شكلها تغير 180 درجة.. ندى رحمي تكشف سبب خسارتها لوزنها وانفصالها عن خطيبها
على مدار الساعات الماضية احتلت الفنانة والإعلامية الشابة ندي رحمي مؤشرات بحث جوجل عربيًا ومختلف تريندات السوشيال ميديا ويأتي ذلك عقب لقائها الجريء والصريح مع برنامج "الستات ما يعرفوش يكدبوا" والذي تحدثت فيه عن خسارتها لوزنها الذي وصل إلى 192 كيلو.
ندى رحمي
وعن سبب اتخاذ قرار خسارة الوزن، قالت: “كان وزني 192 كيلو، كنت شبه شارع نوال كده والتفكير ما أخدش كتير، التفكير كان موجود، خلاص احنا في مشكلة جامدة جدًا وانت وصلتي لوزن ما فيش دايت انت لازم تلجأي لخطوة الجراحة لأن انت مش واحدة عايزة تخس 10 كيلو، انت واحدة عايزة تخس حوالي 100 كيلو”.
بداية التغيير
وأكدت أنها كانت تريد أن تخسر وزنها لأن الأمر يتعلق بصحتها.. وقالت: "رقم واحد طبعًا القرار ان أنا لازم أختار صحتي. أنا ما جاليش أي مرض مزمن ودي من رحمة ربنا، ولا ضغط ولا قلب ولا سكر، الأمراض المتعلقة بالوزن الزائد ما جاتليش، ولكن كان عندي مشكلة بفقرات الظهر.. أنا كنت بعرق وأنا قاعدة، لو اتعصبت أعرق وأنا قاعدة".
ولفتت ندى إلى أن المنافسة لم تكن موجودة بينها وبين ويزو وشيماء سيف، لأن كل واحدة منهن تمثل بطريقة مختلفة عن الأخرى، والقاسم المشترك بينهن كان فقط الشكل.
كما كشفت ندى رحمي عن أعمالها المستقبلية، مشيرة إلى أنها تحضر لمسلسل جديد ويحمل عنوان "دليلك الذكي للطلاق"، وقالت: "أؤدي فيه شخصية نادية، مش حابة أعرّف حد ان نادية دي كومديانة ولا جد ولا حتتحب، ولا حتحب، أنا عايزة الناس تبقى مهتمة ان ندى في أول ظهور ليها درامي حيبقى شكله ايه".
حياتها الشخصية
وعن حياتها الشخصية، قالت: "الخيارات بقت قليلة جدًا وده على عكس اللي أنا توقعته. بس الخيارات قليلة، مش ماحدش بيجي لاء، أنا.. لما بقى في شكل لطيف، بنوتة وبتاع، بقيتي بتتحطي في حتت شكلها حلو ونجمة وكده، للتسلية يومين كده".
كما كشفت أنها كانت مخطوبة، وقالت: "أنا كنت مخطوبة على فكرة، كنت مخطوبة وأنا مليانة، وحد خارج الوسط الفني، وكان رافض تمامًا أن أنا أعمل العملية، وكان جسمه شاب عادي جدًا.. وسبنا بعض قسمة ونصيب".
وتابعت: "أنا عايزة أتجوز، ما عنديش وقت للتسلية، عندي شغلي وعندي حياتي، لو انت انسان محترم ومتدين ومستور، مش عايزة أكتر من كده".
