النص الكامل لمقابلة نجيب ساويرس مع برنامج "نيوز ميكر"

- يجب عودة الحياة الاقتصادية لطبيعتها مع أخذ كافة التدابير الصحية

- كورونا أخذ زخمًا إعلاميًا وحدثت حالة من الرعب المبالغ فيها لدى الناس

- فلوسي مش هتتهز بالقعاد في البيت لكن نفسيتي هتتعب

- هذه هي طريقة حل معادلة الحفاظ على صحة الناس مع استمرار عجلة الإنتاج بالدوران.. أخويا وابنه اتصابوا بكورونا وخفوا منه

- لم نخفض رواتب العاملين في شركاتنا.. وهناك منشآت اضطرت لتسريح العمال

- لا بد من رفع الحظر في مصر والتعايش مع كورونا مع أخذ كافة الاحتياطات الوقائية

– التزام المواطن المصري بالإجراءات الصحية "صفر" وإحنا كشعب متوكلين على الله

- السنة الجاية هتكون سنة كبيسة بسبب الخسائر.. وهذا هو الوجه الإيجابي لكورونا

- البرنس أفضل عمل درامي في رمضان.. وهذا سر نجاح محمد رمضان

- لن أعود للمجال السياسي من جديد.. وهذا هو الفارق بين ثورتي 25 يناير و30 يونيو

– تويتر خلق مساحة التعارف على أشخاص جديدة.. وأنا بطبعي مش بحب النكد

أكد رجل الأعمال المهندس نجيب ساويرس أن الحياة الاقتصادية لا بد أن تعود للعمل مرة أخرى مع أخذ كافة التدابير والاحتياطات الوقائية التي تمنع من تفشي فيروس كورونا المستجد ، مشيرًا إلى أن الوضع الحالي يفرض التعايش مع الفيروس مع أخذ كافة الأساليب الوقائية. 

وأضاف "ساويرس" خلال مقابلته في برنامج "نيوز ميكر" المذاع على شبكة "RT" أن الشعب المصري لم يلتزم أغلبيته بالإجراءات الوقائية مرجعًا السبب في ذلك إلى طبيعة المواطن المصري وأنه دائم التوكل على الله ، نافيًا أن يكون الأمر له علاقة بتفشي ظاهرة الفقر بين أفراد المجتمع.

كما تطرق "ساويرس" خلال اللقاء إلى عدة موضوعات أهمها تجارة النفط والتعامل مع فيروس كورونا وتجرِبته في الحياة السياسية ، كما تحدث عن أهم الأعمال الدرامية التي يتابعها في شهر رمضان وعلاقته بالجمهور على "تويتر" .

وإلى النص الكامل للحوار..

- في البداية.. كانت هناك تصريحات لكم أثارت ضجة كبيرة في مصر بسبب دعوتكم لعودة النشاط الاقتصادي في ظل الأزمة كورونا؟ 

الحقيقة نحن أمام واقع يفرض علينا حتى الآن عدم وجود دواء لهذا الوباء ، فهل يعقل أن نحبس الناس في بيوتها لمدة شهور وسنين من غير شغل ، وده هيترتب عليه أن الناس مش هتموت من غير كورونا دي هتموت من الفقر والجوع والحالات النفسية ، واللي أنا قولته إنه في ظل التفسيرات الكتيرة اللي كل شوية يتكلم وكل من هب وده بيطلع يقول رأيه أننا نرجع بطريقة علمية مع الأخذ بكافة الاحتياطات الوقائية.

- ما هي الطريقة السلمية لعودة النشاط الاقتصادى من وجهة نظرك؟

 أنا قولت إننا كناس متعلمين لازم نفكر بطريقة علمية مع الاستعانة بالمتخصصين ، إزاي نرجع للعمل تاني بطريقة علمية ومظبوطة زي إننا نرجع والناس تلبس كمامات ونلتزم بترك مسافات متباعدة بين الناس ، بالإضافة إلى أننا نعقم أجهزة التكييف كلها ونعقم المكاتب ونعمل اللي علينا ، وفي حالة إذا مرض أحد العمال إحنا لازم نلزم من هم فوق الـ60 سنة أن يلتزموا بيوتهم وكذلك الحال لأصحاب الأمراض المستعصية والأمراض المزمنة ، إنما متوقفش الدنيا ، وإحنا بنحارب المرض ده إننا بنحارب الناموس كده وبنضرب عليه مدافع.

