"دى الإنجازات".. قصيدة لسلمى عبدالعال كحيل
فوقوا يامصريين عدوا الإنجازات
من يوم ما مرسى حكمكم وانتوا فى معجزات
تحبوا اعدهالكم من غير مزايدات
أول ما مسكها مرسى وعدنا ألف وعد
وعدنا بالوحدة وبعدنا عن بعض
وعدنا بالحرية والحق ملوش سواه
لقـــينا بلطــجية تكمـــيم الأفـواه
وعدنا بالإنتاج ونعلى الصادرات
سافر بعض البلاد يجيب تبرعات
دى الإنجازات؟؟
وحرية الإعلام من صحف ومجلات
حبــــست مذيعـــين وقــفلت قنـــوات
وحكومة حرة نزيهة تحل المشكلات
لكن حكومتك نايمة وزرائها فى أجازات
دى الإنجازات؟؟
وعدت بكوادر وزيادة مرتبات
لقينا قانون ضرائب خالى من الاعفاءات
وعدنا ب100 يوم لحل المشكلات
لقينا النهضة رايحة لمشروع الأزمات
دى الإنجازات؟؟
وعدت بوقف دم وكفاية اللى مات
لقينا الدم سال لشباب بالمئات
طلعت فى خطاب بشوية اعتذارات
وعدنا يبقى رئيسنا والثورة مش هتضيع
لقينا واحد حاكم فى الأصل اسمه بديع
دى الإنجازات؟؟
وأهم الوعود وعدنا بالحوارات
لا حد قال حوار ولا كلمة من عبارات
وعدنا بدولة حرة من غير انتهاكات
شوفنا دولة تانية دولة ميليشيات
واللى وفيت بيه شوية خطابات
تطلع تقول الكلمة وننام على تهديدات
دى الإنجازات؟؟
ودى بعض الوعود وفيت أى وعد
غير انك ظلمت وبنيت ألف سد
ما شاء الله عليك ياريس بالوعد وفيت
خليت الظلم يصحى والحزن فى كل بيت
ونسيت دم الشهيد وعلى شعبك جنيت
دى الإنجازات؟؟
وده تقريرك ياريس بعد 6 شهور
قولى هتعمل إيه عشان العجلة تدور
لا هتدور من برلمان ولا حتى من دستور
دى كانت كل مادة قبل ما احنا نثور
بتلف ع جماعتك واحد واحد بالدور
وبعد ما كنت مرسى بقيت ديكتاتور
دى الإنجازات؟؟
ودى وصية منى يارئيس الإنجازات
اوعى تخلى مصر دولة ميليشيات
لتقوم عليك ثورة بالحى واللى مات
الله يجازيك يا ريس يا بتاع الإنجازات!!!
ــــــــــــــــــــــــــــــــــــــــــــــــــــــــــــــــــــــــــــــ
شاعرة شابة
