علام: موجة كورونا الرابعة طويلة وصعبة ومتحور دلتا بلس خطورته أعلى
![الاستعداد للموجة](images/no.jpg)
توقع الدكتور محمد علام، النائب السابق للمدير الصحي بمستشفى العزل بمطروح سابقًا، أن موجة كورونا الرابعة طويلة، ومن المحتمل أن تكون أصعب في حالة عدم الالتزام بالإجراءات الاحترازية.
وقال محمد علام: إن التواجد في تجمع عائلي أو حفل بدون تباعد اجتماعي أو كمامة يُعد جريمة في حق الأهل، مؤكدًا أن تجربة الإصابة بفيروس كورونا سيئه جدًا، والمرض حقيقى والموت بسببه حقيقى، والاستهتار بالإجراءات الاحترازية سيكلفنا الكثير.
موجة كورونا الرابعة
أما عن متحور دلتا بلس فقال علام "إعلان وزارة الصحة عن تسجيل حالات مصابة بتحور دلتا بلس فى مصر إعلان مهم جدًا، رغم أنه متأخر شويه لأن الحالات موجودة من أكثر من شهر"
وكتب د. محمد علام تدوينة على الفيس بوك "توقعى أن الموجه القادمه هتبقى طويله وممكن أصعب لو مرجعناش للالتزام والإجراءات الاحترازية فى أسرع وقت مقصدش اغلاق لسه بدرى اقصد الحل الاسهل كمامات وإجراءات احترازية وتباعد مجتمعى، الحاجات اللى اتنست دى".
وقال "لو مش خايف على اهل بيتك وعلى أصحابك، خليك متأكد أن ربنا هيحاسبك لو كنت السبب فى نشر الوباء لحد متعرفوش وتوفى بسببك ومش شرط تكون سبب مباشر للعدوى يكفى انك تكون ناقل للمرض بدون ماتشعر"
نصائح الموجة الرابعة
وأضاف "عندك أعراض برد عادى ومتأكد مليون فى الميه انه برد بعد اذنك اعزل نفسك ولو مضطر تنزل لاي سبب كمامتك متشلهاش نهائى وحافظ على مسافة مع غيرك".
وتابع: "مخالط لحالة إيجابية أو مشتبه بها رجاءا اعزل نفسك واقعد فى بيتك فتره لو مش هتقدر كمامتك ومسافة بينك وبين الناس، مش هتموت على فكره لما ترتاح فى بيتك كام يوم لكن ممكن من غير متحس تكون سبب فى موت انسان تانى".
تجربة صعبة
وأضاف "وجودك حاليًا فى تجمع غير ضرورى أو حفله أو تجمع عائلى بدون تباعد مجتمعى وكمامه جريمه فى حق اهلك وحق غيرك سواء مصاب وانت مش عارف واتسببت فى عدوى حد تانى او انك تتصاب وتصيب اهلك ويمروا بتجربه سيئه وتفقد حد بتحبه".
وقال "اتفسحنا وخرجنا وعملنا حفلات وسهرات ومؤتمرات وافراح وعزومات ممكن بعد اذنكم كفايه ونلتزم شويه محدش قال منعيشش حياتنا لكن بشويه التزام كمامات ومسافات والبعد عن الزحام مش حاجه صعبة".
وعن الإصابة بفيروس كورونا قال علام "تجربه الاصابه سيئه جدًا والله العظيم المرض حقيقى والموت بسببه حقيقى ولو كملنا استهتار هنخسر كتيير واحنا خسرنا بالفعل كتير".
متحور دلتا بلس
وعن متحور دلتا بلس قال علام "اعلان وزارة الصحة عن تسجيل حالات مصابة بمتحور دلتا بلس فى مصر اعلان مهم جدا رغم انه متأخر شويه لان الحالات موجودة من أكثر من شهر".
واضاف "إحنا هنا بنتكلم عن تحور عنده خاصيتين شديدي الخطورة زى ماقلت قبل كده وهما أن معدل انتشاره اكبر بنسبه تصل لمره ونصف وأن أعراضه وخطورته أكبر نسبيا وحتى لو كانت خطورته نفس الفيروس الاصلى فمع زيادة أعداد المصابين بيه بسبب سرعة انتشاره هيكون فى إعداد كبيره محتاجه خدمه صحيه وده هيؤدى للضغط الشديد على المنظومه الصحيه ككل وبناء عليه هيحصل خسائر اكبر وشفنا ده بعنينا".
![](/Upload/libfiles/42/3/567.png)
المصابين بالسلالة الأصلية
وتابع علام "معلومات مهمه قلتها عنه من شهر وهى: سرعة انتشاره ٥٠٪ اكبر من المتحور السابق وفى تقارير بتقول اكتر، يزداد احتياج المصابين بالمتحور دلتا للحجز في المستشفيات بنسبه تصل الى 120% مقارنه بالمصابين بالسلالة الأصلية."
![](/Upload/libfiles/42/3/568.png)
وأوضح أن المصاب بمتحور دلتا بلس "يزداد احتياج المريض المحجوز فى المستشفى للحجز بالعنايه المركزة بنسبة تصل الى 287% مقارنه بالمصابين بالنوع الاصلى (٣اضعاف تقريبا وده رقم ضخم)، أما عن الوفاة فتزيد بنسبة 137% في المتوسط".