محمد شاكر: تريليون جنيه فاتورة مشروعات الكهرباء ونصيب الصعيد 135 مليار جنيه
قال الدكتور محمد شاكر وزير الكهرباء، إن الرئيس السيسي شدد خلال توجهاته على أن الكهرباء قضية أمن قومي، وأنفقنا أكثر من تريليون جنيه علي مشروعات الطاقة خلال السنوات الأخيرة، نصيب الصعيد منها 135 مليار جنيه.
العدادات مسبوقة الدفع
وأضاف خلال مداخلة هاتفية ببرنامج "حضرة المواطن" الذي يقدمه الكاتب الصحفي سيد علي بقناة "الحدث اليوم": العدادات مسبوقة الدفع وصل عددها إلى 12 مليون عداد، ونستهدف تركيب 23 مليون عداد آخرين الفترة القريبة.
توجيهات السيسي للكهرباء
وتابع: "السيسي وجه بضرورة تركيب 23 مليون عداد مسبوق الدفع، وسيتم الاعتماد على التصنيع المحلي لتلك العدادات".
وكان الرئيس السيسي وجه الشكر إلى الدكتور محمد شاكر وزير الكهرباء، على جهوده في ملف الطاقة والكهرباء، قائلًا: “فرصة النهاردة أشكر الدكتور شاكر كزميل هنا لينا وعلى الجهد اللي عمله في مشكلة من أكبر المشاكل اللي قابلتنا في مصر”.
وأضاف الرئيس السيسي: "مش كل مرة في الافتتاحات بنتكلم عن اللي اتعمل وبكام وكده.. إحنا النهارده بنتكلم عن عالم جليل فاضل في التخصص.. ومن خلال جهده وعلمه يقدر يحقق نقلة في موضوع الكهرباء في مصر".
قطاع الكهرباء
وأكد الرئيس السيسي، أن قطاع الكهرباء شهد ظروفًا صعبة في الدولة المصرية قبل البدء في تطويره بشكل كامل.
وقال الرئيس: "قطاع الكهرباء في كل شيء كان صعب جدًّا وفي موضوع الطاقة.. وماشيين في الطاقة ومش أقصد على الكهرباء بس.. إحنا لما اتكملنا عاوزين مصر فيما يخص الطاقة الكهربائية سواء إنتاج أو توزيع أو تحكم زيها زى أي دولة متقدمة جدا في المجال".
دول الجوار
وأضاف الرئيس السيسى: “نقدر نعمل ربط كهربائي مع دول الجوار نقدر.. ظروفنا في 2013 و2014 قبل كده مكنش هنقدر.. العالم رايح لكده.. الدولة اللى مش هتكون جاهزة هيفوتها الربط الكهربائي وده لمصلحة البشر والشعوب.. لازم يكون عندك ربط وتتبادل والاستفادة المتبادلة في الكهرباء.. والإجراءات والجهود في هذا المجال.. لازم يكون قطاع الطاقة أو الكهرباء من أرقى ما يمكن.. بوجه التحية والتقدير إلى الدكتور شاكر ووزارة الكهرباء”.
تريليون و100 مليار جنيه
وقال الرئيس السيسي: "دكتور شاكر له مكتب وشركة كبيرة.. "مكتب شاكر".. ساب الشركة دى ولم يسمح لها بالدخول مع الدولة والحكومة والقوات المسلحة.. ليه يا دكتور شاكر.. آى حاجة بيعملها بدون مقابل.. وانا حابب الحكاية دى".
وأوضح الرئيس السيسي إن الاستثمارات في الصعيد خلال الفترة الماضية تخطت تريليون و100 مليار جنيه.
وأضاف الرئيس: "الأرقام اللى اتحطت للصعيد فوق التريليون جنيه و100 مليار جنيه فى الكام سنة دول ولسه شغالين".
وأشار الرئيس السيسي إلى “أن عرض أسبوع الصعيد هدفه أن نقول للناس الاهتمام مش كلام.. حد من كام يوم بيقولى الرقم كام.. أديك رقم صغير وأسيبك كده لا كهرباء ولا مياه ولا صرف صحي ولا طرق ايه ده؟”.
مشروع حياة كريمة
وقال الرئيس: "الإعلام مهم جدًّا إنه ياخد البيانات وإذا كان محتاج يبسطها بالتنسيق مع وزارة الكهرباء ميجراش حاجة علشان في النهاية الناس تجد الخدمة بالشكل المناسب".
وقال الرئيس السيسي، إن مشروع حياة كريمة في محافظات الصعيد يضم أكثر من 30 مركزًا.
وأضاف: "معرفشي اللي هقوله مناسب.. هل ممكن العدادات اللي هنعملهم في مراكز حياة كريمة.. الـ 34 مركز تكون العدادات مسبوقة الدفع.. لما أعمل خليت المواطن شايف الاستهلاك.. فيه ناس اشتكت أن القراءة مش مضبوطة.. العداد معاك وانت اللي بتشحنه بدون قراءة.. أنت تنظم استخدامك للكهرباء".
وأضاف الرئيس السيسي: لو نقدر نعمله يا ريت عداداتنا في الدولة المصرية تكون مسبوقة الدفع.. علشان مشكلة الشكاوى من القراءات.. لو ده ممكن يبقى نعملها.. مش هطول أكتر من كده.. بشكرك يا دكتور شاكر.. ولسه احنا في أسبوع الصعيد وهنكمل بكرة".
