د. ياسمينا شاهين تكتب: دمك خفيف يامامي !! ( 1 )
بيقولوا إن "الحامل دمها تقيل".. صحيح الجملة الشهيرة دي؟!!
في الحقيقة، الحامل دي أجمل ست في الدنيا وأخف دم على فكرة.. والموضوع في المجمل له علاقة بالشخصية والظروف المحيطة.
لكن في الحمل بالذات الست غصب عنها ممكن تحس بشوية ضيق.. اكتئاب.. توتر.. عدم الرغبة في الانخراط المجتمعي.. ده غير بقى شوية الكسل والعزلة.
في الحقيقة كل ده بيحصل غصب عنها، فحقيقي فترة الحمل صعبة جدا، بيحصل فيها تغيرات هرمونية بتأثر على مزاج الحامل، ده غير آلام الحمل المتنوعة ما بين صداع وغثيان وتقلصات وحركات البيبي وتغيرات الوزن والأنيميا وغيره كتير من تغيرات الحمل.
وأول ما هاتبقي حامل، هتلاقي الجميع بينهال عليكي بالمأكولات والمشروبات ونصايح الراحة وإنك تقعدي في السرير وماتشيليش حاجات تقيلة.
الصحة العقلية
وقليل جدا اللي هاياخد باله من الاهتمام بالصحة العقلية التي لا تقل أهمية عن الصحة الجسدية ليكي وللجنين.
طيب تعرفي انك لو حاولتي تضحكي على الأقل ١٠ دقايق كل يوم، هاتبقي انتي وطفلك في مكان تاني خالص نفسيًّا وجسديا وهتعدي فترة الحمل بأقل معاناة.
خاصة لو عرفتي إن الطفل بيتأثر بيكي جدا، مش بس في مرحلة الطفولة ولا بعد الولادة، لكن من وهو لسة جنين !!
بيحس إمتى إنتي خايفة أو متوترة، علشان كدة مهم جدًّا إنك تاخدي بالك من صحتك النفسية وتبقي مبسوطة علشان طفلك يطلع مبسوط ومبتهج.
تعالي نشوف سوا، شوية ضحك كل يوم ممكن يعمل إيه ليكي وللبيبي ولكل اللي حوليكي:
أهمية الضحك للحامل
** الضحك بيقلل اكتئاب الحمل بكل فتراته وأشكاله الناتج عن التغيرات الهرمونية في الحمل، وبيرفع الحالة المزاجية في دقايق !
** الضحك بيقلل من مستويات الإجهاد والقلق النفسي والجسدي والشعور بالتوتر وبالتالي بيحميكي من احتماليات الولادة المبكرة أو نقص وزن الطفل أو التأثير بالسلب على تطور مخه وسلوكه فيما بعد.
** الضحك بيساعد على تطور الجنين بشكل كبير وبيزود من حركته ونشاطه.. تعرفي فيه حركة بيعملها دكاترة كتير إنهم بيخلوكي تضحكي جامد أثناء السونار، وتشوفي ساعتها تفاعل البيبي وحركته أثناء ضحكك سبحان الله !!
** الضحك بيزود المناعة اللي بتقل أثناء الحمل، وبالتالي بيقلل من معدلات العدوى، ويقلل من فرص حدوث ولادة المبكرة.
(ونستكمل في الحقة القادمة)
-------------------------------------------------------------
( * ) طبيب أمراض النساء والتوليد والعقم بالقصر العيني
