رامي جمال عن تطاول حياة الفهد: كورونا أظهر أخلاق الشعوب والصوت العالي مش واجهة لبلده
علَّق المطرب رامي جمال، على تصريحات الفنانة الكويتية حياة الفهد، والتي طالبت فيها بطرد الوافدين من دولة الكويت، على خلفية أزمة فيروس كورونا.
وكتب رامي جمال عبر صفحته الشخصية على موقع التواصل الاجتماعي "فيس بوك" قائلًا: "وجهة نظري أن أزمة كورونا أظهرت حقيقة كل الدول وحقيقة أخلاق الشعوب.. يعني سمعنا عن دول استولت على معدات ومنتجات طبية كانت مساعدة لدول تانية ودي دول كانت حلم لشباب كتير أنهم يسافروا لها.. شفنا دول الاتحاد الأوروبي وهي تتبادل الاتهامات واللي أعتقد أنهم بعد الأزمة هيرجعوا دول منفصلة زي زمان".
"حياة الفهد".. حكاية فنانة طالبت بطرد الوافدين المصابين بكورونا من الكويت
وتابع: "شفنا أن مفيش باسبور بينجي صاحبه.. أقوى الدول والمنظومات الصحية بتنهار يعني أمريكا وإيطاليا وإسبانيا وإنجلترا مش عارفين بقوتهم الاقتصادية وتحضرهم اللي ياما حكينا عنه يواجهوا الأزمة دي.. نيجي للوطن العربي فأنا فخور ببلدي أم الدنيا وفخور بطريقة إدارة الأزمة والاهتمام بولاد البلد اللي متغربين حتى والطيارات اللي موقفتش علشان ترجع ولاد البلد وطنهم".
وأضاف: "شفت وزارة صحة وأجهزة دولة شغالين تقصي ومكافحة وعلاج.. وكلي ثقة في أن ستر ربنا هيكمل المجهود ده بشوية حذر وصبر واتباع تعليمات.. شكرًا للدول العربية اللي احترمت المصريين الموجودين فيها.. شكرًا للدول اللي بتعمل زي مصر وبتعالج اللي على أرضها سواء كان ابنها أو ضيف".
وأردف رامي جمال: "شكرًا السعودية وشكرًا الامارات كرمكم وطيبكم وأخلاقكم لا تستغرب شكرًا لكل دولة ما أظهرتش كره وعنصرية تجاه إخواتنا وأهالينا آخر حاجة أهلنا الكويتيين عارف أن أكيد الآراء والأصوات العالية اللي مبطلتش غلط وإهانة وعنصرية مع مصر والمصريين دول مش الغالبية وميصحش يكونوا واجهة ليكم".
واختتم: "أتمنى بعد الأزمة ما تخلص ميكونش اللي اتهز واتهد من مشاعر ناحيتكم كبير النظرة الطبقية والدونية دي ملهاش مكان في أزمة خلقها رب العالمين بڤيروس علشان يعلمنا حاجات كتير أولها وآخرها أن.. الله أكبر".
