«الطلاق انتشر ليه» هاشتاج يشعل مواقع التواصل.. مصطفى: بسبب عدم الاختيار الصحيح.. صلاح: الناس ماعادتش تسامح.. عبد الحميد: تدخلات الأهل والمعارف.. محمد: الستات نكدية

دشن نشطاء مواقع التواصل الاجتماعي هاشتاج "هو الطلاق انتشر ليه"، الذي احتل مركزًا متقدمًا على تراند مصر بتويتر، وناقش النشطاء فيه أهم الأسباب التي أدت لانتشار الطلاق داخل المجتمع المصري.

ومن الأسباب التي أوردها النشطاء، وأدت لزيادة معدل الطلاق في المجتمع عدم الاختيار الصحيح وانعدام الأخلاق، بالإضافة لانعدام المسئولية والإنترنت والتدخلات الخارجية من الأهل والأقارب.

انعدام الأخلاق
وقال مصطفى بهنساوي "هو الطلاق انتشر ليه.. 1- عدم الاختيار الصحيح.. 2- الانفتاح الزيادة عند النساء.. 3-انعدام المسئولية.. 4-انعدام الأخلاق، فالزواج في الأول والآخر أخلاق".

وأضاف صلاح الدين: "هو الطلاق انتشر ليه الناس ماعادتش تسامح وتغفر، وساعات الأهل تلاقى واحدة عاملة فيها مارى منيب وتفشل حياة ابنها أوبنتها بتدخلاتها، وضيق ذات اليد".

وعلق عبد الحميد المحمودي: "هو الطلاق انتشر ليه.. كمان التدخلات الخارجية من الأهل والمعارف والقرايب.. أي علاقة بتبقي بين اتنين بس.. تداخل أي حد معناها فساد العلاقة دي.. عدم التفاهم والانسجام إننا نكمل وإحنا في البداية وإحنا مش متفاهمين فتبقي نهاية كارثية.. النظر للمظهر ونسيان الجوهر".

ورد محمد عبد العزيز محمد: "هو الطلاق انتشر ليه علشان الستات نكدية".

الجواز صعب
وقال سعيد ناصر :"هو الطلاق انتشر ليه.. نصيحة لكل البنات، الراجل اللي يطلب من أهله المساعدة في مسألة الزواج بطريقة معلنة وعادى.. هو بالأساس لا يصلح للزواج".

وأضاف أحمد : "هو الطلاق انتشر ليه.. علشان كتير من الأزواج ميعرفوش يعنى إيه جواز".

وعلق كرم ممدوح "هو الطلاق انتشر ليه.. علشان الجواز بقي صعب".

وتابع إبراهيم هاشم: "هو الطلاق انتشر ليه.. أنا عن نفسى بسميه انفصال مش طلاق، وأنا منفصل ومعايا بنت وربنا يجازى اللى كان السبب وحسبى الله ونعم الوكيل كافية فيها".

وردت يويو زيز: "هو الطلاق انتشر ليه.. بسبب عدم فهمهم لمعنى المسئولية، كل واحد فيهم بيفكر في أنا وبس زائد تسخينات السوشيال ميديا".

"نكد الستات"
وقال سيف: "هو الطلاق انتشر ليه.. بسبب نكد الستات".

وأضاف على البطل :"هو الطلاق انتشر ليه.. انتشار سيادة الرأى الأوحد بين الزوجين".

وعلق ضياء أحمد :"هو الطلاق انتشر ليه، أي مشكله سيئة بتنتشر بيكون العامل الأساسي لكده هو البعد عن ربنا، الطلاق بوجه خاص بيدخل معاه التفاهم والراحة والصدق".

وردت حنان أسامة: "هو الطلاق انتشر ليه.. عشان الاختيار الغلط من البداية بيخلي مفيش تفاهم بين الطرفين وبالتالي الحياة بتبقى مستحيلة".

وتابعت نوران محمد :"هو الطلاق انتشر ليه.. عشان في طرف واحد بيجي على نفسه كتير، وفي وقت معين بيبقى عايز يحس حاجات معينة ومبيلقهاش عشان مفيش تفاهم- ثقة الكلام كتير".

وقال علاء: "هو الطلاق انتشر ليه.. عشان الجواز المبكر".

وأضاف "محمود بيزنس مان: "هو الطلاق انتشر ليه.. عشان النت دخل كل البيوت".