طبيب سابق بالعزل يحذر: التحور الجديد لكورونا خطر جدًا
![د. محمد علام](images/no.jpg)
حذر الدكتور محمد علام، النائب السابق لمدير مستشفى العزل بمطروح، من تحور فيروس كورونا، موضحًا أن التحور لن يقضي على فيروس كورونا مثلما يشاع من قبل جامعة كاليفورنيا التي أشارت إلي أن التحور الجديد لكورونا سيقضي عليه خلال شهرين، كما حدث في سارس.
وقال علام إن سارس أخطر من كوفيد-19 في الانتشار والتأثير، لكن التعامل مع سارس بالعزل كان أقوي الأمر الذي أدي للتقليل من خطر سارس والانتهاء منه.
وقال علام في تدوينة له على الفيس بوك: "جامعة كالفورنيا التحور الجديد هيقضى على الفيرس خلال شهرين زى محصل مع سارس".
وتابع: "نفس الحديث تكرر فى شهر أبريل مع بداية الحديث عن التحورات اللى بتحصل واتقال إنه هيختفى وبرضو مختفاش وللأسف الوضع بقى اسوأ عالميا".
أضاف علام: "فيرس سارس مختفاش بسبب التحور اللى حصل فيه، دى معلومة غلط من وجهة نظرى، وقد يكون ساعد بطريقة ما لكن مش هو ده السبب الرئيسي.
وتابع: السبب الرئيسي لاختفائه هو نفسه اوجه الاختلاف بينه وبين الكوفيد اللى ساعدت أن إجراءات العزل وتتبع المخالطين تكون سريعة وناجحة".
وأوضح علام "فى السارس الأعراض كانت قوية وبتظهر فى الغالبية بسرعة، والحالات بدون أعراض كانت قليلة جدًا فكان أى شخص خلال يومين لـ 3 أيام فقط من إصابته بتظهر عليه أعراض فبقدر اعزله واعزل المخالطين ليه بسرعة عكس الكوفيد غالبية الحالات بأعراض بسيطة وبتظهر بعد وقت طويل ممكن يوصل لـ 14 يوم من اصابته فالتتبع صعب والعزل اصعب" .
وقال: "بالإضافة أن معدل الوفيات كان وفاة لكل 10 حالات ودى نسبة أعلى بكتير من الكوفيد فالخوف منه كان أكتر وده ساعد فى السيطرة عليه".
وأضاف علام: "الأمل جميل لكن الأمل الكاذب خطر والتحورات الجديدة خطر جدًا إننا نطمن منها وحتى لو كانت ضعيفة ونظرة سريعة على بريطانيا وأمريكا وجنوب أفريقيا هتعرفكم أن الوضع كارثى مع التحور الجديد اللى مفروض أضعف فبلاش تهوين لأن ده مش هيساعد".
ونبه علام قائلًا: "للعلم مركز مكافحة الأمراض فى أمريكا CDC قال إن التحور الجديد ممكن يكون هو المهيمن فى مارس وهيكون السبب فى موجة جديدة فى الربيع ده الكلام الرسمى اللى اتقال عن تحور الفيرس فى امريكا وده فى دولة بتمر باسوأ فترة بقالها شهر وبتحذر من القادم"
واختتم علام: "مبحبش احبط الناس لكن ساعات الاطمئنان الزيادة بيضر مش بيفيد ولازم مراقبة الوضع لمنع وصول تحورات جديدة أو حدوث تحورات جديدة عندنا واتكلمت فى النقطة دى وهتكلم فيها تانى فى بوست قريب مفصل".
![](/content/upload/editor/Image1_1202117104238168673904.jpg)