مين اللي طفى النور ؟!
كان الشعب في البداية يغضب لانقطاع الكهرباء في أيام امتحانات الثانوية العامة ولو عيل جاب 98 ونص في المية وفاته يدخل طب، أبوه ممكن يعمل تظلم ويكسب قضية ضد شركة الكهرباء وياخد درجتين تفوق كهربائي ويدخل طب من أوسع أبوابها على أساس إن النور عمره ما كان بيقطع في حضانات ولا عيال بتموت أصلا لأنها مش لاقية حضانات؟.
يعني لما أحب أخاطب شعب مصر ؟؟ أخاطب مين ؟ وزير الكهربا ولا وزير التموين؟
قطع النور خير بيخلي الناس تنام بدري وتصحي بدري وما تشربش مية ساقعة عشان ما يجيلهاش التهاب في الحلق واللوزتين - لو كانوا لسة موجودين - وكمان بيخليك تشتغل أقل وتاخد نفس الفلوس وإنت مأنتخ.. حد شايف فوايد تانية!!
لو النور قطع عليك وإنت في الحمام احمد ربنا.. لأنك هتوفر مية الحمام لأن من بكره ما فيش ميه كمان.. لأنهم حولوا السد ومجري النيل بعيد عن مصر بعد زيارة الرئيس لإثيوبيا.
لو النور قطع عليك وإنت بتذاكر احمد ربنا.. يعني كنت يا فالح هتتخرج تعمل إيه ؟ تقعد في طابور العاطلين ولا تشتغل مع الحزب إياه في مشروع توزيع العيش على البيوت..
لو النور قطع عليك والأكل اللي في التلاجة كله باظ احمد ربنا.. أهه تاكل طازة بطازة أو ما تاكلش خالص وتخس أحسن وتحافظ على وزنك.
لكن لو بكرة ما لقتش تشرب ميه وبقيت شبه اللي بيموتوا من الكوليرا في الصحرا في مشهد سعاد حسني في فيلم شفيقة ومتولي.. يمكن تصحي وتفوق وتسأل مين اللى طفى النور؟!.
