طلاب «طب دمياط الأزهر».. خريجون دون شهادة
روت أميرة صلاح طالبة بكلية طب دمياط التابعة لجامعة الأزهر، قصة معاناة زميلاتها وذلك بعد صدور قرار من الكلية بعدم تبعيتهم لكلية الطب فرع القاهرة أو فرع دمياط.
وقالت أميرة: «في البداية، إحنا بنات في 6 طب دخلنا الكلية اللي كان تنسيقها في سنتنا 98.4% بس للأسف إحنا أزهرية في سنتنا نزل قرار من رئيس الجامعة أن يفتح فرع لأزهر القاهرة في دمياط الجديدة وأسيوط وتمام ودخلنا الكلية اللي أصلا لم يتم إنشاؤها على أساس أن الكلية بتاعتنا يتم إنشاؤها في خلال 6 سنين يعني نخلص نلاقي مكانا موجود».
وأضافت « تلات أربع الشعب المصري ميعرفش الحكاية دي أصلا أو كله عادي أنا لو مكنتش في الكلية دي مكنتش سمعت عنها برضه، دخلونا في كلية الولاد مش مختلط كنا بنبدل القاعات.. وأخدوا دفعتين وقفلوها حاجة كويسة مكان قريب من محافظتنا بدل القاهرة وبهدلة المواصلات وسكن جامعة ومشكلات، كنا بنمتحن نفس الامتحانات كدفعة واحدة إحنا والولاد ونفس أعمال السنة».
وتابعت «أي حد في طب عارف الضغط العصبي والنفسي اللي بنعيش فيه حتى لو أول الدفعة كان بيشرحلنا دكاترة المنصورة ودكاترة طب دمياط ممكن يتسئلوا على مستوانا التعليمي اللي هوا مش أقل من أي دفعة في أي كلية تانية يعني قربنا نتخرج «ألف مبروك لينا» طول الوقت الدكاترة إنتو ولادنا وهتاخدوا حقكم عادي.. لكن رئيس الجامعة اتغير «جالنا الجديد من شهر قالنا حقكم هتاخدوه وهتاخدوا الشهادة من القاهرة ومشي».
وقالت: «بعد شهر لغي قرار رئيس الجامعة القديم (اللي دخلنا بيه الكلية) قالك مفيش سعة في الجامعة طب إحنا أكيد مش طلع عينيا على الفاضي وبعد الذل والمرمطة دي كلها هناخد حقنا ملناش دعوه باختلافات رؤساء الجامعة مع بعض بس نزل قرار إننا مش تبع بنات القاهرة ولا تبع بنين دمياط «الكليه اللي درست فيها وكان بيطلع الكارنيه باسمها آه والله طب بنين عادي» ولا لينا تكليف في الصحة «بقينا لقطاء» غير معلومين الهوية حتى مش عايزين يدونا الشهادة».
