"اقتل كافر".. شعر أحمد خيري

ارفع سلاح
دمك مباح
اقتل. اسفك. إزهق أرواح
مش مع رأيك؟
يبقى عدوك
خليه من طريقك ينزاح
ولو من دمك
لا ولا يهمك
دوس عليه واهو كلب وراح
دمه حلال
قتله نضال
والحرب عليه شرف وكفاح
ولو يقتلك؟
مانا قلتلك:
إنت شهيد وهو سفاح
ده استشهاد
يعني جهاد
جاهد.. حي على الفلاح
واللي ف وشك
إوعى يغشك
قال "سلمية" قوله "انشراح"
اقصف عمره
اقطع خبره
في الحرب كله مستباح
اقتل كافر
ربك غافر
نيتك خير؟ يبقى سماح
واهو ده الحال
يمين وشمال
كل فريق معاه المفتاح
باسم المبدأ
يقتل يحرق
هو الصح.. ضميره مرتاح