السيسي لمخالفي البناء: تدفعوا كويس نصلح مظبوط.. عدم إصدار تراخيص بناء في بعض المناطق بالقاهرة.. ونزع ملكية الجراجات المغلقة
أكد الرئيس عبد الفتاح السيسي أن وقف إصدار تراخيص البناء الفترة الحالية أمن قومي ومصلحة وطنية.
وأشار الرئيس السيسى إلى عدم إصدار تراخيص بناء فى بعض المناطق بمحافظة القاهرة وقال: عملنا إيقاف للبناء هل كرها فى الناس ولا تضييق عليهم ولا علشان مبنحبش مصلحتهم إحنا عملنا كده علشان لابد من مراجعة الكثافة الموجودة فيها علشان الناس تقدر تعيش بشكل مناسب كحد ادنى وبالتالى فيه أماكن فى القاهرة لن يصدر لها ترخيص مرة أخرى.. واشتراطات المبانى كانت بتقول 7 أدوار هيبقى دورين بس.
وأضاف الرئيس السيسى، أن الدولة لن تتهاون مرة أخرى مع البناء غير المخطط أو المخالف.
البناء غير المخطط
وقال الرئيس السيسي: خلونا نتوقف عن البناء غير المخطط ونبدأ ننظم بلدنا.. وكل اللى عاوز شقق يأخد شقق.. والناس اللى عاوزه تأخد وتبيع للناس.. بصراحة هنكون حازمين.. واشتراطات البناء ستكون فى منتهى الحزم والقسوة.. ومش هنقدر نستحمل كده.. واستحملنا العشر السنوات.
وتابع الرئيس حديثه: "عايز اقولكم على حاجة.. عاوزين نوصل الطريق بتاع الوفاء والأمل حتى طريق السويس.. وكل الطرق اللى بنتكلم عليها طبقا لخطة الدولة القومية.. ودى حاجة معمولة فى مصر من 20 و30 سنة فاتوا.. عايزين ألفين وحدة لتنفيذ طريق مساحته 2 كيلو.. وهيبقى صلابة وشدة من الأجهزة من التنمية المحلية.. هدفنا حماية وطن من أننا نعيش كده.. ونسينا الصح والحياة الحقيقية للبشر.
وأضاف الرئيس: هيبقى عافية وجبر، لا الموضوع مش كده، ولكن لازم نحل المسألة عن طريق اللى احنا وصلناله كفاية عليه"، والقرار ده اتأخر 20 سنة".
ووجه الرئيس السيسى، الشكر للبنوك وصندوق تحيا مصر لمساهماتهم فى مشروعات الإسكان، وكذلك وزارة الإسكان وهيئة المجتمعات العمرانية، وتحملها العبء الأكبر للخروج بالمشهد المشرف.
وقال الرئيس: فيه مناطق إسكان اسمها زلزال واحد، وزلزال 2 وزلزال 3 .. أوضتين و أوضة وصالة.. ونريد فتح الباب لهم للتقدم على شقق بمبالغ معقولة، بحيث أعرف أقول لوزير الدفاع زى ما أعطيتنا الأرض دى، عاوزين حتة أرض تانى من معسكرات الجيش لأجل الـ 22 ألف وحدة.. لو عاوزين يغيروا لسكن أفضل ممكن نعملهم نظم تمويل، ولو قدرنا نعمل إحلال لمنشآتهم هيكون أفضل".
وتابع: "أى إنسان يحتاج شقة إحنا نوعده بفضل الله سبحانه وتعالى بتوفيرها، ومش بنخلف وعودنا وهنوفر له الشقة".
وأكد الرئيس السيسى ضرورة عدم وجود بناء مخالف مرة أخرى، وأن أجهزة الدولة لن تسمح بذلك الأمر مرة أخرى قائلا ازاى يكون فى الإسكندرية واحد عليه 88 مخالفة.. وواحد عليه 60 مخالفة.. وحد يعمل 23 عمارة بارتفاع 20 دور على أرض لا تخصه".
وأضاف الرئيس السيسى: الدولة موجودة والمحافظة موجودة والداخلية موجودة والقوات المسلحة موجودة.. وحقك أن محدش يغتصب أرض بلدك ومحدش يبنى عليها.. احنا دولة هنبقى دولة مظبوطة، وهناك فئة قليلة حصلت على مكاسب، وهتدفع كويس.. هتدفعوا كويس علشان التعويض ونقدر نصلح اللى حصل.. هاخد مظبوط علشان نصلح مظبوط.. وازاى شارع عرضه مرتين ولا متر نص ويكون فيه عمارة كبيرة ولو حصل حريقة مش نعرف ندخل".
الأسمرات 3
جاء ذلك خلال افتتاح الرئيس السيسي اليوم عددا من المشروعات القومية من بينها المرحلة الثالثة من سلسلة إسكان الأسمرات وهي "الأسمرات ٣" والتي تضم آلاف الوحدات السكنية الكاملة الخدمات والمرافق، بالإضافة إلى افتتاح أكبر مجمع للخدمات يستطيع أن يلبي مطالب نحو 100 ألف نسمة يقطنون مشروع الأسمرات بمراحله الثلاث.
ويهدف المشروع إلى نقل وتسكين الأسر والأهالى من قاطنى العشوائيات والمناطق الخطرة داخل مجمع سكنى حديث يوفر لهم واقعا مجتمعيا جديدا به جميع الخدمات السكنية والمجتمعية على نحو متكامل.
