صلاح فضل الخولي عبدالله
نادرًا لو تابعت مسلسل قبل ما يخلص عرضه على القنوات، أو حتى أكتب تعليقا شخصيا عنه أو عن شخصية في المسلسل، غير لما المسلسل يخلص واتفرج عليه بمزاج، لكن الصراحة عم "صلاح عبد الله" مدانيش فرصة، الراجل اللي بقف قدامه مش عارف أصنفه، هو درامي ولا شرير ولا كوميدي ولا جد ولا إيه بالظبط!
بس يفضل الوصف اللايق عليه، هو "صلاح عبد الله"، لو بتحب الشعر هتلاقيه زجال وشاعر تقيل، بتحب الإذاعة؟ هتسمعه وتحبه، بتحب المسرح، تلاقي تاريخه مليان وأدواره تفطسك من الضحك حرفيًا، لكن يفضل 4 ادوار معلقين في مخي من زمان جدًا بما فيهم دوره في مسلسل قيد عائلي.
عبد الرازق، أيوه عبد الرازق بتاع ريا وسكينة، الراجل الفرفوش اللي حابب الضحك وحابب الهلس، وبيحب الستات، تركيبة غريبة بس فعلًا لو فكرت تجيب حد أو تتخيل حد مكان الخال "صلاح عبد الله" عمرها ما هتيجي كده!، تحس الدور متفصل له زي ما قال الكتاب ومفيش غيره يلعبه!
أما عاطف فوزي خير، اللي كان في "فيلم هندي" بحسه أكتر دور جسد مشكلة الارتباط، وخصوصًا عندنا كمسيحيين، فكرة الخوف من الجواز، علشان مفيش طلاق إلا لعلة الزنا، ويحاول دايمًا يوفر الحاجات اللطيفة علشان "ماري" البنت اللي بيحبها تفضل معاه ومتسيبهوش علشان بيحبها جدًا، ولكن بيفضل محتار، بين حبيبته وبين صديق عمره، ولكن في الآخر بيختار الصاحب، وده يمكن تنفيذا لمبدأ في الكتاب المقدس، "الصديق الأمين معقل حصين، ومن وجده فقد وجد كنزًا"، وهو فعلًا كان الصديق الأمين في الفيلم.
لكن دوره في مسلسل "الرجل العناب" مقدرش متكلمش عنه، قنبلة ضحك موقوتة، تضحك من قلبك، وهو دايمًا بياخد حقه كرئيس لحزب الصراحة راحة، بموضوع "حفارات رومانيا"، إلا بالحق يا عم صلاح، إيه أخبار حفارات رومانيا؟!
نيجي بقى للدور الأخير وأهم دور واللي لحد دلوقتي مش فاهمه، هل هو كوميدي وبيضحك، ولا شديد وحازم وأكشن أوي، دور "فضل الخولي" أول إمبارح فضل الخولي لأول مرة يعيط علشان بنته، وفي نفس الوقت خايف على مكانته لتتهز بسبب بنته، وفي نفس الوقت ممكن يرمي جملة تخليك تبتسم وتضحك، تركيبة يمكن تكون غريبة، لكن مش على العم "صلاح عبد الله".
