تسوس الروح

دخل بيتنطط من الآلم وماسك خده وعمال يصرخ بكلمة واحدة "الحقني"، وأنا مش فاهم ماله أو فيه إيه؟!. بس كل اللي متأكد منه أنه أكيد موجوع والآلم مسيطر عليه بشكل ميحسش بيه غير صاحبه أو اللي عاش نفس التجربة، لكن من بعيد مش قادر أحكم أو أعرف فيه إيه بيوجعه مخليه كدا.

حاولت اهديه شوية وقعد على الكرسي علشان ابتدي أكشف عليه وأعرف مال سنانه أو ضروسه وإيه اللى مخليه بالشكل ده مش قادر يستحمل أو يتكلم ومفيش على لسانه غير كلمة "الحقني".

ومجرد ما فتح علشان أشوف لقيت السوسة واكلة ضرسه وداخلة لحد العصب وده معناها مفيش حل غير أني أموت العصب وأحشي الضرس علشان يخف ويرجع يهدى شوية.

بعد ما اديت حقنة البنج وابتديت استخدم الآلة اللي بنحفر بيها في الضرس وابتديت استخدم حاجة بنطلع بيها العصب من القنوات بتاعته في الضرس قعد يصوت أكتر وحاسس بالآلم كأن البنج مش موجود.

لكن دقايق والآلم مكانش له آثر وحاسس أنه مرتاح وأحسن.. زي الأول ويمكن أحسن من ناحية الراحة.. لكن لما عملتله تركيبة للضرس.. بقى حاسس أن شكلها مش الأول.. مش حاسس أن ده ضرسه اللي عاش بيه لفترة كبيرة.. كأنه ضرس جديد عليه!

وبعد ما كان متضايق مش متقبله، بقى عاجبه جداً وفرحان بيه وبشكله، خلاني افتكر حاجات كتير يمكن مريت بيها كانت تبان صعبة، ويمكن كنت بتأخر في حل المشكلات لحد ما المشكلة تكبر وتاكل في روحي زي السوسة وتدخل جوايا.

لكن بعد ما بتصرف والمشكلة بتتحل.. يمكن آه فكري بيتغير.. يمكن طريقتي بتتغير... لكن أكيد للأحسن..

بكتسب خبرة جديدة ورؤية جديدة تخليني أعيش بشكل أحسن وأفضل من الأول.. الفكرة مش في التجربة نفسها، قد ما بتكون في النعم اللي هتلمسها بعدها. يمكن التجربة بتطول وبتوصل للعصب.. لكن الأكيد إنها لما تخلص، هتفرح بحاجات كتير هتكون اتعلمتها منها.