حوار إذاعي بين عبد الحليم حافظ وبليغ حمدي بمناسبة العيد

في عيد الفطر عام 1970 قدم المطرب عبد الحليم حافظ سهرة بإذاعة صوت العرب أعدها الكاتب الصحفى أحمد بهجت وقدمها عبد الحليم بنفسه والتقى فيها بمجموعة من الكتاب والفنانين والشعراء.

أول حديث أجراه عبد الحليم حافظ في السهرة التي نشرت تفاصيلها مجلة الإذاعة والتليفزيون، كان مع الملحن بليغ حمدي وكان أول سؤال :
حليم : ماهى أول عيدية أخذتها من والدك كانت كام وفيم صرفتها ؟
بليغ : أول عيدية 13 قرشا من الفضة وقد صرفتها في السينما وفى المراجيح.
حليم : هوه انت أول ما فلوس تجيلك تصرفها على طول ؟
بليغ ضاحكا: فورا أنا طول عمرى مسرف مبستحملش أمسك فلوس في أيدي، بحس أن الفلوس وجدت علشان تتصرف بشرط تتصرف في مكانها يعنى مثلا ممكن يجئ لى شخص ويقول أنه محتاج فلوس وأعتقد أنه نصاب فأرفض أعطيه، وبعدها أتأكد أنه كان محتاج بالفعل أبتدى أدور عليه وأثناء التدوير ممكن أصرف الفلوس كلها على التدوير.
حليم : انت بتدى والدتك وأختك عيدية ولا بتاخد منها ؟
أنا طول عمرى باخد منها ولحد دلوقت آخد منها، وكذلك أختى الكبيرة صفية آخذ منها عيدية مهما كبرت.
حليم : لماذا لم تتزوج إلى الآن ؟
بليغ : أصل الجواز ده زى القضاء والقدر، مهما الواحد رتب له ومهما الواحد قال حاعمل كذا وكذا وتلاقى الجواز جه زى الصاعقة والمفاجأة.
حليم : ربنا يخلى والدتك واختك صفية واخواتك وأولادهم لكن مش كنت تبقى أسعد لو انت عندك في بيتك واحدة ست تشوف طلباتك بدل ما انت تاعب قلب امك وييجى عليك العيد وانت وسط اولادك.
بليغ : فعلا أهم مافى الزواج الأولاد لكن قولى بقى انت مبتتجوزش ليه انت كمان طالما متحمس بالشكل ده ؟
حليم :لأ سيبك منى أنا اللى بسألك ومتضحكش على.عاوز أعرف إنت لما بتلحن لأم كلثوم هل إحساسك باللحن بيختلف عن أي لحن آخر ؟
بليغ : طبعا بيختلف لأن تكنيك المسرح بيحكم الواحد والتوقيت فمثلا لمما تعمل لحن يتغنى في ساعة يختلف عن لو اتغنى في ربع ساعة أو ساعتين، بتبقى راسم كل حاجة. أهم حاجة انى مقدرش ألحن كلام إلا وأنا مقتنع بيه.
حليم : على العموم كل سنة وإنت طيب.