- هناك مَن يرى أنكم تقللون من خطورة الفيروس من خلال المقارنة بأعداد المصابين من بأعداد المصابين بالإنفلونزا العادية.

دعينا نعتبر أن عدد الإصابات التي تعلن هي حقيقة ولدينا 500 إصابة في اليوم و20 حالة وفاة ، فأولًا الوفيات دي أكثر من 91% منها هم لأشخاص تتعدى أعمارهم الـ80 أو 85 عامًا ، فعلى افتراض أن في 500 إصابة كمان لناس خايفة تبلغ ، فإحنا عندنا ألف إصابة في بلد فيها 100 مليون شخص ، ولو شفنا هنلاقي إن الحجز الصحي تم للمثقفين بس لكن الناس العادية بتنزل الصبح عادي والمواصلات بتكون زحمة ، فلو المرض ده انتشر بالطريقة اللي بيقولوا عليها كان زمان عندنا مش 500 حالة إصابة ده كان عندنا 10 آلاف أو 20 ألف إصابة في اليوم زي إنجلترا ، وفي نفس الوقت حد حسب كام حالة إصابة بإنفلونزا عادية بتيجي للناس في الشتاء بتأكيد عدد الإصابة بها أعلى نسبة والوفيات فيها أعلى.

- هل ترى أن هناك تضخيمًا من الإعلام في حجم المرض؟

المرض ده خد زخم إعلامي خاصة وأنه بيصيب ناس مشهورين ، وبالتالي بدأت الناس كلها تترعب وحصلت حالة من الرعب اللي في رأيي الشخصي مبالغ فيها ، واللي أنا بقوله إننا كناس مثقفين إزاي ناخد أكثر الاحتياطات زي الناس تغسل يديها دايمًا ونحط مطهرات في المكاتب ونعقمها ونعقم التكييفيات ونرجع نشتغل تاني.

- البعض يرى أن نجيب ساويرس خائف على حجم ثروته من التأثر من كورونا؟

أنا فلوسي مش هتتهز بالقعاد في البيت لكن اللي بتتهز هي نفسيتي لأني راجل مش بعرف أقعد من غير شغل ، والشغل والعمل ده جزء من حياتي.

هل تعني أنك لا تخاف من فيروس كورونا؟

أنا أساسًا لا أخاف من أي شيء إلا ربنا.

- برأيك كيف يمكن حل معادلة الحفاظ على صحة المواطن مع الإبقاء على عمل عجلة الإنتاج في الوقت الذي ما يزال الفيروس فيه متفشيًا؟

هذا يتم عبر عدد من الإجراءات الوقائية أولها أن كبار السن يمتنعون عن الخروج من المنزل لأنهم أكثر قابلية للإصابة بالمرض ، ثانيًا أن الناس لما ترجع العمل ترجع بوعي جديد يتطلب منها إجراءات وقائية منها ترك مسافة آمنة بينهم ، وتعقيم المكاتب والمداومة على غسل الأيدي باستمرار ، وفي حالة إذا أصيب أحد بالفيروس ينتقل لتلقي العلاج ويلتزم فترة الحجر الصحي ونقوم بالكشف على الأشخاص الذين خالطوا ، وفي الحقيقة لا بد من توسع رقعة الكشف على الإصابة بالفيروس.

- حدثنا عن كواليس إصابة أخيك بفيروس كورونا؟

هو كان رايح سويسرا علشان يعمل عملية فلما راح كشفوا عليه لقوا عنده كورونا ، وهناك ادولوه دواء جديدًا كان نازل للتعامل على المرض جربه فخف في ثلاثة أيام ، وابنه أصيب منه وتعافى أيضًا.

- كرجل أعمال.. كيف تقيم آثار فيروس كورونا على الاقتصاد المصري حتى الآن؟

إحنا اللي نفعنا إننا مشينا على نمو 5% و 6% ولما تأثرنا بفيروس كورونا نزلنا لـ2% وفي دول حولينا حالتها وحشة لأنها كانت تعتمد على البترول والبترول حاليًا سعره نزل ، وفيه دول نزل النمو السلبي وفيه دول زي لبنان وصل لـ50 و 60% سلبي ، فالفيروس أثر على مصر بالفعل لكن تأثيره قليل جدًا الحمد لله بالنسبة لدول كتير.

