«النهضة» قالت «للتحرير»: اختشي؟!
أنا لا أكره «النهضة» ولا أنت ترفض «التحرير».. فما الذي يختلف فيه هؤلاء عن هؤلاء.. أرباب النهضة اختاروا «جامعة القاهرة».. وأهل التحرير كانوا بالقرب من «جامعة الدول العربية».. والدستور وإعلانه ومواده نجم الحفل هنا وهناك بعضهم يراه مقدساً وفل الفل والبعض الآخر ينظر إليه بعين الغضب والشك والخوف، وبين هؤلاء وهؤلاء توجد فئة عظمي ميدانها الأساسي «لقمة العيش».. ودستورها «قرش حلال».. ومظاهراتها تطلب «الستر» لا أكثر ولا أقل..
وقد حاول أولاد الحلال التصالح والتراضي بين النهضة والتحرير، وقد تم جمعهما وجها لوجه. النهضة: عند تمثال نهضة مصر.. ولأن شعارنا «النهضة» اخترنا المكان الصح.. عشان إحنا بتوع الصح التحرير: وإحنا بقي اللي الغلط راكبنا من ساسنا لراسنا؟ النهضة: اللي علي رأسه بطحة. التحرير: البداية مش حلوة.. لأن اللسان لما يطول العقل بيقصر.. والغلط بيزيد. النهضة: ممكن أعرف انتم نايمين في التحرير بتعملوا إيه، النائب العام ومشي.. وحق الشهداء هيرجع.. والدستور اتشطب سوبر لوكس. التحرير: وهو فيه تشطيب سوبر لوكس في 19 ساعة.. ده أنا شفت واحد في التأسيسية نايم ورافع إيده. النهضة: ما هي دي الديمقراطية.. من حقه يعترض؟ التحرير: مش لما يكون صاحي وفايق.. الناس دي كانت صعبانة جداً عليَّ.. وفكرت أخد لهم شاي بلبن وبقسماط وأعمل رشة جرئية عليهم، عشان يصحصحوا! النهضة: لأ هما كانوا فايقين قوي.. والملايكة بترفرف عليهم بأجنحتها.. لأنهم في جهاد عظيم. التحرير: ويعني التحرير مكانش فيه ملايكة بترفرف علي خيام المعتصمين؟ النهضة: بص علي وجوه الناس اللي هناك وأنت تعرف؟ التحرير: بس ربك رب قلوب يا نهضة؟.. ومن إمتي بناخد بالظاهر يا بنت عبدالظاهر وبعدين ده كلامك.. ولا كلام المرشد؟ النهضة: اللي ملوش كبير بيشتري له كبير. التحرير: وحياة والدك تشتري لي معاكي كيلو كبار، بس تنقيهم طازة وعلي الفرازة زي أعضاء التأسيسية! النهضة: بدل ما تتكلم عن الطازة؟.. كلمني عن اللي انسحبوا وأسألهم لماذا؟ التحرير: مش عايزة سؤال.. لأنهم ضد «سلق» الدستور؟ النهضة: يا سيدي مفيش مشكلة نعمل لهم دستور «مقلي» بالبيض والبقسماط ومعاه سلطة خضراء ومخلل، وبعدين خلونا نمشي لقدام.. واكنسوا ضمايركم ورشدها عشان ربنا يعدينا من الأزمة علي خير! التحرير: يعني فيه أزمة إنتِ معترفة بكدة؟ النهضة: مين السبب فيها؟ التحرير: غياب «الإدارة».. وغياب «الإرادة»؟ النهضة: هنلعب بالألفاظ.. إحنا بتوع نحو وصرف! التحرير: صرف عمله من صندوق النقد الدولي.. وصرف صحي عند بتوع العشوائيات.. وللا صرف عفريت.. حضرتوه ومش عارفين تصرفوه؟ النهضة: لأ صرف يعني تنصرف أنت وأمثالك عشان هنرش صينية الميدان ومش عايزين نحس ووقف حال!
