ناقد فني: فيلم “بشتقلك ساعات” لا يمثل مصر في مهرجان برلين
علق الناقد الفني أندرو محسن مدير المكتب الفني بمهرجان القاهرة السينمائي على فيلم بشتقلك ساعات المشارك بمهرجان برلين السينمائي في دورته الـ 72، الذي أثار جدلًا واسعًا خلال الساعات الماضية، لمناقشته المثلية الجنسية من خلال قصة حب تجمع رجلين.
أندرو محسن
وعبّر الناقد أندرو محسن عن رأيه من خلال حسابه الشخصي على فيس بوك، قائلًا: مافيش أفلام بتمثل بلادها في المهرجانات، يمكن يكون الاستثناء الوحيد هو الأوسكار اللي هو مش مهرجان لأن في الأوسكار فيه لجنة محددة من كل دولة بتختار فيلم يشارك باسم الدولة فعلًا، والترشيحات بعد كده بتبقى مكتوبة باسم الدولة.. عبارة الفيلم الذي يمثل مصر بتستخدم مجازًا كده لكنها غير دقيقة، الفيلم بيمثل نفسه والأشخاص المشاركين في صناعته، وهما اللي بيسجلوا الفيلم، ومش معنى إن المنتج أو المخرج من مصر يبقى الفيلم بيمثل مصر.
وأضاف أندرو: أعتقد ده ليه علاقة بأنه غالبًا بيكون فيه فيلم واحد بس مشارك من مصر في المهرجانات الكبيرة، عشان كده فيه ناس بتستخدم المصطلح ده، بس مش هتلاقي مثلًا حد في فرنسا ولا إيطاليا ولا أي دولة عندها عدة أفلام في كل مهرجان بتقول إن ده الفيلم اللي بيمثل دولتهم، لأن مفيش حاجة اسمها كده.
وتابع أندرو محسن: بالنسبة لفيلم بشتاقلك ساعات المشارك في قسم Forum في برلين، فهو فيلم من إنتاج مصري لبناني ألماني مشترك، وهو بالتأكيد مش بيمثل مصر ولا لبنان ولا ألمانيا، والأهم من كده إنه مش الفيلم العربي الوحيد زي ما فيه كذا حد كتب، فيه فيلم قصير من الصومال Will My Parents Come to See Me للمخرج مو هراوي، وفيه الفيلم القصير Gazing... Unseeing إخراج محمد عبد الكريم إنتاج مصر وهولندا، وفيه أفلام طويلة تانيه مشاركة في إنتاجها دول عربية زي فيلم See You Friday، Robinson اللي فيه إنتاج لبناني.
فيلم بشتقلك ساعات
يشار إلي أن تدور أحداث فيلم بشتقلك ساعات حول رجلين تجمع بينهم قصة حب، ويوضح ما يتعرض له مثلي الجنسية في مصر والوطن العربي، ويوجد في العمل العديد من المشاهد الحميمة بين الرجلين.
ويشارك في بطولته دنيا مسعود، وتقوم بدور الراوي على طريقة "شهرزاد" في حكايات "ألف ليلة وليلة" وأحمد الجندي، البطل الرئيسي والذي يقع في خلاف مع "حبيبه" بسبب علاقاته المتعددة، وسليم مراد وحسن ديب وأحمد عوض الله، والإخراج لمحمد حسن شوقي وهو مخرج مصري يعيش في ألمانيا