- من منظور اقتصادي.. متى يجب رفع الحظر في مصر وهل ترى أي مؤشرات تسمح بذلك؟

أنا رأيي الشخصي أنه كان يتم من إمبارح لأننا في الأول كان عدد الإصابات عندنا 300 حالة في اليوم وصلنا حاليًا لـ500 حالة في اليوم الواحد ، وفيه فرق لما بنقول إننا نفتح بس منرجعش بنفس الفكر اللي كان الأول لازم نغير في طريقة تعاملنا في المطاعم مثلًا لازم تغير من نظامها بحيث إن تتخذ التدابير اللازمة والحياة ترجع تاني.

وأنا بقول إن 500 حالة في اليوم على 100 مليون شخص ، هنوصل لمعدل 15 ألف إصابة في الشهر بالنظر إلى حجم تعداد السكان اللي هو 100 مليون بالإضافة إلى أن نسبة الوفيات قليلة وقد تكون لأسباب أخرى غير فيروس كورونا.

- ما حجم تأثير فيروس كورونا على مشروعاتكم الاقتصادية وهل اضطررتم لاتخاذ إجراءات صارمة للتقليل من الخسائر؟

إحنا مخفضناش الأجور على الإطلاق وقلنا الناس تشغل من البيت على أساس أن فترة المرض اللي هي شهر أو اتنين يمكن تجاوزها لكن مجالات أخرى عند أخويا مثلًا زي الفنادق المغلقة من شهرين أو ثلاثة ، هو قرر عدم تخفيض الرواتب أيضًا لكن فيه بعض الفنادق خفضت المرتبات للنص وفيه للربع وفيه اللي استغنى عن العمال لأنه لو استمر بالشكل ده يعلن إفلاسه.

هناك مؤشرات تقول إن فيروس كورونا ستطول فترة إقامته في مصر.. فماذا ستفعل في هذه الحالة؟

أنا علشان كدة  لازم نرجع نشتغل وأن بقول إننا مخلصناش منه ولا هنلخص ولا ليه دواء فعلينا التعايش معه.

- برأيك ما مدى التزام المواطن المصري بإجراءات الوقاية من الوباء؟

للأسف صفر ، الالتزام سيئ جدًا ، الناس المثقفين واللي مدركين حجم المرض هما اللي ملتزمين ، والتزامهم ده يجبرهم على تحمل مصاريف إضافية لكن 80% من باقي الناس مفيش التزام ، ولو على المناظر اللي بتكون في المواصلات العامة لو صحيح الفيروس ده انتشر بالطريقة دي إحنا المفروض يكون عندنا في اليوم 100 ألف إصابة.

- بماذا تفسر حالة عدم الالتزام لدى المواطن بالإجراءات وهل الأمر له علاقة بتفشي الفقر في المجتمع؟

إحنا طبيعتنا كمصريين إننا متوكلين على الله ، وعندنا التوكل ده في كل حاجة فالناس مثلًا في الشوارع بيعدوا بين العربيات في الطريق من غير التزام بأماكن مرور المشاة.

- هل ترى جدوى من وجود وزير للفقر كما طالبتم قبل كذلك في ظل الظروف الراهنة؟

إحنا المفروض نحارب الفقر من بدري ، وتوقيت الإعلان عنه في الوقت الحالي مش هيلاقي صدى لأن الجميع لديه حالة رعب من هذا المرض لكن ده وقت محتاج منا أننا نتكاتف مع بعض ، وأنا على المستوى الشخصي أساعد بكل الطرق الممكنة مع أجهزة الدولة ومع وزير الصحة. 

- ما الذي يدفعكم للإشادة المتكررة بتعامل الحكومة السويدية مع ملف كورونا؟ 

هما هناك فاتحين الشغل عادي جدًا ومنعوا الناس الكبار أنهم ينزلوا ، وعاملين الحاجات اللي أنا قلت عليها بالظبط ، ولو قارنا هنلاقي عدد الإصابات اللي كانت عددهم لم تتجاوز عدد إصابات دولة زي إيطاليا التي قررت تقفل الدنيا كلها.

- هل ترى أن التجرِبة السويدية مع الفيروس قابلة لتطبيق في مصر وفي الدول العربية؟

هي بالفعل مطبقة في مصر ومعظم المشروعات الإنشائية شغالة بس إحنا بنعمل كده علشان الناس متقعدش تنتقدنا وتقول علينا إننا مش مطبقين تعليمات منظمة الصحة العالمية وأننا نعاني من الإهمال.

