شيكابالا: اللي مزعلني أنهم بيقولوا عليا ميت وبيروحوا المقابر بكلب أسود.. الأهلي عارف أخد الدوري إزاي 42 مرة.. زواجي من كندية وراءه قصة.. وهذه وجهتي بعد الاعتزال
ظهر محمود عبد الرازق شيكابالا نجم وقائد نادي الزمالك، على الهواء ببرنامج "الحكاية" الذي يقدمه الإعلامي عمرو أديب بقناة "إم بي سي مصر"، حاملًا درع الدوري العام.. تحدث عن كافة ما يشغل الشارع الرياضي ومشجعي نادي الزمالك، وحقيقة اعتزاله وزواجه ولماذا تأثر على الهواء باكيا.
فرحة عمرو أديب
وفي البداية علق عمرو أديب عندما رأى درع الدوري: "الحلوة خوخة جت من بعد دوخة ودا أحلى دوري الزمالك خده، الساعة 11 والحلقة على الهواء ومش مسجلة زي ما الناس كانت بتقول".
شيكابالا أيقونة الزمالك
وقال "أديب": إن شيكابالا أيقونة نادي الزمالك بموهبته واحترامه، لافتًا إلى أن كابتن الأبيض سيكشف الكثير من الأمور خلال الحلقة.
تجاوزات
ومن جانبه بدأ شيكابالا حديثه عن أزمته مع جمهور الأهلي وقال: "معنديش مشاكل مع جمهور الأهلي، والمشكلة مش عندي أو عند اللي بيديروا الكورة في مصر، يحدث معي تجاوزات لا تحدث مع لاعب في مصر ويذهبون للمقابر بنعش لي، ولو تم إيقاف مثل هذه الأمور لم نكن سنصل لما نصل له الآن، لما يحدث تجاوزات في الخارج من الجماهير اللاعب لا يتم إيقافه، ولكن هناك رد فعل ضد الجمهور، لو بلعب في ناد آخر لم يكن سيحدث معي ما يحدث، في كل مباراة يحدث معي نفس التجاوز وأنا فقط الذي يتم إيقافي والطرف الآخر لأ، ويحدث معي تجاوزات عنصرية مع أسرتي وزوجتي وابني".
وتابع: "أنا رد فعل على التجاوزات اللي بتحصل ضدي، ومن 20 سنة أنا بس اللي بتوقف مش حد، وبيتعمل ضدي وضد أسرتي وابني ومراتي حاجات عنصرية".
شتائم وإساءات جمهور النادي الأهلي
ولفت شيكابالا: "مباراة السوبر اللي في الإمارات كانت الناس بتشتمني وهما اللي بيبدأوا بالغلط وبعدين يلوموا على رد فعلي، وما يشوفوش إن أنا بتشتم وبيدعوا عليا وعلى ابني ومراتي، ياريت يقولوا بس أسود مش يتشالي كلب أسود ويرحوا المقابر".
حق شيكابالا
وتابع: "أنا باخد حقي بطريقتي طالما مفيش مسؤول بيجيب لي حقي من جمهور الأهلي وتجاوزاتهم ضدي، ومن 20 سنة محدش خد لي حقي ولو حد جابلي حقي مكنتش هرد ولا هتكلم".
مشجع زملكاوي
وأشار: "هما حاسين أنى قبل ما أكون لاعب كورة أنا مشجع للزمالك وواحد من الجماهير علشان كده أنا أكتر واحد بيهاجموني".
أحمد مجاهد
كما تحدث محمود عبد الرازق شيكابالا، قائد نادي الزمالك، عن أزمته مع أحمد مجاهد رئيس اللجنة التي تدير اتحاد الكرة، بعد مباراة التتويج بالدوري في مباراة البنك الأهلي.
وقال: "مشكلة مباراة التتويج بالدوري في مباراة البنك الأهلي، بدأت أني وقفت في الشارع ساعة ونص قبل الماتش علشان زوجات اللاعبين وأسرهم يدخلوا الإستاد، ولو لقيت أي مسئول يقوم بالدور ده مكنتش هعمل كده، وبعدها وقفت ولقيت زيزو والجزيري خرجولي بره، ولقيت المدرب بتاعي بيبكي علشان مراتي وأولادي مش عايزينهم يدخلوا، ومكنش فيه مبررات بمنع دخول زوجات اللاعبين وأسرهم الملعب".
