مجدي يعقوب: بنعمل العملية بـ 9 دولارات وفي أوروبا بـ 200 ألف دولار
كشف الدكتور مجدي يعقوب، جراح القلب العالمي: "في أوروبا مستغربين مننا وبيقولوا ازاي بتعملوا عمليات بأحدث الأجهزة وبـ10/1 الثمن".
اندهاش الأوروبيين
وتابع خلال لقائه الخاص بالتليفزيون المصري: "الأوروبيين بيقولوا ازاي بتعملوا جهاز صناعي واَخر عمليات الأطفال مش بنصف الثمن لأ بـ 1/10الثمن".
تبرعات مركز القلب بأسوان
وأضاف:"التبرعات اللي بتجيلنا عارفين انها جايلنا من ناس متوسطي الدخل ومحدودي الدخل وده أمر نبيل ومسئولية علينا، وبالتبرعات دي بنروح نشتري بيها أحدث الأجهزة في العالم ".
تكلفة عملية القلب للطفل
وأشار:"عملية القلب للطفل في مركز اسوان للقلب اللى بتتكلف في اوروبا 200 الف دولار بنعملها بـ 9 دولارات، ولما بكلم الأوروبيين والأمريكيين بيستغربوا ويقولوا ازاي يكون جودة العمليات احسن وبـ 1/10 الثمن".
أجر أطباء مركز اسوان للقلب
وتابع الدكتور مجدي يعقوب:"جزء مننا في الفرق الطبية مبياخدش ولا مليم، والاطباء اللى عندنا احسن من اللي موجودين في أوروبا، وفيه أساتذة من اوروبا وامريكا بيجوا يشتغلوا معانا ببلاش".
موقف انساني لـ مجدي يعقوب
ولفت:"فكرنا في عمل مركز طبي للقلب يخدم الناس بمساواة كاملة ودي من أهم الأشياء، بعيدا عن اللون او الجنس او الحالة المادية والاجتماعية، وانا ممثل لفريق كبير جدا ومش بشتغل لوحدي، وكل واحد بيؤمن بالمباديء وبيتشغل من اجل خدمة المرضى والعلم والاكتشافات الجديدة في المرتبة الثانية، والمريض اهم انسان في المستشفي وكلنا بنخدمه وبنعامله بطريقة انسانية وبشكل فيه كرامة وبنقوله ازيك يا فندم، ولو كان طفل مش بنعتبر مريض ولكن بنعتبره من العيلة بتاعتنا".
وقال الدكتور مجدي يعقوب، جراح القلب العالمي: بدون شك بحب أسوان لأنها جزء كبير من حياتي.
سر دعم مجدي يعقوب لـ اسوان
وتابع خلال حوار خاص مع التليفزيون المصري:"لمدة طويلة من حياتي كنت أحلم بأسوان لأنى كنت أشعر ان اطفالها وناسها مهملون ولا يحصلون علي ما يستحقونه من رعاية كاملة، ومعاناتهم من امراض كثيرة، من الروماتيزم وتصلب الشرايين وارتفاع الضغط".
حب مجدي يعقوب لأسوان
وأكمل: "أسوان كانت دايما في قلبي وافكر فيها، وفي أمريكا كنت اتحدث لهم بأنني في يوم من الأيام سأذهب الي اسوان".
طفولة مجدي يعقوب في اسوان
وروى مجدي يعقوب عن طفولته التي عاشها في أسوان، قائلا:"قعدت سنة ونصف في مدرسة ابتدائي بأسوان وكطفل صغير مصدقتش جمالها وبصمات المصريين القدماء فيها ونيلها الرائع، ولفيت بلاد العالم ورجعت هنا لأنى كان حلمي ارجعلها حبا في طبيعتها وجمالها".
