قصيدة جديدة لـ«بولا وجيه»: وإيه آخرتها

بتزيدي في الدلال
وتقللي في القرب
من غير كلام يتقال
أنا قلبي غرق في الحب
وبقرب لمرساكي
عشمان اني القاكي
وباجي..
بلاقي إني توهت
بلاقي إني هونت
بلاقي اإني زرعت
وفي الآخر محصدتش
وكأن الواقع ده كله أصلا محصلش
طب إيه العمل؟!
فقدت الأمل
وكأنها دومنة ومقفلة
ضبة ومفتاح
رسيني على حل
يمكن قلبي يرتاح
هو انتي ده!
ولا كان طيفك!
هو انتي عاوزاني
ولا مجرد ضيفك؟!
هاخد واجبي واقوم
وامشي في السكة
وأعود كما كنت
احتياطي ع الدكة
في حياة الكل
والله فل الفل
لو كان ده واجب ضيافة
والله أنا قمة في الهيافة
بفرح بكلمة
وأحزن بفعل
كفرت بالناس
وبيكي آمنت
شوفتك ملاك
مش مجرد بنت
يجوز العيب من عندي
يجوز الخوف من عندك
وإيه يعاندك
لو كنتي ميلتي؟!
لو كنتي في القرب
زدتي!
والله كانت تبقى عال العال
وأنا أصلا قلبي ليكي ميال
وفي عشقك انتي
مليون موال يتقال
ومش ناقص
غير وتر قلبك
أعزف عليه
لو كنت فعلًا جنبك.