- كيف تقيم حزمة الإجراءات الاقتصادية المتخذة من قِبل الحكومة المصرية؟ 

هي كلها إجراءات كويسة ما عدا إجراءات أنا اعترض عليها وهي إن الـ20 مليار الخاصين بدعم البورصة ملهمش استخدام لأن في الحقيقة إحنا بندعم شركات على الورق لأن الشركات دي طالما العمال والإنتاج مرجعش يشتغل هيفضل سهمها في النازل وبالتالي مفيش فايدة في شراء أو دعم الأسهم بتاعتها ، وكان لازم الفلوس دي تتوجه للعاملين الذين يفقدون وظائفهم.

- ما اقتراحاتكم لدعم قطاع مثل قطاع السياحة والمجالات المتعلقة به مثل الطيران؟

أنا بقترح أننا نعيد فتح كل حاجة مع أخذ كافة الاحتياطات ، والطيران يفتح بنسبة 50% في الأول ونسيب كرسي فاضي بين كل اتنين ، وده يكون بشكل مؤقت لحين معرفة طريقة التعقيم ، وبالنسبة للمطاعم تفتح برضو وتاخد الاحتياطات ومنها أنها تباعد المسافات بين الترابيزات ، وكذلك الحال بالنسبة للفنادق ، ويمكن رفع سعر الغرف لاستقطاع جزء منها لصرفها على عملية التعقيم الذي يتم بشكل مستمر ، وأنا وجهة نظري أننا ناخد الاحتياطات اللازمة ونفتح لأن الموضوع مش هيخلص، وخلينا نتصور أننا قفلنا الوضع كده سنة هنلاقي نص دول العالم أفلست.

- كيف ترى تأثير كورونا على العام القادم؟

السنة الجاية هتكون سنة كبيسة لأن عجلة الإنتاج محملة بخسائر وعلشان تعوض هيكون فيه إجراءات كتير.

- ما تصوركم للوضع بعد انتهاء أزمة كورونا؟

ولا حاجة فالحياة ستعود ، أنا من رأيي أننا هنعيش بمعايير جديدة فقط زي ما نسلمش على بعض باليد ويكون مفيش أحضان مثلًا وبعض الإجراءات البسيطة.

- ما رأيكم في مقولة.. الأزمة هي فرصة؟

هي فيها فرص اقتصادية فمثلًا الفنادق دلوقتي بتتباع بنص التمن وشركات الطيران دلوقتي تقدري تشتريها بدولار ، بس تاخدها بالديون اللي عليها ، وأنا مش عاوز أشتري شركة طيران علشان محدش يعتقد ده.

- هل ترى أي وجه إيجابي من فيروس كورونا؟

الحقيقة أن في حاجات حلوة جت من كورونا زي أن الأسر بدأت تتكلم تاني ، وافتكرنا ربنا من تاني ، واللي مكنش بيصلي زي حالاتي رجع يصلي تاني ، وحصل تكاتف بين مؤسسات الدولة المختلفة.

- كيف ترى مستقبل الأنظمة الرأسمالية بعد كورونا؟

ولا حاجة زي ما هي ولازم ما نصدقش الكلام اللي بيتقال.

- بالانتقال إلى ملف النفط.. كيف ترى التقلبات الحالية في أسعار النفط؟

إحنا عندنا نوعين من استخراج البترول الأول وهو الصخري وده تكلفته 40 دولارًا ، وده توقف تماسكا والبنوك أحجمت عن تمويله ، وفي استخراج العادي وده بيتكلف 30 دولارًا وفيه جزء كبير منه قفلوا ، وفي ظل الكورونا مفيش استهلاك زي الأول ، ومع افتراض عودة الحياة الاقتصادية إلى طبيعتها هيكون المعروض أقل من المطلوب.

- لماذا تقولون إن حرب النفط التي دارت بين السعودية وروسيا كانت محاولة محسوبة من أجل طرد شركات النفط الصخري الأمريكية من السوق؟

أنا قلت كده لأن مليهاش تفسير تانى ، دلوقتى إنت تضر نفسك وعندك سلعة والمفروض تبيع بـ60 دولارًا وخلينا السعر نزل وبقى بـ 30 دولارًا ، فالسؤال هنا ليه؟ وإلا أن الواحد هنا عاوز يخلص من المضايقات التي تحصل.