مباراة التتويج
وتابع: "والد الونش أول مرة يدخل الإستاد في حياته، وجاي من الشرقية ومدخلش الإستاد، وأخوات يوسف أوباما جايين من إسكندرية مدخلوش".
زوجة أحداد
وأكمل: "أحداد بعد الماتش راح جاب مراته بلبس الكورة والحذاء الرياضي من الشارع علشان تحتفل بدرع الدوري، ومحمد عبد الشافي دخلنا بنته بعد لما فتحنا الحديد علشان تدخل".
مشكلات الدوري
واستطرد: "حصلنا على الدوري هذا الموسم، وشعرنا وكأن الكل يقول لنا الموسم المقبل (سندوس عليكم)، وكده كده السنة المقبلة ستخسر وما يحدث حاليًا ليس كرة".
أزمة أحمد مجاهد
وأضاف: "المفروض أيضًا داخل الغرفة بعد المباراة أجلب القمصان الخاصة بالاحتفال، والأمن لا يرغب في فتح الباب لإدخالي للغرفة، وحتى اللاعبين على الباب الصغار لا يريدون إدخالهم معنا للاحتفال وهذا دوري وهؤلاء اللاعبين في فريقي، وجاء رئيس اتحاد الكرة، مع إن المفروض نحن الاثنين ليس لنا علاقة بما يحدث ولا نفهم من هي الجهة المنظمة، فمع الزحمة بالتأكيد سيحدث مشكلة، وقالوا أنني شتمته ولكن هذا لم يحدث، وهو بنفسه برأني في حديث له مؤخرًا بإحدى القنوات الفضائية دون أن أتكلم ولماذا تم إيقافي إذا؟".
بكاء شيكابالا
بكى شيكابالا قائد نادي الزمالك على الهواء، تأثرًا بالتقرير الذي أذاعه عمرو أديب ببرنامج "الحكاية" المذاع على قناة "إم بي سي مصر"، والذي يبرز دعم وحب جماهير الأبيض والنادي الأهلي للساحر الأسمر.
رد فعل عمرو أديب
وعلق عمرو أديب على بكاء شيكابالا: "كل مصر بتحبك أهلاوية وزملكاوية، تعالى شوف السوشيال ميديا مقلوبة، ناس كتير مكنتش تعرفك كويس، أنت تاريخ عظيم يا شيكا.. أنا جايبلك تورتة محصلتش، أنت في قلب جمهور الزمالك وأنت أيقونة بالنسبة لهم".
رسالة شيكابالا لجماهير الأهلي
وقال شيكابالا: "بيوصَّلوا للجماهير حاجة مش صح، ولاعيبة الأهلي أصحابي، وجماهير الأهلي اللي بتقابلني في الشارع عارفة أني أنا مش وحش، وجمهور الأهلي في أسوان عارفاني كويس، وجمهور الزمالك كبير وعظيم، ومش هيبقى في كورة في مصر بدون الزمالك، ومتقلوش الإسماعيلي بيفوت لأنه نادي كبير وطلَّع ناس كبير، ولو هتتهمونا أننا خدنا الدوري بالتفويت خدوه مش عايزينه"، ليعلق عمرو أديب: "خدوا إيه دا الدوري بتاعنا، والحلوة خوخة جت بعد دوخة، دا أنا شعري طار، وجمهور الأهلي بيحبك".
عقوبة شيكابالا
وعلق محمود عبد الرازق شيكابالا قائد فريق الزمالك، على عقوبة اتحاد الكرة ضده بايقافه 8 شهور وغرامة 500 ألف جنيه على خليفة أزمته مع رئيس اتحاد الكرة المهندس أحمد مجاهد.
وقال: "لو قتلت حد في الكورة مش هاخد العقوبة كده، وهي لائحة اتحاد الكرة فيها لو قلت أنت أهلاوي هتوقف 8 شهور، وفيه لاعب مد إيده على مسئول باتحاد الكرة ومتوقفش".
وتابع: "لما حد بلغني بالعقوبة قلت له أنت بتهزر، وهل عقوبتي أصلًا في اللائحة؟ وحصلت وقائع مشابهة ولاعبين مدوا إيديهم على مسئولين بالاتحاد ولم يتم إيقافهم بهذا الشكل، ومسئولو النادي أيضًا مش مصدقين هذا الإيقاف، ويقولون إنه تم إيقافي من قبل رئيس لجنة المسابقات، وقدمنا تظلمًا وننتظر القرار النهائي، وهذه المرة جمهور الزمالك منتظرين، ولن أقبل أن يتم إيقافي وحتى سأصل بشكواي للفيفا، ولم أسب جمهور الأهلي وأن الجمهور يشتم هذا ليس لي علاقة به، وأخذنا الدوري بعرقنا|
أزمة زوجة شيكابالا
قال محمود عبد الرازق شيكابالا لاعب نادي الزمالك: "كنت في أسوان من يومين ومشجع أهلاوي شافني من السطوح جالي ورقص ليا رقصتي الشهيرة".
