبب عدم مشاركتي في الأعمال التلفزيونية أو السينمائية.. أعمالي قليلة صحيح بس معروفة وربنا وفقني فيها والناس أكثرها بتحبني وسيرتي كويسة في الوسط الفني ومعنديش مشكلة مع حد وربنا يعدي الحرب اللي دايره اليومين دول على خير ويرفع عننا الوباء والبلاء.. شكرا لكل الأصدقاء والمتابعين ومفيش أي مشكلة أصلا والحمد لله على كل حال وربنا يسترنا دنيا وآخرة».
