تعليقات ساخرة يطلقها النشطاء في «#لو_المصري_طلع_الفضاء».. شندويلي: هيكتب على المركبة الفضائية دلوعة درب التبانة.. أحمد: هيبيع الأكسجين فرط.. ماي: هيدور على قهوة ويشوف ماتش محمد صلاح
![فيتو](images/no.jpg)
تعليقات ساخرة أطلقها نشطاء موقع التواصل الاجتماعي "تويتر"، من خلال هاشتاج "#لو_المصري_طلع_الفضاء"، الذي تصدر تراند مصر على تويتر، ورسموا فيه شكلا تخيليا عن حياة المصري إذا عاش في الفضاء الخارجي للأرض، ليردد البعض أن أهم ما يبحث عنه المصري في الفضاء سيكون المقهى، في حين أن آخرين أكدوا أن المصري سيبيع الأكسجين إذا عاش بالفضاء.
دلوعة درب التبانة
قال فوكس تروت: "هايكتب على سفينة الفضاء الحلوة من الأرض جميلة طول وعرض #لو_المصري_طلع_الفضاء".
وأضاف شندويلي برسوم بوشكاش: "#لو_المصري_طلع_الفضاء هيكتب على المركبة الفضائية دلوعة درب التبانة".
وعلق أحمد موحا :"#لو_المصري_طلع_الفضاء هيبيع الأكسجين فرط".
وردت فلة سمسمة: "#لو_المصري_طلع_الفضاء هيبص على كوكب الأرض ويقوله يلا يا أبو اوزون مخروم".
وتابع ماي فانسفل واي: "#لو_المصري_طلع_الفضاء هيدور على قهوة عشان يشوف ماتش # محمد_صلاح".
سيتزوج فضائية
وقال عمرو طلبة: "هيتجوز من فضائية علشان ياخد الجنسية.. #لو_المصري_طلع_الفضاء".
وتابعت سندرا سامي: "#لو_المصري_طلع_الفضاء هينشر الغسيل على القمر".
وأضاف أبو على المساعد: "هيزهق وينزل تاني عشان مفيش عربية فول يضرب من عندها الصبح #لو_المصري_طلع_الفضاء".
وعلقت سهيلة حسام: "#لو_المصري_طلع_الفضاء هياخد طبيخ معاه عشان الحاجة هناك غالية".
ورد عبد الرحيم سيد: "#لو_المصري_طلع_الفضاء يطلع الفضاء إيه احنا أصلا عايشين ف الفضاء مش شايفين الفضائيين اللي بنتعامل معاهم".
هيفتح قهوة
وقال حسن يوسف: "#لو_المصري_طلع_الفضاء هيفتح قهوة ويبدل الفحم بنيزك".
وأضاف عبد الله النجار: "#لو_المصري_طلع_الفضاء هيتعملوا قضية مبانى بدون ترخيص من السلطات الفضائية وهيتسجن... بلاش احسن...".
وعلق وليد: "#لو_المصري_طلع_الفضاء هيغنى وأعيش وارفرف في الفضاء واكيد هيعمل ازدحام مروري فضائي قادر ع كل شيء".
ورد خالد: "#لو_المصري_طلع_الفضاء هيحط طوب وكاوتشات ادام بيته الفضائي".
هياخد كارتة
وتابع أحمد حنفي: "#لو_المصري_طلع_الفضاء هيشغل مهرجان بلوتو والسبع نجوم.. هيحط كارتة على بوابة الأرض".
وقال هاني عبده: "أول ما هنطلع هنعمل موقف هناك.. وأي مركبة تطلع بعدينا ناخد عليها كارتة والكل يرزق.. #لو_المصري_طلع_الفضاء".
وأضافت وفاء سعيد: "#لو_المصري_طلع_الفضاء هيكتب على الصاروخ رميت همومي في البحر طلع الفضا يلطم".
علق أحمد: "#لو_المصري_طلع_الفضاء -عرفنا يا باشا هتعمل ايه لو طلعت الفضاء؟!.. المصرى: يعنى ايه فضاء!!".
حاجة حلوة
ورد عبد العزيز أحمد: "مراته هتتصل عليه كل خمس دقايق تسأله انت فين.. وممكن تقوله هاتلنا حاجة حلوة معاك من الفضاء #لو_المصري_طلع_الفضاء".
وتابعت نورهان جمال: "هتعدى الثقب الأسود اللى على شمالك ده وتختم الورقة دى وتجيلنا بعد 30 سنة ضوئية تاخد البطاقة #لو_المصري_طلع_الفضاء".
محشي وفسيخ
وقال شوقي طه: "#لو_المصري_طلع_الفضاء طبعا مافيش بدلة والكلام دة هي الفانلة الحملات... وحلة محشى حلوة وفسيخ ورنجة. ودا كفاية أن الفضائيين يعلنوا الحرب علينا ونبقى كدة حققنا أمنية الأمريكان في أفلامهم".
وأضاف مستر مدبولي: "#لو_المصري_طلع_الفضاء هنقف نحمل ركاب من الطريق ويقولك فاضيه جوه".
وتابع على المصري "#لو_المصري_طلع_الفضاء الفضاء هينزل على الأرض وهيقوله انت جيت أنا سايبلك الدنيا وماشى اشبع بيه".