جماهير الأهلي في أسوان
وتابع: "جمهور الأهلي في أسوان لما بيشوفني بيرقصلي وبيحتفل معايا، وأنا معنديش مشكلة معاهم".
زوجة شيكابالا الكندية
ولفت شيكابالا: "مراتي كندية وكانت متأكدة أننا هناخد الدوري لكنها مستغربة من اللي بيحصل في الرياضة المصرية وخاصة ضدي وضد نادي الزمالك".
وأضاف: "اتجوزت مراتي الكندية في كتب كتاب واحدة صاحبتها، والقصة بدأت لما كان فيه مشكلة إن حد يروح يجيبها من المطار وقتها قلت لهم أشوف صورتها الأول وأشوف أروح أجيبها ولا لأ وقتها عجبتني وقلت لهم هتجوزها وفعلًا روحت جيبتها من المطار واتفاجئت أن أنا مشهور والناس عايزة تتصور معايا، وخلال أسبوع قلت لها عايز أتجوزك وروحت بيها بعد كده أسوان وبعدين أخدت موافقة العائلة عليها".
وتابع: "جيبت مراتي من كندا وقعدتها في مصر.
واقعة سحر
وكشف محمود عبد الرازق شيكابالا نجم نادي الزمالك، عن تعرض الزمالك لواقعة سحر خلال مباريات الدوري.
تحقيق الفوز رغم الأعمال، موضحًا: "أحد العمال في أحد الأندية كان يقوم ببعض الأعمال، وفي النهاية حققنا الفوز".
المباريات الحاسمة
وتابع: "واقعة الأعمال كانت في المباريات السبعة الأخيرة، لم أبلغ اللاعبين بهذه الواقعة من أجل التركيز".
ولفت شيكابالا: "مباراة السوبر اللي في الإمارات كانت الناس بتشتمني وهما اللي بيبدأوا بالغلط وبعدين يلوموا على رد فعلي، وما يشوفوش إن أنا بتشتم وبيدعوا عليا وعلى ابني ومراتي، ياريت يقولوا بس أسود مش يتشالي كلب أسود ويرحوا المقابر".
وتابع: "سأسافر إلى هولندا في مدرسة كرويف لخوض دورة تدريبية، وأحصل على شهادة التدريب، وبعدها سأخوض مجال التدريب، وأمنيتي هي تدريب الزمالك".
خطوة ما بعد الاعتزال
وكشف محمود عبد الرازق شيكابالا نجم نادي الزمالك، عن وجهته بعد اعتزال كرة القدم، مؤكدًا أنه يتمنى تدريب الأبيض.
ولفت إلى أنه لا يزال أمامه عامان على الأقل لاعتزال كرة القدم، ويرى أنه لا يزال قادرًا على العطاء.
الانتقال للأهلي
ورد محمود عبد الرازق شيكابالا نجم نادي الزمالك، على تصريحات فنان عاشق للنادي الأهلي صرح بأنه توسط له من أجل عودته من البرتغال للأهلي.
كما رد نجم نادي الزمالك، على محاولات التقليل من حصول الأبيض على بطولة الدوري للمرة الـ13 على اعتبار فوز الأهلي بنفس البطولة لـ42 مرة.
قال شيكابالا خلال لقائه ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "بتقولوا أخدنا الدوري 42 مرة ما أنت عارف أخدتهم إزاي، ولو الناس بتفوت زي ما هم بيقولوا كان زماننا إحنا 42 دوري وهم 13 دوري".
وعلق عمرو أديب: "جزء كبير من نجاح الأهلي الإدارة المستقرة وروح الفانلة الحمراء والتأمين المادي الجيد"، ليرد شيكابالا: "إحنا عندنا مشاكل مادية كتير ولو اللي عندهم اتوفر في نادي الزمالك مع العدل الكُروي نادي الزمالك هيكون في حتة تانية".
