د. ياسمينا شاهين تكتب: دمك خفيف يا مامي !! ( 2 )

بيقولوا إن "الحامل دمها تقيل".. صحيح الجملة الشهيرة دي؟!! 

في هذه الحلقة نستكمل أهمية الضحك للحامل..

 (ونستكمل……….)

** الضحك بيساعد على تطور الجهاز العصبي للجنين، وبيساعد على نمو وتطور المخ ومراكز الشعور وتطور الذكاء وبيساعد على تكوين المزيد من خلايا المخ لديه بشكل صحي. 

** الضحك بيساعد على إفراز مضادات الألم الطبيعية في الدماغ، وبالتالي بيقلل من العديد من الآلام المصاحبة للحمل زي دوار الحمل والتقلصات والصداع والغثيان. 

** الضحك هيفتح نفسك للأكل وهيخليكي تشربي اللبن وتأكلي الأكل الصحي اللي مش بتحبيه، بس ناكل بالراحة علشان مش عاوزين نزيد كتير في الوزن. 

يساعد في خفض ضغط الدم

** الضحك هيساعد في خفض ضغط الدم، وبالتالي هيحميكي من الإصابة بتسمم الحمل ومضاعفاته زي الولادة المبكرة أو الاضطرار للولادة القيصرية. 

** الضحك بيساعد على تنظيم ضربات القلب بشكل جيد. 

** الضحك هيساعد على الحفاظ على معدلات نمو الجنين.. وبالتالي هيحميه من نقص الوزن. 

** الضحك بيساعد على تطور عواطف الجنين وحركته.

** هيزود الارتباط بينك وبين ابنك، لأن الابن من وهو لسه جنين، من وهو لسة في الرحم، هو انعكاس ليكي زي ما قلنا، وكل هدوء بتحسي بيه وضحك بتضحكيه هايأثر جدا بالإيجاب عليه.   

وعلى فكرة، الضحك بشدة مش هايضرك في حاجة زي ما بتسمعي، بس أهم حاجة وانتي بتضحكي جامد ومنهمكة فيه تاخدي بالك أحسن تقعي من مكانك وقعة جامدة بس. 

الهدوء النفسي

ومش هوصيكي بقى، فيه طرق كتير ممكن تساعدك إنك تضحكي وتغيري مزاجك وتحسي بالهدوء النفسي والراحة: 

** اذكري ربنا دايمًا وحافظي على الصلاة والأذكار. 

** خليكي مرحة وإيجابية 

** خليكي وسط الناس الإيجابية الطيبة 

** استشيري طبيبك في أي حاجة مضايقاكي أو قلقاكي 

** اتفرجي على عروض كوميدي مفيدة وخفيفة. 

** استرجعي الصور والذكريات الإيجابيه عندك 

** اضحكي مع أهلك وأصحابك 

الرياضة مهمة

** مارسي الرياضة الخفيفة المعتدلة بشكل منتظم زي المشي الخفيف المعتدل.. 

** اعتبري الضحك زي أي تمرين رياضي، وخليه جزء من روتينك اليومي.. 

وخليكي دايمًا فاكرة إنه كل صعب هيعدي.

كل تعب هيمر..

خليكي صبورة وشجاعة لحد النهاية، علشان تعدي التجربة بفرحة وفخر ليكي ولعيلتك.

وكله في ميزان حسناتك عند ربنا. بيت العافية الكبير.

-------------------------------------------------------------

( * ) طبيب أمراض النساء والتوليد والعقم بالقصر العيني