حجمه صغير وعاوز يبقى حامي الحمى.. شيكابالا يرد على تصريحات فنان توسط له للعودة للأهلي | فيديو

رد محمود عبد الرازق شيكابالا نجم نادي الزمالك، على تصريحات فنان عاشق للنادي الأهلي صرح بأنه توسط له من أجل عودته من البرتغال للأهلي.

شيكابالا: مبتفرجش على ماتشات الأهلي بس بحب أفشة "القاضية ممكن"

شيكابالا عن قرار إيقافه: هصعَّد الموضوع.. وفي لاعيبة مدت إيديهم على مسئولين ومحدش عملهم حاجة

تصريحات فنان أهلاوي

وقال شيكابالا خلال لقائه ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "فيه فنان أهلاوي قال حاجات محصلتش، وكنت ممكن أطلع وأرد عليه وأقوله أنت كداب، ولكن معملتش كده وجمهور الزمالك عارف إن أنا مش كده".

حقيقة طلب شيكابالا الانتقال للنادي الأهلي

وتابع: "الفنان ده قال إنى كنت عايز أرجع النادي الأهلي من البرتغال، وأنا لو عايز أرجع الأهلي على الأقل هكلم حسام غالي أو عماد متعب لأنهم أصحابي وجوا النادي، ولكنه عايز يوصل للناس أنه حامي الحمى بس هو مش كده، ومع الوقت الناس عرفت أن حجمه صغير". 
 

وكان الفنان أحمد فهمي، قال في تصريحات سابقة له مع عمرو أديب ببرنامج "الحكاية": "شيكابالا طلب مني أتوسط له لأنه كان عايز يرجع من البرتغال على النادي الأهلي، وأنا مش عايز أحلف إن ده حصل، وممكن أقول أسماء، ووقتها كلمت هشام العامري أخو الوزير العامري فاروق، وقلت له إحنا عايزين نجيب شيكابالا للأهلي، وهشام قالي يا فهمي إحنا النادي الأهلي وشيكابالا مش لايق على الأهلي، والطلب قوبل بالرفض والموضوع مات، ولم أستغل ذلك لحد ما جاءت مباراة السوبر وشيكابالا غلط في جمهور الأهلي وكنت ضد ما حدث وأنا راجل أهلاوي وبقيت ممثل".

وقال شيكابالا لاعب نادي الزمالك خلال نفس اللقاء: "معنديش مشاكل مع جمهور الأهلي، والمشكلة مش عندي أو عند اللي بيديروا الكورة في مصر، يحدث معي تجاوزات لا تحدث مع لاعب في مصر ويذهبون للمقابر بنعش لي، ولو تم إيقاف مثل هذه الأمور لم نكن سنصل لما نصل له الآن، لما يحدث تجاوزات في الخارج من الجماهير اللاعب لا يتم إيقافه، ولكن هناك رد فعل ضد الجمهور، لو بلعب في ناد آخر لم يكن سيحدث معي ما يحدث، في كل مباراة يحدث معي نفس التجاوز وأنا فقط الذي يتم إيقافي والطرف الآخر لأ، ويحدث معي تجاوزات عنصرية مع أسرتي وزوجتي وابني".

وتابع: "أنا رد فعل على التجاوزات اللي بتحصل ضدي، ومن 20 سنة أنا بس اللي بتوقف مش حد، وبيتعمل ضدي وضد أسرتي وابني ومراتي حاجات  عنصرية".
 

شتائم وإساءات جمهور النادي الأهلي

ولفت شيكابالا: "مباراة السوبر اللي في الإمارات كانت الناس بتشتمني وهما اللي بيبدأوا بالغلط وبعدين يلوموا على رد فعلي، وما يشوفوش إن أنا بتشتم وبيدعوا عليا وعلى ابني ومراتي، ياريت يقولوا بس أسود مش يتشالي كلب أسود ويرحوا المقابر".

حق شيكابالا

وتابع: "أنا باخد حقي بطريقتي طالما مفيش مسؤول بيجيب لي حقي من جمهور الأهلي وتجاوزاتهم ضدي، ومن 20 سنة محدش خد لي حقي ولو حد جابلي حقي مكنتش هرد ولا هتكلم".

مشجع زملكاوي

وأشار: "هم حاسين إنى قبل ما أكون لاعب كورة أنا مشجع للزمالك وواحد من الجماهير علشان كده أنا أكتر واحد بيهاجموني"

عقوبة شيكابالا

وشهدت الأيام الماضية حالة من الجدل القانوني بشأن مصير العقوبة المغلظة، التي صدرت من إدارة المسابقات في اتحاد الكرة الأحد الماضي، في حق محمود عبد الرازق شيكابالا كابتن فريق نادي الزمالك، والتي تقضي بإيقافه 8 شهور، إلى جانب تغريمه 500 ألف جنيه مصري، نظرًا لما بدر منه من سلوك غير رياضي ومحاولة التهجم بالفعل واللفظ ضد رئيس اتحاد الكرة أحمد مجاهد، خلال مراسم تسليم درع الدوري لفريق الزمالك عقب انتهاء مباراته في الجولة الأخيرة أمام البنك الأهلي، والتي أقيمت الجمعة الماضي بإستاد بتروسبورت.

الزمالك يتظلم رسميًا ضد عقوبة شيكابالا 

وأعلن اتحاد الكرة المصري تسلمه رسميًّا، تظلمًا من نادي الزمالك على العقوبات الصادرة ضده من إدارة المسابقات بالاتحاد عن الأحداث التي صاحبت مباراته أمام البنك الأهلي ضمن الجولة الأخيرة لمسابقة الدوري الممتاز.

وأحال الاتحاد المصري لكرة القدم التظلم إلى لجنة الاستئناف بالاتحاد برئاسة المستشار عادل الشوربجي للنظر فيه.