أنا اتسرقت !

" أنا اتسرقت، أنا اتسرقت " هما دول الكلمتين اللى مكنش لسانى عارف ينطق غيرهم الأسبوع اللى فات بعد الموقف إياه اللى حصلى.
كنت راجع من شغلى فى وقت متأخر وفوجئت بشاب لذيذ بينادى: "يا أستاذ، يا أستاذ " فقولتله: "يا عيون الأستاذ " لأنى مش متعود حد يحترمنى قوى كدا فى الشارع.

المهم..  قالى إنت ضاع منك حاجة ؟ بسرعة تحسست جيوبى لقيت موبايلاتى موجودة ولقيت المحفظة وظرف المرتب اللى حفيت طول الشهر عشان أحصل عليه، بعدها بصيت ليه بابتسامة وقولتله لا ياسيدى مش ضايع منى حاجة، فقال يا باشا دور كويس، قولتله لا، فقالى طيب إنت معاك فلوس صحيحة ؟ فقولتله آه معايا، قالى طيب ال100 جنيه دى أنا لسة لاقيها هنا وبصراحة إنت الشخص الوحيد اللى عدى من قدامى فأكيد بتعتك روحت مطلع الظرف المحترم اللى معايا وبدأت أعد فى الفلوس قدامه وكل لما أعد 100 الواد يبرقلى بعنيه وودانه تطول .

بعدها قولتله لأ فلوسى تمام، قالى بص إنت شكلك مش مركز خدها وراجع نفسك لو لاقيتها بتاعتك خدها ولو مش ناقصة حطها فى أقرب مسجد بس بالله عليك ياشيخ اوعى تقبلها على نفسك، فأنا الدم جرى فى عروقى وقولتله: إنت بتقول إيه ياعم، أقبل إيه ورحت رازع الكلمتين اللى متعودين نقولهم كمصرين فى الوقت ده "إنت مش عارف بتكلم مين؟!" فقالى العفو، أنا راجل محترم وخريج الأزهر وعارف ربنا كويس وإنت يا باشا شكلك راجل محترم... أيوا كدا اتعدل، دار بينا نقاش طويل حولين "ياعم خد الفلوس وأنا أقول لأ " المهم فقالى بس انت ياباشا شايل فلوس كتير وفلوسك فى كل حتة، حبة فى المحفظة وشوية فى ظرف دا غير اللى فى جيوبك، بص لازم تحط فلوسك كلها فى مكان واحد زى كدا... وراح واخد منى المحفظة وقالى هات الظرف بقة وحطه فى المحفظة وانا بسذاجة لأول مرة اكتشفها عندى، إديته الظرف... وهوبااا راح سايبنى وجارى وواخد الظرف اللى كان فيه شقى شهر بحاله "أنا عارف كلكم عايزين تعرفوا كام بس خلاص أهو اتسرقت "، بعدها وقفت مش عارف أعمل إيه، أخدت نفسى وروحت البيت وانا أردد جملة "أنا اتسرقت أنا اتسرقت" فضلت زعلان شوية لكن لما فكرت فى الموضوع لاقيت إن أبويا وجدى بيتسرقوا من أكتر من 30 سنة ومبيتكلموش، وأنا اتولدت لاقيت نفسى بتسرق ومتكلمتش ولا زعلت... دا أنا عملت ثورة واتسرقت ووقفت ساكت، ولا اتكلمت ولا حتى عاتبت اللى سرقها مع إنى أعرفه كويس ودايما واقف قدام عينى. يبقى ليه أزعل من الحرامى اللى سرقنى وجرى، مع إنه سرق عشان محتاج فى الوقت اللى مزعلتش من الناس اللى كانت بتسرقنى وهى مش محتاجة، بالعكس دى كانت ساكنة فى قصور، تعرفوا إيه الشبه بين الشاب اللى سرقنى وبين اللى سرقوا الثورة، إن الاتنين سرقونى باسم الدين، ألا دين أبوهم اسموا إيه؟!