زيارة لجمجمة «إخوانجي»!

-أقولك صحيح.. إنتوا ليه عارضتوا السادات في أيامه الأخيرة؟
لأنه اتصالح مع اليهود!

- طيب ما جمال عبد الناصر كان بيكرههم ولم يصالحهم؟
أيوه بس كان جمال عبدالناصر حاططنا في السجن..

-أغلب كلامكم عن التعذيب طلع كذب واتكشفتوا باعترافاتكم.. لكن طيب ما السادات هو اللي أفرج عنكم ومنحكم قبلة الحياة من جديد؟
أيوه بس السادات كان في عهده لصوص وحرامية الانفتاح..

-طيب ما جمال عبد الناصر مكانش في عهده لا لصوص ولا انفتاح وعارضتوه؟
أيوه بس جمال عبد الناصر كان بيعذبنا في السجون..

- أيوه لأنكم حاولتوا تقتلوه ومحاولتوش تقتلوا غيره.. ثم أنتوا اتعذبتوا في عهد الملك على يد إبراهيم عبد الهادي واتعذبتوا في عهد مبارك؟
أيوه بس مبارك كان عهده ذهبي لنا.. استولينا على النقابات وعدد كبير من الأندية وفتحنا أكبر عدد من الجمعيات الخيرية اللي وفرت العلاج والدروس الخصوصية بأجر رمزي لأن مبارك لم يوفرهم للفقرا..

- طيب ما عبد الناصر وفرهم للفقرا وعارضتوه؟
أيوه بس عبد الناصر كان بيتعامل مع روسيا الشيوعية الكافرة..

- طيب ما كل رؤساء مصر لحد النهاردة وقبل عبد الناصر اتعاملوا مع الروس ومع الصينيين ومع الكوبيين ومع الكوريين ومع الفيتناميين ومع البوذ اليابانيين ومع الهندوس الهنود كمان.. ومحاولتوش تقتلوهم؟
أيوه لأن عبد الناصر في عهده كانت نكسة 67..

- طيب ما هو كان في عهده الاستنزاف.. مش انتوا برضه اللي كنتوا بتعلموا أتباعكم في دروس الثلاثاء دروس غزوة أحد؟ وكيف ثبت الرسول عليه الصلاة والسلام وشجاعة طلحة بن عبيد الله واختبار المؤمنين بعد مزاعم بمقتل النبي الكريم عليه الصلاة والسلام؟!
مفيش مقارنة يا أخي بين عهد الرسول وغيره..

- طيب ولما هو مفيش مقارنة قارنتوا ليه بين معاهدة السلام مع إسرائيل وصلح الحديبية وقتها؟!
لا.. كانت في ملاحظات كتير منها تدخل زوجته في السياسة وحكم البلد وعلشان كده هاجمها الشيوخ ومنهم الشيخ المحلاوي حفظه الله وأطال في عمره..

- طيب ما عبد الناصر كانت زوجته لا تتدخل في أي شيء؟!
أيوه بس عبد الناصر كان ضد الشريعة الإسلامية باختصار بقى..

- وانت عرفت إزاي؟ سألته انت؟ وبعدين ده هو اللي عمل أول إذاعة خاصة للقرآن وأول طبعة مسموعة للمصحف وبكل اللغات وهو اللي طور الأزهر وعمل مدينة البعوث والمؤتمر الإسلامي والمجلس الأعلى للشئون الإسلامية وفي عهده مادة الدين بقت مادة رسوب ونجاح ومع ذلك هو من أسس الكاتدرائية المرقسية.. لكن سيبك من ده كله.. هو باقي حكام مصر طبقوا الشريعة الإسلامية حسب همك القاصر لها باعتبارها عقوبات وبس؟
لا.. مطبقوهاش.. بس على الأقل السادات مثلا ساند المجاهدين الأفغان ضد روسيا..

- طيب وإيه علاقة ده بالشريعة؟ ثم طالما كده ليه انقلبتوا عليه آخر أيامه؟
لأنه صالح اليهوووود قلتلك..

- نعم؟؟ طيب ما عبد الناصر عداهم؟ إحنا هنرجع نعيد من الأول تاني؟ انت عايز إيه بالظبط؟!

عايزك تعتقني لوجه الله!