محمد صلاح يكشف ظروفه القاسية خلال مسيرته مع المقاولون
قال محمد صلاح نجم نادي ليفربول الإنجليزي ومنتخب مصر: والدي أكتر واحد مؤمن بموهبتي ولا أريد أن أظلم والدتي.
دعم والد محمد صلاح
وأكد خلال الجزء الثاني من لقائه مع الفنانة والإعلامية إسعاد يونس بقناة "دي ام سي": "والدي كان يدعمني طول الوقت وكان ينفق على كل ما يملك، أما والدتي فكانت ترغب في عدم سفري للقاهرة بسبب الحوادث على الطريق".
مطلع المقاولون العرب
وأضاف: "كنت بطلع مطلع المقاولون العرب كيلو ونص بسرعة شديدة علشان اوصل التدريب في الميعاد المحدد".
قصة غرفة الاستراحة
وتابع:"تم تصعيدي للفريق الأول للمقاولون العرب وعمرى 16 سنة وحينها حصلت على غرفة اللستراحة التي كانت تخصص للاعبين المميزين، وتخلصت من معاناة السفر وعناء وشقاء مطلع النادي".
هدف محمد صلاح
وأكمل: "كنت بنام وراء بوابة المقاولون العرب أول ما دخلت النادي وفرشت مرة ونمت، المقاولون العرب من أحسن الأندية اللى بتطلع ناشئين، وشايف نفسي بعد الكورة اني هاعمل حاجة مفيدة، وباعطي كل حاجة للكورة علشان لما امشي واسيبها مكنش ندمان على تقصيري ويكون فصل واتقفل واشوف الحياة التانية".
ظروف قاسية
واستطرد: "مريت بظروف كتير صعبة اثناء تواجدي في المقاولون العرب، ابويا اعطاني مرة 60 جنيه وصاحبي قال لي تعالي نروح لخالي في العاشر وروحنا ملقنهوش، فصاحبي قالي تعالي نبات في الترب فرفضت فقالى انا عارف واحد في النادي من وراء الإدارة وفرشنا في الأرض وبيتنا وراء بوابة النادي وعملت الجزمة مخدة، وصحينا بدري الساعة 6 الصبح قبل ما حد يجي علشان ميبقاش فيه مشكلة، واليوم اللى بعده بيتنا في ملعب 2 فرشنا في الأرض واتغطينا ببطاطين".
إنفاق والد محمد صلاح
واختتم صلاح: "كان بالنسبة لي ممكن اعمل أي حاجة بس اوصل لهدفي، وكابتن ريعو مكنش يعرف إني بنام وراء البوابة وساعدني اني انام في الاستراحة، ولكن الأهم كان بالنسبة لي أني انام واصحى بسرعة على التمرين، وكنت مكسوف أكلم أبويا وارجعله بعد لما اخدت منه 60 جنيه، وانا من النوع اللى بيتكسف يطلب وهو مكنش عنده مشكلة يدفع بس انا كنت بتكسف".