- لماذا تشجع دائمًا على الاستثمار في الذهب؟

لأنه ملازم آمن في كل الأزمات فمثلًا أزمة زي الكورونا كل حاجة بتنزل وهو بيطلع فهو ملاذ آمن في كل الأحوال.

- كيف تقضي يومك في الحجر الصحي؟

أصحي الصبح أقرأ الجرائد ، وبعدين بشوف شغلي ، وأزور أهلي طول الوقت لأنهم كبار في السن ، وأتغدى معاهم ، بتتفرج على المسلسلات ، وبعمل رياضة ساعة في اليوم بمشي فيها ، وبسمع موسيقى ، لكن كل ده لا يعوضني عن الرجوع لمكتبي.

- ما هي أفضل الأعمال الفنية التي تشاهدها في رمضان.. ولماذا؟

أنا كتبت على تويتر قبل كده أن مسلسل "البرنس" هو أفضل عمل هذا العام لأن قصته حلوة جدًا وشيقة ، والسيناريو هايل جدًا لأنه فيه معانى كتير من المعانى المصرية ، وفيه فكرة الصراع بين الخير والشر ، والتمثيل من النجوم هايل جدًا زي محمد رمضان وروجينا وأحمد زاهر.

- هل تحب محمد رمضان؟

أحبه جدًا وهو صاحبي ، وأنا أحبه لأنه جه من حتة بعيدة خالص وطلع جامد جدًا ، وعمل إستايل خاص بيه يمكن يكون إستايل مستفز للناس ، وأنا دايمًا ليا رأي أن الواحد بينجح بطريقته ، والناس في جميع الأحوال مش بيعجبها حاجة.

- ما سر نشاطك على وسائل التواصل الاجتماعي وخاصة "تويتر"؟

تويتر خلق مناخ أن الواحد يتعرف على ناس جديدة كل يوم ، ويسمع آراء تانية فهو وسيلة سهلة وسريعة بالإضافة أني بحب الناس وبحب أكون موجود وسط ناس كتير ، فتويتر وفَّر لي الخاصية دي.

- هل يمكن أن نرى نجيب ساويرس في السياسة قريبًا؟

لا خلاص ، وأنا دخلت السياسة لأن كان فيه تيار معين بيهدد إنه ياخد البلد في سكة أنا مكنتش موافق عليها ومتخوف من تباعتها فدخلت السياسة علشان كده ، ولما خلصنا منهم مشيت.

- هل أنت نادم على المشاركة في مجلس حكماء ثورة 25 يناير؟

لا إطلاقًا وإحنا كنا هننجح لولا بعض الأغراض الشخصية عند كذا حد ، هي اللي شلت المشروع ، والرئيس مبارك لو كان استقال وسلِّم اللواء عمر سليمان الحكم وكنا عملنا فترة انتقالية مكناش دخلنا في الدوامة اللي حصلت.

- ما الفرق بين مصر بعد ثورة 25 يناير ومصر بعد فترة ثورة 30 يونيو؟

ثورة 25 يناير أعقبها فوضى كتير جدًا وانتقام ونفوس وحشة كتير طلعت من وراها لكن في نفس الوقت فجرت معانى كتير جيدة منها الحرية والعدالة الاجتماعية ، والشباب كان عنده أمل كبير جدًا أنه يشوف مصر في أحسن صورة ، و30 يونيو كانت ثورة الخلاص من قوى الظلام ، والناس اللي كانوا موجودين كانوا هيلبسونا في الحيط وكانوا هيرجعونا للقرن الـ15 رغم أنهم أخذوا فرصة أنهم يجددوا وثبت فشلهم الذريع ده وثبت تسلطهم على الحرية ، واعتبروا أن المسلم لو مش إخواني يبقى مش مسلم.

- ما الذي يضيفه مهرجان الجونة للساحة الفنية.. وأنتم تتحمسون له؟

بيضيف الفرح لأن السينما صناعة الفرح ، ويزود الجرعة الفنية والسينمائية ، وبنعمل نوع من الجذب السياحي غير العادي ، ونشع صناعة السينما نفسها ، وبمول أفلام مكنتش لاقية تمويل.

- لماذا تكره النكد وتحب السعادة؟

ده سؤال.. أنا بحب السعادة وإحنا كمصريين عندنا حاجة ربنا ادهلنا وأنا أتحدى أن يكون فيه شعب تاني على المستوى العالم دمه أخف من المصريين.