نتائج مبشرة.. محمد علام يكشف حقائق العلاج الجديد لمرض السكر
كشف الدكتور محمد علام نائب رئيس مستشفى النجيلة للعزل سابقا، بعض الحقائق عن التطور الجديد في علاج مرض السكر بالخلايا الجذعية، مؤكدًا أن العلاج يُعد ثورة مبشرة، لكن العلاج يحتاج وقتا كبيرا للتأكد من فاعليته، لكنه سيفتح المجال لعلاج ملايين الحالات خلال الـ10 سنوات المقبلة، لكن نسبة خفض استخدام الانسولين للمريض التي كشفوا عنها مبشرة وستقضي على معظم المضاعفات لمرض السكر.
حقائق علاج السكر الجديد
وكتب الدكتور محمد علام تدوينة على الفيس بوك قال فيها: "خبر علاج السكر بالخلايا الجذعية ده خبر ثورى وتقنية مبشره جدا العلماء بيطوروها من فتره لعلاج أمراض مختلفة مش بس السكر لكن لسه محتاجه وقت كبير".
وأضاف: "الخبر ده هيفتح المجال لعلاج ملايين الحالات فى السنوات ال 10 القادمه لكن بعض المعلومات الخطأ منتشره فحبيت اوضحها.. اولا العلاج مازال تحت التجربة ومده التجربه ٥ سنوات واللى اتنشر فقط نتيجه حاله بعد ٥ أشهر من العلاج وفى معاه ١٧ حاله اخرى مش زى ما بعض الناس قالت كل مرضى السكر هيتعالجوا خلال 5 سنوات".
علاج مرضى السكر
وتابع الدكتور علام: "ثانيا العلاج مش لكل مرضى السكر العلاج لنوع واحد فقط type 1 مريض سكر من النوع الأول ونسبتهم اقل من مرضى السكر بالنوع الثانى مثلا فى امريكا مرضى النوع الاول او داء السكرى المعتمد على الانسولين بيمثلوا 10٪ فقط من حالات مرضى السكر فى امريكا والباقيين ال ٩٠٪ العلاج مش ليهم".
وأضاف:"ثالثا مازالت التقنيه فيها مشكله ومع استمرار التجربه هيحاولوا يلاقوا حلول ليها او يمنعوا مضاعفات المشكله دى وهى ان المريض لازم ياخد لفتره طويله ادويه مثبطه للمناعه علشان ميحصلش رفض للخلايا الجزعيه اللى خدها، ودى مشكله لازم تكون حاططها فى اعتبارك خصوصا لمريض السكر".
مضاعفات السكر
وقال:"رابعا نسبه خفض استخدام الانسولين للمريض اللى اعلنوا عنه حوالى ٩١٪ يعنى موصلش لنسبه ١٠٠٪ وان كانت النسبه دى كويسه جدا جدا ومبشرة وهتقضى على اغلب المضاعفات لمرض السكر عنده لكن هيفضل محتاج متابعه نسبه السكر فى الدم طول فتره التجربه للتأكد من فاعليه انتاج الخلايا الجذعيه للانسولين وان انتاج الانسولين منخفضش وان النسبه مقلتش بعد مرور فتره".
واستطرد قائلًا: "بعد انتهاء التجربه لو مكنش فى مضاعفات او فى انخفاض فى نسبه انتاج الانسولين بعد فتره او رفض الجسم للخلايا دى هيكون وصلنا لحل لنسبه ١٠٪ من مرضى السكر فقط وهنقلل مضاعفات مرض السكر بالنسبالهم وده انجاز ضخم جدا فى المجال الطبى".
واختتم تدوينته قائلًا: "البحث العلمى هو اللى وصلنا لكده لكن للاسف الحاجات دى بتحتاج مليارات تتصرف عليها لو دول العالم صرفت ميزانيه سنه واحده من اللى بيصرفوه على الاسلحه والصراعات هنكتشف علاج لامراض كتيره جدا بتموت عشرات الملايين سنويا او بتاثر على حياتهم تاثير ضخم".
