كابتن ماجد يكتب: يعنى إيه زمالك

هل سيكتمل الدوري رغم الكورونا؟!
آه طبعا هيكتمل وسوف نتخذ كافة الإجراءات الوقائية، بس دى تكلفتها كبيرة على الأندية..
مش كفاية اللى خسرته أثناء فترة التوقف؟!
لا ماتقلقش.. اتحاد الكورة هو اللى هيتحمل تكاليف الإجراءات وأخذ المسحات وكل الحركات
يا راجل.. هو اتحاد الكورة لاقى ياكل أصلا؟!
لا ماتقلقش أصل وزارة الشباب والرياضة هتتحمل الجزء الأكبر من التكلفة
يا راجل عيب عليك.. هي ميزانية وزارة الشباب تسمح بالملايين دى كلها؟!
عادى يا عمنا ماهى هتاخد من موازنة الدولة
آه قلتلى بقا.. يعنى كله على حسابنا احنا؟!
بالضبط كده
طب إحنا إيه اللى هيعود علينا من كل ده!!
اللى هيعود علينا إن الأهلي هياخد الدوري يا بنى آدم، وبالتالى انت هتفرح وتشهيص
طب والزمالك؟!
يعنى إيه زمالك؟!
الفريق اللى في المركز الرابع يا جدع
آآآآآآه.. لا ده هيتحرق دمه وبرضو انت هتفرح وتشهيص
بس أنت كده مش عامل حساب الزمالكاوية خالص يا مان!!
يعنى إيه زمالكاوية؟!
لا ولا حاجة.. ما تشغلش بالك يا معلم.. كمل الدوري وكلنا وراك.