سمية الألفي عن فاروق الفيشاوي: سامحته 16 سنة على خيانته.. وهذا سبب طلاقنا
قالت الفنانة سمية الألفي: "قعدت 16 سنة بسامح فاروق الفيشاوي على خيانته ليا، وفي الحقيقة إني كنت بحبه".
خيانات فاروق الفيشاوي
وأضافت خلال الجزء الثاني من لقائها ببرنامج "السيرة" الذي تقدمه الإعلامية وفاء الكيلاني بقناة "دي إم سي": "التسامح قوة مش ضعف، وفاروق الفيشاوي في الطلاق ما كانش عايز يطلق وأنا اللي كنت عايز أتطلق لأن نفسيتي تعبت وما قدرتش أستحمل، وأمي قالت له يا فاروق أنت خنتها كتير، فقال لها ما هي بتسامحني بقالها 16 سنة ليه مش قادرة تسامح تاني فردت عليه أمي وقالت له خلاص تعبت".
كرامة فاروق الفيشاوي
ولفتت: "كرامة فاروق الفيشاوي كانت عندي كبيرة أوي، وما كانش بيعتبر خياناته دي بتجرح كرامتي".
تعرض سمية الألفى للخيانة
وتابعت: "كانت عندي صديقة غالية أوي وجالي تليفون بيقولوا لي فاروق بيخونك في المكان الفلاني، وصديقتي فضلت تزن عليا نروح نقفشه وأنا رفضت وقلت لأ لما يجي هقوله يطلقني، فصديقتي اتصلت بيه في الفندق فردت عليها البنت اللي بيخوني معاها فكلمتها وقلت لها اديني فاروق فكلمني فقلت له معلش أنا بكلمك علشان المخرجين بيطلبوك ومش عارفين يوصلوا لك وما حطتهوش في موقف وحش بس ساعتها قلت أنا خلاص هتطلق".
احترام فاروق الفيشاوي
وأكملت: "اتربيت مع أم بتحترم الزوج احترام ملهوش حد وربتني إني ما أغلطش وآخد حقي بطريقة صح، وأنا ما غلطتش في فاروق الفيشاوي وهو عمره ما غلط فيا ولا زعق لي ولا قال لي كلمة بايخة، إن واحدة ست تغريه فيلاقي نفسه في نزوة كان بالنسبة لي عادي".
وأوضحت: "استحملت فاروق الفيشاوي 16 سنة خيانة ولكن بعد كده قلت له باي باي أنا خلاص هتطلق".
واستطردت: "بعد لما قفشت فاروق الفيشاوي آخر مرة كان بيخوني فيها كلمته في التليفون وقلت له أنا رايحة أنا وأمي وأحمد هنقعد في فندق ومنتظراك، وطلبت واصريت على الطلاق".
صديقات سمية الألفي
وأكدت: "من ضمن اللي خاني فاورق الفيشاوي معاهم كانوا صديقات ليا، وسألته عن سبب خيانته ليا فقال لي مقاومتي بتبقى ضعيفة، فقلت له هو أنا مقصرة، فقال لي المشكلة عندي والعيب فيا أنا".
حب فاروق الفيشاوي
وأكملت سمية الألفي: "حبي لفاروق الفيشاوي الكبير والقوي كان بيقويني ويخليني قادرة أسامحه على خياناته، وما أقدرش أفقد الثقة في نفسي، ولو مش حاسة إنه بيحبني حب كبير هو كمان مكنتش جبت أحمد وعمر منه وسامحته 16 سنة".
إدمان فاروق الفيشاوي
وأضافت: "قلت له الإدمان بقى قضية حياتي ومش هيجرحني إنك تخوني وممكن أجيبلك كل نساء العالم تبقى تحت رجليك، أنت بتتدارى في موضوع الخيانة وده مش قضيتي، ولكن إنك تبطل إدمان دي قضيتي اللي مش ممكن أنساها أو أتخلى عنها، لما انفصلت عن فاروق الفيشاوي كان وقتها أقلع عن إدمان المخدرات".
طلاق فاروق الفيشاوي
واستطردت: "في الطلقة التالتة كان سبب إصراري عليها والانفصال عن فاروق الفيشاوي خوفي على أحمد وعمر وإني مسؤولة عنهم وحمايتهم من إدمان الفنان الراحل، وأحمد وعمر وقتها كانوا عندي أغلى من أي حاجة، وفاروق ما كانش عنده الوقت إنه يبقى مسؤول عن ولاده لأنه كان محب للحياة والسهر ومجموعة الأصدقاء اللي كانوا لازم يجتمع معاهم كل يوم".
ولفتت: "روحنا للمأذون علشان نتطلق وهناك عيطنا عياط جامد جدًّا وهو كان متمسك بيا ورفض الطلاق ولكني كنت مصرة".