تصريحات فنان أهلاوي
وقال شيكابالا: "فيه فنان أهلاوي قال حاجات محصلتش، وكنت ممكن أطلع وأرد عليه وأقوله أنت كداب، ولكن معملتش كده وجمهور الزمالك عارف إن أنا مش كده"، موضحًا: "الفنان ده قال إنى كنت عايز أرجع النادي الأهلي من البرتغال، وأنا لو عايز أرجع الأهلي على الأقل هكلم حسام غالي أو عماد متعب لأنهم أصحابي وجوا النادي، ولكنه عايز يوصل للناس أنه حامي الحمى بس هو مش كده، ومع الوقت الناس عرفت أن حجمه صغير".
شيكا ومحمد صلاح
كما كشف محمود عبد الرازق شيكابالا نجم نادي الزمالك، عن موقف مؤثر له مع محمد صلاح نجم نادي ليفربول الإنجليزي، خلال كأس العالم.
وقال: "وإحنا في كأس العالم كان أول ماتش لـ محمد صلاح مصاب، وأول ماتش كان قاعد احتياطي علشان كتفه وإحنا في الأتوبيس كل الأحداث عدت قدامه وشريط حياته عدا وتقريبًا كل الأحداث عدت قدامه وإزاي وصلنا كأس عالم وإزاي ساعد مصر توصل كأس عالم وأنا مش هلعب أول ماتش فلقيته بيعيط وهو قاعد ورايا فقمت قايم وقبلت دماغه وقلت له اهدأ الماتشات جاية كتير وهتفرق معانا وإن شاء الله كأس العالم الجاي".
وتابع: "محمد صلاح عظيم ومحافظ على نفسه ومركز في شغله ومبيتكلمش كتير وحقه يطلب 500 ألف استرليني في الأسبوع لأنه هو الوحيد اللى في ليفربول بيعمل الفرق ولو شالوا صلاح مفيش حد يصنع لهم الفرق".
أزمة ميدو
وتطرق محمود عبد الرازق شيكابالا، على أزمته مع أحمد حسام ميدو، نجم منتخب مصر والزمالك السابق، بعد هجوم الأخير عليه وعلى عدد من لاعبي الزمالك عقب سبابهم جماهير النادي الأهلي، عقب انتهاء مباراة الزمالك والإنتاج الحربي والتى شهدت تتويج الفارس الأبيض بالدوري الثالث عشر في تاريخه الكبير.
قال “شيكابالا”: "أنا مش زعلان من ميدو خالص لكنه طلع قال حاجة معجبتنيش فأنا رديت عليه بنفس الأسلوب".
وأضاف: "أنا وميدو عشرة عمر، ومش ممكن تضيع في ثوان".
رسائل شيكابالا
وفي نهاية اللقاء وجَّه محمود عبد الرازق شيكابالا لاعب نادي الزمالك، عددًا من الرسائل لاتحاد الكرة وجماهير الناديين الأهلي والزمالك، وزوجته.
رسالة لاتحاد الكرة
وقال خلال لقائه ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "رسالتي لاتحاد الكرة والمهندس أحمد مجاهد ياريت تنظر لي بعين الأب وأنت الكبير بتاع الكرة، وأنا معملتش حاجة علشان أتوقف 8 شهور".
رسالة لجمهور الأهلي
وأضاف: "جمهور الأهلي الناس المحترمين اللى بقالهم معنديش مشكلة مع حد لو إنتوا مجبتوش سيرتي ولا سيرة ابني ولا مراتي أنا رد فعل، وياريت الدوري المصري ميكونش فيه عنصرية".
انتخابات نادي الزمالك
وعن انتخابات نادي الزمالك المقبلة، علق: "ياريت تساعدوا نادي الزمالك ويستحق يبقى في مكانة أحسن واللاعبين يركزوا في لعباتهم فقط ويحصلوا على مستحقاتهم، ولجنة حسين لبيب حلت الكثير من المشاكل ولكن ده مش كفاية، حبوا نادي الزمالك بس".
رسالة لجمهور الزمالك
ووجه شيكابالا رسالة لجمهور الزمالك: "ياريت أقدر أفرحهم علطول لأنكم تستحقوا وإن شاء الله البطولات اللي جاية، وإن شاء الله ابني يكمل المسيرة وهيبقى زملكاوي وهو لاعب كورة وبيلعب بالقدمين".
رسالة شيكابالا لزوجته
وأكمل: "أشكر مراتي لأنها بتعملي أكل صحي، واتحملت حاجات كتير وبشكرها لأنها بستمع شتيمة ومحدش يقدر يستحملها".
