أسعار الليمون تثير سخرية النشطاء: "تيجي نحوله دولارات" (صور)
انتابت نشطاء مواقع التواصل الاجتماعي "فيس بوك وتويتر" حالة من السخرية، بسبب أسعار الليمون، الذي تراوح سعر الكيلو في بعض المحافظات من 100 إلى 120 جنيه للكيلو، بعد أن كان سعره يتراوح من 8 حتى 12 جنيه للكيلو منذ نحو شهرين.
ودشن النشطاء هاشتاج "#الليمون"، للسخرية من ارتفاع سعره لأكثر من 100 جنيه، حتى أن البعض شبهه بالذهب، وآخرون تسألوا "هو الليمون على العريس ولا العروسة"، بينما طالب البعض بتحويل أموالهم لليمون، ليدر عليهم أرباحًا أكثر.
أسعار الليمون
فقال محمد خضر " أسعار الليمون اليوم.. لمون عيار ٢٤ ١٠٠جنيها.. لمون عيار ٢١ ٨٠ جنيها.. لمون عيار ١٨ ٦٥ جنيها.. جنيه لموني٥٠ جنيها"، وسخر محمد فاروق "هو #الليمون ع العريس ولا العروسة"
وأضافت ميمي فؤاد "اللى بيروح يخطب واحدة بياخد بوكيه لمون وهو رايح"، وعلق محمد نصر "بيقول لمراته اعمليلي كوباية ليمون أهدّي أعصابي... عملت له نص فرخة"، وتابعت د. سماح أنور "يعني دلوقتي لما نعوز نشرب شوربة باللمون نكسر عليها قرصين فيتاسي فوار أرخص"
أسعار الليمون
وقال أحمد فكري عفيفي "انا من المحظوظين اللي اشتروا ¼كيلو ليمون قبل ما يغلى"، وعلقت سندريلا "تيجي نحوّل الليمون اللى معانا دولارات"، وسخر صافي "الليمون بقى أغلى من البيض المدحرج".
ورد محمد عبد الفتاح "بعد ما حولت كل فلوسي وفلوس أصحابي للمون، واحنا بنجيب طماطم لقينا اللمون رخص وبقى بستين جنيه، أنا بتحارب من موزمبيق"
أسعار الليمون
وسخر غروب الشمس "أخيرا انهيار الدولار أمام الليمون المصري"، وتابع أنور وهيدي "سعر الليمون عيار ٢٤ كام لو سمحت. هينزل في النشرات الإخبارية زى بورصة الدهب"، وقال عماد الشيمي "واحشنى الليمون خالص ونفسى أملى عيني منه العزيز الغالي"
وعلق عمر عبد العزيز "لا لا الموضوع مفهوم غلط اللي ب١٠٠ داه لمون بنكهة. اللحمة والمكسرات.. نوع جديد عشان كدا غالي".
وأضاف ميرو حسن " ليه!! مكمّل تعليمه برة"، وردّ أيمن محمد "الوزن بالبذر ولا من غير ولو حصل وبعته حخسر قد إيه في المصنعية"، وأضاف محمد موندي "يا محمد انزل البلد ضروري..! أبوك لقى 2 كيلو ليمون وعاوزين حد أمين يعصرهم".
وقال قدري بلا لون "إحنا نطبخ اللمون ونعصر عليه لحمة"، وسخر عمر "#الليمون سبحان الله يعني الدولار ينزل خمسين قرش الليمون يطلع ٨٠ جنيه.. البلد دي عليها نذر ولا إيه يا ولاد".