رمضان صبحي يفاجئ حلا شيحة بتعليقه على ارتدائها الحجاب
فاجأ رمضان صبحي، لاعب نادي بيراميدز، الفنانة حلا شيحة بالتعليق على ارتدائها للحجاب، وهو ما تفاعل معه الجمهور.
فى هذا السياق، نشرت “حلا”، صورته بالحجاب، على إحدى صفحاتها التي أنشأتها مؤخرًا على “فيس بوك”، معلقة بقولها: “مفيش أجمل من السعادة الروحية والسلام الداخلي، الحمد لله”، وعقب هذا المنشور علق “رمضان” من خلال التعليقات على الصورة بقوله:"الأهم السلام الداخلي فعلا".
وفي وقت سابق كانت الفنانة حلا شيحة صدمت جمهورها وخرجت لترد على تصريحات سابقة لوالدها أيضًا بشأن خطف زوجها مسعود لها، وأنه السبب في أفكارها وتحريمها للفن.
ونشرت "حلا" وقتها عبر حسابها على موقع الصور الشهير "إنستجرام"، تقول: "الحقيقة مصدومة من الكلام اللي والدي قاله عن زوجي اللي اتجوزته بكامل إرادتي والحمد لله لقيت معاه كل المعاني الجميلة من احترام ورجولة وشهامة نادرة الأيام دي، وأنا لم يخطفني أحد كما قال والدي، والكلام ده لا يصح أبدًا".
وتابعت: "أنا بحب زوجي وسعيدة بحبه ليا وبنحترم بعض ومعز بيحترم رأيي وبيقدر مشاعري وبالعكس هو دائمًا بيهدّيني، وطبعًا بيساندني ويشجعني لأني زوجته وحبيبته وهو أكبر بكتير من كل الكلام اللي بيتقال عليه وافتراءات مش صحيحة وهو أبعد ما يكون عنها".
وأضافت الفنانة حلا شيحة قائلة: "لن أسمح لأحد الكلام عنه ولن أسمح بأي تصور خاطئ عنه بأي شكل من الأشكال، معز طول عمره له رؤيته الواضحة في الدين وحتى في الفن وهو ليس مع أي جماعة أو فئة معينة هو يمثل نفسه وله أفكاره وآراؤه العلمية والدينية المختلفة الجميلة وليس لأحد أن يصنفه أو يضعه في أي قالب فقط لأن هواه لا يوافق ما يمثله معز هو في إيه في بلدنا الأيام دي بنحارب ونصارع في بعض وعايشين في قصص وهمية من نسج خيالنا عن بعض".
وواصلت حلا الهجوم والرد على منتقديها حيث قالت: "هو خلاص أي حد يتكلم بلغة الدين لازم يبقى متطرف أو إخواني هو مبقاش في مسلمين وسطيين طبيعيين هو ليه كل أنواع الهجوم ده على أي حد، أنا زعلانة من والدي جدًا لأنه يعرف معز كويس جدًا وقعدوا مع بعض كتير ووالدي يحبه جدًا وشاف منه كل خير".
وسردت "حلا" تفاصيل زواج معز قائلة: "معز زيي اتجوز ١٤ سنة من عمره وكان مستقر في حياته وعنده ثلاثة أولاد ربنا يخليهم له جمال ما شاء الله وعمره ما كان بتاع ستات زي ما بيتقال كلام لا يليق أبدًا وفي الآخر زيي لم يكمل جوازه وحدث الطلاق، وكلنا معرضين لده طبيعي أنه كان بيحاول زي أي راجل محترم أنه يلاقي استقرار في حياته في الحلال ومتوفقش أكتر من مرة ودي مش حاجة تعيب أي حد، والحمد لله اتقابلنا وتلاقينا لأن ظروفنا قريبة جدًا وعندي أولاد مثله وأولادنا شبه بعض الحمد لله واستقرينا إحنا الاتنين ليه ده يزعل الناس بدل ما ندعي لبعض بالخير بقينا نتصيد لبعض ونخوض في أعراض بعض هو حصل في مجتمعنا ده إحنا جرالنا إيه، في الآخر بوجِّه كلمة لوالدي الحبيب ألا يصح أبدًا كلامك مع كامل احترامي لك وللجميع".
واختتمت حلا بقولها: "أنا الحمد لله سعيدة في حياتي ومع زوج اتشرف أنه زوجي وبعتز بيه وإحنا أصدقاء قبل أن نكون أزواج، وكل كلمة أكتبها وقلتها نابعة مني وأنا متدينة بطبعي زي أي ست مصرية بتحب دينها وده لا يعيبني، وتديني اللي بدأ من أكتر من ١٥ سنة من المنطقي أن معز مش هو سببه مش محتاجة حد يخطفني أو يكتب عني أو يوجهني.. هذا كلام لا يليق، دعوا الخلق للخالق وكل واحد يخليه في حاله، ويا ريت نسمع من بعض بدل ما نسمع عن بعض، أحسنوا الظن".
