90 مليون مؤرخ.. متطوع !
مصري ( 1 )
- النحاس باشا لم يقبل يد الملك.. عيب كده!
مين اللي قال حضرتك يا فندم أنه لم يقبل يد الملك؟
-كده.. لأنه ده يستحيل يحصل !
ليه يا فندم يستحيل؟ هو إحنا بنتكلم على حالة طلاق ولا على واقعة تاريخية؟
-لا واقعة تاريخية.. بس صعب نصدقها.. وبعدين دي واقعة رواها اتنين أو تلاتة بس!
وسيادتك عايز كام واحد يرويها؟ شارع مجلس النواب كله بسكانه بالمارة؟ دى مروية من شخصيات كبيرة جدا.. كتبوها وقتها.. قبل سيادتك ما تتولد.. وربما قبل الوالد الكريم ما يتولد.. والأهم أن من رواها هم شهود الواقعة.. اللي شافوها بنفسهم!
- آه بس دول بيكرهو النحاس باشا؟
ولا النحاس باشا نفسه قال كلامك ده كمان عايزني أصدقك أنت في 2017 ومشفتش حاجة ولا حتى شفت اللي شافوا.. وأسيب شهادة شهود الواقعة؟!
مصري ( 2)
- محمد نجيب لم يكن على علم بمحاولة اغتيال جمال عبد الناصر وأعضاء مجلس قيادة الثورة!
مين قالك يا فندم ؟
-محدش.. بس أول مرة أسمع عنها ؟
وأنت سمعت عن كل اللي حصل في المسلسل يعني؟
- لا طبعا.. بس دي غريبة شوية.. ومحدش قالها قبل كده.. وبعدين متوصلش لحد كده!
اشمعنى كنت مصدق لحد سنوات فاتت أن حادث المنشية تمثيلية؟
-لأن ناس كتير كانت بتقول كده.. بس عرفت أن أغلبهم إخوان وأن الإخوان وراء الترويج للكذبة دي!
طيب ما هو الإخوان دول حلفاء نجيب!
-آه حلفاء ماشي.. تعاون معاهم ماشي.. كانوا عايزينه يمسك الحكم ماشي.. تظاهروا من أجله ماشي.. لكن يعرف بنية القتل ويصمت.. صعبة جدا دي ؟!
ليه إن شاء الله.. هي عملية جراحية ولا تاريخ ؟!
-لا تاريخ.. بس مش عارف وحيد حامد جابها منين بصراحة؟
طيب ولما أنت مش عارف جابها منين بتنفيها ليه قبل ما تعرف؟
-مش عارف.. بس أتمنى أن وحيد حامد يقول مصدره فيها
طيب ولما هو لسه مقالش.. ليه مش بتنتظر لحد ما يقول!
وهكذا.. تدور الحوارات عن مسلسل الجماعة.. والسطور السابقة ملخص لها وليس نقلا عن حوار بعينه.. والخلاصة أن العواطف تحكم كل شيء.. العاطفة التي منحت الإخوان شعبية لا يستحقونها.. وتعود العاطفة من جديد للتشكيك في عمل يفضح الإخوان على الأقل حتى الحلقة 18، وبالتالي يحق للإخوان التشكيك في المسلسل كله وهكذا يقدم خصوم الإخوان كل مرة.. كل مرة.. كل مرة يا محترم.. طوق النجاة للإخوان الجماعة الأكثر كذبا وتلفيقا وافتراء في التاريخ لنثبت أننا لا نتعلم ولا نستفيد من التجارب ولا نمارس سياسة أصلا لنكون البلد الوحيد في العالم الذي يعيش فيه 90 مليون مؤرخ متبرعين متطوعين بالمهمة المقدسة!
ثم يسألونك في دهشة وفي براءة عن سر بقاء الإخوان واستمرارهم على الساحة السياسية !
