تزامنا مع انتشار كورونا.. طبيب يقدم نصائح مهمة في حالة الشعور بالإعياء
قال الدكتور محمد علام، النائب السابق لمدير مستشفى العزل بمطروح، إن العدوى المنتشرة حاليًا في مصر ليس شرطًا أن تكون إصابة بفيروس كورونا، مشيرًا إلى عدم ضرورة عمل مسحة للكشف عن الإصابة بفيروس كورونا، خاصة إذا كانت الأعراض بسيطة ويمكن علاجها.
انتشار كورونا والمسحة
ونصح علام من يشعرون بأعراض بسيطة بالراحه وتناول السوائل وبعض المسكنات، أو أدويه للاحتقان أو مهدئ للسعال، مع عزل المصاب لمدة ١٠ أيام، قائلًا: "طالما الأعراض بسيطة مش محتاج تعرف كانت كوفيد او غيره مش هتفرق".
وكتب الدكتور محمد علام تدوينة على الفيس بوك: "هل الدور المنتشر حاليا كورونا اكيد ولا ممكن يكون برد او حاجه تانيه؟؟.. الحقيقه احتمال يكون برد او انفلونزا لان ده وقت نشاطها ومش شرط تكون كوفيد، لكن مقدرش استبعد خصوصا مع الاعراض البسيطه لان التحاليل والاشعه هيطلعوا طبيعيين.. حتى المسحه دقتها مش ١٠٠٪ وعلشان اكون متأكد محتاج مسحتين ودى تكلفه عاليه"
وقال "لكن مع انتشار المتحور اوميكرون وايضا دلتا فالاحتماليه الكبرى كوفيد والافضل التعامل بحرص طالما الاعراض بسيطه ومتقلقش، لان زى ماقلت مليون مره البسيط عندك ممكن يكون شديد عند غيرك".
علاج أعراض كورونا
وأضاف: "طيب ايه الحل؟؟ الحل بيكون باخذ العلاج للحالة طبقا للأعراض اللي عندي لانها اعراض بسيطه سواء كورونا أو غير كورونا فهى لا تستلزم الحجز بالمستشفى والعلاج راحه وسوائل وبعض المسكنات أو أدوية للاحتقان أو مهدئ للسعال، مع عزل المصاب لمدة ١٠ أيام وأخذ الاحتياطات بارتداء الكمامة ومسافة أمان ومكان جيد التهوية".
وتابع: "اذا كانت كورونا فقد تم التعامل معها بالعزل وأن كانت غير كورونا فلم نخسر شئ، وطبعا مع التنبيه لو ظهر أعراض من اللى تقلق يتوجه لأقرب مستشفى".
وقال علام: "أيه هى العلاجات: راحة وسوائل دافئة وعزل فى مكان جيد التهوية ومتابعة الأعراض لو ظهرت أعراض تقلق نتوجه للمستشفى.. آلم او حراره هناخد مسكن للآلم وخافض للحرارة".
نصائح لمرضى كورونا
وأضاف: "فى سعال جاف هناخد أي مهدئ للسعال زي برونشكم او اوبلكس. فى سعال ببلغم بناخد فوار اسمه استايل سستايين ٢٠٠ لحد ٣ مرات يوميا. احتقان فى الحلق هناخد (ستربسلز او بيكتول او لارى برو او اى بديل). احتقان فى الأنف ورشح هناخد (كونجستال او كومتريكس او بنادول كولد اند فلو او اى بديل).
ونصح الدكتور علام قائلًا: "الفيتامينات والمكملات الغذائية زى فيتامين سى والزنك واللاكتوفيرين لو بتاكل كويس فملهاش داعى لكن مش هتضر. حقنه البرد السحريه ملهاش لزمه وبتضر.. المضاد حيوى مبيتاخدش بدون تحاليل تقول ان فى عدوى بكتيرية لانه مش علاج للفيروسات وفى الحالات البسيطة ملوش داعى لو فى بلغم اخضر او التهاب صديدى بالحلق او التهاب بالاذن نقدر ناخده ونخلى تحديد النوع والجرعه للطبيب مش بمزاجنا".
وتابع نصائحه قائلًا: "أما الأعراض اللى تقلق ولو موجودة لازم اتوجه للمستشفى للاطمئنان وعمل اللازم: ارتفاع درجه الحراره مستمر وغير مستجيب للخوافض. سعال شديد ومستمر. ضيق بالتنفس او الم بالصدر. اسهال او ترجيع مستمر وشديد ( خصوصا الاطفال).. تحول لون الوجه والشفايف للازرق. اضطراب بدرجه الوعى او توهان او عدم تركيز.. غير كده طالما الاعراض بسيطه واتحسنت مش محتاج تعرف كانت كوفيد او غيره مش هتفرق".
