رسالة قاسية من أحمد طارق لهاجر الشرنوبي بسبب أزمتها مع ولاء الشريف

وسط الأزمة القائمة بين الفنانة ولاء الشريف والفنانة هاجر الشرنوبي بسبب دور العفريتة في مسلسل "كفر دلهاب"، والتي قامت كل منهما بنسبه لنفسه، حرص الفنان الشاب أحمد طارق، على إبداء رأيه في هذه الأزمة.

ونشر "طارق"، مجموعة من الصور لولاء ولهاجر من المسلسل، وعلق عليها عبر صفحته الشخصية على موقع التواصل الاجتماعي "فيس بوك"، قائلا : "تخيلوا كده لما ييجوا يطلبوني كممثل يستضيفوني في برنامج.. وبدل ما اديلهم شغلي في المسلسلات اللي عملتها.. اديلهم شغل أحمد حلمي مثلا واقول أن انا ده وان ده شغلي وابقي مقتنع جدا.. لا والأكبر بقه أن الاعداد يقتنع بكده ويستضيفوني على هذا الأساس".

وأضاف: "اهو ده اللى حصل بالظبط.. اه والله.. بس المره دي مش معايا.. مع اأختي ودفعتي ولاء الشريف اللي في الصورة.. والصورة التانية من شغلها والصورة التالتة صورة هاجر الشرنوبي في برنامج صاحبة السعادة".

وتابع: "ولاء الشريف من ضمن أعمالها اللي كلكوا شوفتوها.. كانت عاملة دور "ريحانة" عفريته كفر دلهاب.. وفعلا اتبهدلت وربنا وحده يعلم هي قد ايه تعبت من المكياج وساعات التصوير بالمكياج الصعب ده زي مانتوا شوفته.. على الجانب التاني فيه حد وانا ماقدرش اقول عليها زميلتي بعد اللي حصل هاجر الشرنوبي.. كانت عاملة دور فله في المسلسل عفريته برضه.. وبمبدأ اللي يلحق ويقول الأول.. راحت هاجر واخده صور ولاء الشريف بعد ماعملت الماسك وقالت إن دي هي.. وفضلت تقول كده لحد النهارده. لدرجة إني وأنا بشوف برنامج صاحبة السعادة.. لقيتها عارضة صورتين أو تلاتة من صور ولاء الشريف بعد الماسك.. وفيديو وصورة لهاجر بقه المرة دي وهي لسه بتعمل الماسك".

واستكمل حديثه، قائلا: "كمان قالت انها قعدت 3 شهور بتصور بالماسك والكلام ده كله.. مع أنه مش حقيقي.. اللي تعب فعلا هي ولاء الشريف.. واللي طلع عينها فعلا هي ولاء الشريف.. هاجر أيامها كلها في التصوير في دور فله العفريته.. ماتجيش ربع أيام ولاء الشريف "ريحانة" في التصوير.. البوست ده بكتبه لأن فعلا كل واحد لازم ياخد حقه.. وأنا فعلا مستغرب من اللي بتعمله هاجر.. ومش أنا لوحدي اللي مستغرب.. ده معظمنا احنا كممثلين.. مع انها عامله شغل برضه في أعمال تانيه.. يبقي ليه نلجأ اننا ناخد شغل غيرنا كمان ونقول عليه شغلنا ؟ اللي تعب فعلا واتبهدل واتمرمط هي ولاء الشريف.. اكتر حد كان لازم البرنامج يستضيفه هي ولاء الشريف".

ووجه "طارق"، رسالة قاسية لهاجر في نهاية حديثه، قائلا: "أما كلامي أنا لهاجر.. إنتي يمكن كسبتي أنك فرحتي بالحاجات اللي مش حاصلة وصدقتيها ووهمتي الناس بيها.. لكن للأسف ماعرفتيش تحافظي على احترام زمايلك ليكي كممثلة بعد اللي عملتيه.. الاهم من المهنه هي آداب المهنة".