قرار صادم من الجنزوري.. مدام سامية تنقذ الموقف.. ولماذا هدد الجوهري بترحيل الحضري.. أسرار بطولة 98
تقدم “فيتو” الحلقة الأولى من برنامج جديد يحمل عنوان “بره الملعب” مع انطلاق بطولة الأمم الأفريقية في الكاميرون، سنعود من خلاله لذكريات الزمن الجميل وحكايات وكواليس من البطولة.
وفي أول حلقة من البرنامج تم التركيز على التتويج بالنجمة الرابعة، وفوز منتخب مصر ببطولة أمم أفريقيا 98، والتي أقيمت في بوركينا فاسو، وكذلك تحقيق اللقب للمرة الرابعة في تاريخ الفراعنة.
تفاصيل الحلقة الأولى
النجمة الرابعة يعني بوركينا فاسو وأول بطولة تفوز فيها مصر بمشاركة 16 فريقا.
في الفترة دي كانت الكرة المصرية بتدور في مرحلة التوهان والنتائج ليست على مايرام من ساعة ما وصلنا كاس العالم 90 في إيطاليا وقبلها الفوز بالأمم الأفريقية 86 ووقتها كان فريقنا خارج التصنيف وحقل تجارب لمدربين مره من رومانيا ومره تانيه من هولندا.
المهم عمنا الجوهري استلم المهمة بعد الخطيب وفاروق جعفر وفي اول مباراه اتغلبنا من ليبيريا وضاع املنا في الوصول لمونديال فرنسا 98.
وقتها شافت الحكومة واللي كان بيرأسها الدكتور كمال الجنزوري ان مافيش فايده من الكرة وأحمد زي الحاج احمد.. الكرة الافريقية بتتطور واحنا محلك سر ومعندناشس غير محترف واحد وهو هاني رمزي والباقي شوية هواه.
وزاد الطين بله تصريح الجوهري لما قال ان منتخبنا في بوركينا فاسو مش هيحقق اكتر من المركز ال13.
وكان فيه معسكر للمنتخب في فرنسا للبطوله والجوهري ضرب التصريح عشان ماحدش يلومه لو محالفناش الحظ ووصلنا لأدوار متقدمة.
لكن الجنزوري مبيهزرش والفريق بيستعد عشان يركب الأوتوبيس ويتوجه لفرنسا صدر قرار الحكومة بإلغاء المعسكر في فرنسا وطبعا كلنا عارفين ان الدوله وقتها هي اللي كانت بتصرف على الكرة.
الجوهري اتخنق بس ما باليد حيله طب نعمل ايه وبعد تفكير قال مافيش احسن من اسوان اتوكل علي الله وعمل معسكر هناك ولعب مباريات وديه خسر من الجزائر وفاز علي توجو.
في الوقت ده مصر كلها كانت بتطالب حسام حسن يعتزل لان سنه وصل 32 سنة ومبقاش يجيب اجوان ولكن الجوهري مقتنع بيه وقاله رزقي ورزقك علي الله.
التهديد بترحيل الحضري
المنتخب وصل هناك البطوله طبعا لا فنادق ولايحزنون نُزل شباب وكل واحد يعيش والبدايه كانت موفقه والفوز اول مباراتين.. كان وقتها عصام الحضري حارس تاني مع المنتخب والاساسي نادر السيد والثالث احمد صابر حارس المقاولون...يسكت الحضري...لا طبعا.. راح للكابتن فكري صالح يقوله اننا ضمنا الصعود لدور ال8 وانا عايز ااقف في ماتش المغرب...سكت عم فكري وقاله روح قول للكابتن الجوهري.. وأول مانطق الحضري وقال بس عايز العب وإذ بالجوهري باعلي صوته ينادي علي سمير عدلي.. ياسمير احجز للحضري عشان يروح مصر خلاص مش عايزه.. ولم ينقذ الحضري الا البكاء والتعهد انه مش هيفتح القصه دي تاني.
جزمة هاني رمزي بترن
كل الفريق كان عايز يفوز عشان يفضل في نفسه المدينه ومايسافرش الا علي النهائي ومافيش تفكير غير ده ولكن هدف حجي العالمي في نادر السيد كان له راي اخر وانهزمنا وفي طريق العوده وأول ماوصل النزل اذ بهاني رمزي الكابتن بعد حسام يضرب بجزمته بتاع الكوره في الأرض وتعمل صدي كبير وبيقول لزمايله انبسطتم اهو هنروح بلد تانيه عشان يركبكم الغرور.
مدام ساميه وتغيير مود الجوهري
طبعا كان الجوهري حزين جدا موده اكتر من الزفت شويه حتي تلقي مكالمه من زوجته مدام ساميه اللي قالتله رب ضارة نافعه ويمكن ربنا عمل كده خير للمنتخب.. المكالمه دي كان لها مفعول السحر وبدأ الجوهري يفكر واكتشف ان الهزيمه جاءت في مصلحة مصر لان الطريق اللي هياخده المنتخب افضل مما لو فزنا علي المغرب والأكثر من ذلك اننا هنلعب علي الأضواء الكاشفه ومش هنلعب في عز الضهر لان لاعبيتنا مش واخدين علي الأجواء وخطوه ورا خطوه حتي فزنا بالبطوله والنجمه الرابعه.
اول مره الرئيس يستقبل المنتخب بالمطار
كانت اول مره الرئيس مبارك يستقبل الفريق في مطار القاهره وبعد النزول من الطائره ومره تانيه عزمهم في القصر وطبعا الدكتور الجنزوي صاحب الفرح وهو اللي اجبر الجوهري يعمل المعسكر في اسوان.
لكن سمير زاهر رئيس اتحاد الكوره مش ناسي ان الجنزوري رجع البعثه من المطار وهي مسافره فرنسا قبل البطوله وبقي بيتعامل بنشوة المنتصر لكن الجنزور فضل ساكت لحد مالقي فرصة التخلص من زاهر والجوهري في بعد الهزيمه من السعوديه في كاس القارات بالمكسيك 99 ودي ليها حكايه تانيه هنحكيهالكم.
مكافأة البطولة
باللائحه وسلطاتها وبابا غنوجها حصل كل فرد علي 30 الف جنيه.. جنيه ينطح جنيه وطبعا كان رقم كويس وقتها قبل مانشوف الملايين والمكافات الكتير اللي بنسمع عنها.
انتهت حكايتنا اليوم وانتظروا حكايه تانية في حلقه تانية.
