هبة رشوان عن والدها: أبويا كتب لنا كل حاجة.. وكان بيوصيني على آية | فيديو
ردت هبة رشوان، ابنة الفنان القدير رشوان توفيق، على أزمة والدها مع ابنته آية التي أقامت هي وزوجها وابنهما دعوى قضائية بالحجر عليه.
دعم رشوان توفيق لأبنائه
وقالت خلال لقائها ببرنامج "واحد من الناس" الذي يقدمه الإعلامي عمرو الليثي بقناة "الحياة": "رشوان توفيق كان دوره مصيري في حياتنا، وأي واحد كان يتعرض لأزمة كان يقف معاه وعمرنا ما شيِّلنا هم في الدنيا.. طول ما هو عايش ومخدش حاجة لروحه أبدًا وإحنا بالنسبة له روحه، وكان يسافر أي فلوس تجيله كان يجيب لنا بها ملابس وينسى نفسه".
أملاك رشوان توفيق
وتابعت هبة رشوان: "كتب لنا كل حاجة وكأن ماله بيلدغه، ولم نطلب منه أنه يكتب لنا ورثه، وكلنا مقرين ومعترفين إن كل ما لدينا من أملاك من الله ثم من أبويا رشوان توفيق".
رسالة ابنة رشوان توفيق لشقيقتها
ووجهت رسالة لشقيقتها آية، قائلة: "اللي حصل حصل وممكن الأمور تصلح، ونصحتها وحاولت معاها ولكن معرفتش أوصل لها صوتي".
وصية رشوان توفيق
وتابعت: "رشوان توفيق على طول يوصيني على آية رغم اللي عملته معاه، وبيدعي لها وبيوصينا بها خيرًا".
ودخل الفنان رشوان توفيق في نوبة بكاء على الهواء حزنًا على إقامة ابنته آية وزوجها وابنهما، قضية حجر ضده.
ابنة رشوان توفيق ترفع قضية حجر عليه
وأكد خلال لقائه ببرنامج "واحد من الناس" الذي يقدمه الإعلامي عمرو الليثي بقناة "الحياة": "بنتي آية هي وجوزها وابنها رفعوا عليا قضية حجر رغم إني اديتهم حياتي كلها واللي بيحصل ده هسيبه للقانون يعني، أنا أثق في عدالة القانون لأني أنا مقصرتش مع حد، وبعد عمري ده كله لا أملك إلا تليفونًا محمولًا، وفضل الله عليَّ سبحانه وتعالى هو أن يخرجني من الدنيا آمنا".
توزيع تركة رشوان توفيق
وأضاف: "وزعت تركتي كلها على زوجتي رحمها الله وأولادي، وأتذكر أنني مريت بالكثير من الظروف الصعبة وكانت مراتي تبقى نايمة جانبي وأبص لها وأقولها إنتى فولاذ ومتقوليش ولا تشتكي من ظروفي الصعبة، واقسم بالله خلال 62 سنة لم تقل لي زوجتي ولو لمرة واحدة بكرة هنعمل ايه رغم الظروف الصعبة اللى مريت بيها".
حب رشوان توفيق لزوجته الراحلة
ولفت: "كنت بحب أفرح مراتي وأجيب العربية باسمها وكل شيء باسمها علشان أسعدها، وهبة رشوان بنتي تقولي مشوفتش راجل حب مراته وهي عايشة وميتة زي رشوان توفيق".
وأكدت هبة رشوان توفيق: "كان رشوان توفيق على يقين أنه هيتوفى قبل أمي علشان كده كل حاجة كتبها باسمها وباسمنا".
رشوان توفيق يوجه رسالة لابنته آية
ووجَّه رشوان توفيق رسالة مؤثرة لابنته آية التي أقامت دعوى قضائية بالحجر عليه، قائلًا: "حياتي فيها تجارب قاسية جدًّا وأقسى تجربة اللي عشتها دلوقتي، وفي البيت باقعد أكلم نفسي إزاي أعطيت بلا حساب وبعدين يحصل معاك كده، أنا بقيت المقتول الحي، بس أنا سايبها لربنا وللقضاء واثق في القضاء العادل، وبإذن الله كل مَن خطط ضد سيرد كيده في نحره".
وعلق الإعلامي عمرو الليثي: "اللي ملهوش خير في رشوان توفيق ملهوش خير في حد، وكما تدين تدان"، ليعلق رشوان توفيق: "أنا بحب ولادي كلهم".
