بالصور.. أطرف مواقف رواد «فيس بوك» مع نتيجة الثانوية العامة.. ياسر: واحد صاحبي جاب 97% أمه أغمى عليها.. حسين: أخويا بيحمد ربنا عشان اللى بيغش منه سقط.. وسمر: كنت متوقعة تربية جالى مجموع طب

وأضاف شهاب: "عادي جدا كنت مرتبط بواحدة من كام سنة وجت تقولي أنت إيه رأيك أخش علمي ولا أدبي، أنا قولتلها أدبي عشان تخش نفس الكلية أذاكر لها، بتقولي بس أنا شاطرة وبحب العلمي أقولها معلش عشان محدش يبقي يذاكرلك غيري، بعد ما دخلت أدبي مكملناش شهر وفركشنا، والحمد لله هي دخلت خدمة اجتماعية وأنا شلت سنتين".

واحد صاحبي جاب 97% أمه أغمى عليها
وقال ياسر: "كنت بلعب بلايستيشن أنا وواحد صاحبي وكنت مقطعة ساعتها، وقالولنا إن النتيجة ظهرت وهو جاب 97% أمه أغمى عليها ساعتها، وأنا جبت 85% وروحت لقيت أبويا بيوزع حاجة ساقعة على الشارع".

أقوى رد فعل لشاب مجموعه 55%
وأضاف حسين: "أنا صحبي اتصل بيا من رقم معرفهوش، ولقيته بيقولي أنت جايب 98.9 رحت شتمته وقفلت، افتكرتها اشتغالة بس لقيتها 98.5 مبعدناش بعيد". 

وقال محمد: "أخويا كان جايب 55% وماما بتعيط ومنهارة وهو بيلعب بلاي ستيشن مع أصحابه، طلع قالها جبتو النتيجة قالت له اه خش يا فاشل 55% خسارة فلوس الدروس، قالها بتعيطي ليه احمدى ربنا، ده اللى كان قاعد ورايا شايل 3 مواد، قالت له أنا مالي باللي كان قاعد وراك، قالها مانا كنت بغش منه".

واحد جاب 67% أبوه قاله جايبلى النكسة
وأضاف أحمد: "واحد صاحبي كنا جيران جاب 67 وكان أدبي، بيقول لأبوه أنا جبت 67 قاله جايبلي النكسة ياروح أمك، أقسم بالله كنت هموت من الضحك".

كنت متوقع تربية جالى مجموع طب
وقالت سمر: "يا سيدي أنا السنة كلها بقول تربية وهما يقولوا اللى يجيبه ربنا خير، وفي الآخر دخلت طب، أنا مش عارفة المجموع بتاعي جه من فين".

ابن خالى جبهالى طلعت بمادتين
وأضافت جهاد: "أنا ابن خالي هو اللى جابها، وفضلت اتصل بيه وهو مش بيرد، فا أنا فهمت بالفطنة كدة إني سقطت، بقوله طلعت بمواد قالي اه، قولتله بتهزر عطيته لأمي والحمدالله طلع مش بيهزر، وطلعت بمادتين، وهروح امتحن فيهم وهخش خدمة اجتماعية باين".