أحلام المصريين الضائعة في هاشتاج «#ضيعت_عمرك_في».. وسام: «قضيت عمري مع أشكال زبالة».. مروة: «16 سنة تعليم وفي الآخر قعدت في البيت».. ومحمد: «في لعب البلايستيشن»
دشن مستخدمو موقع التواصل الاجتماعي «تويتر»، هاشتاجًا جديدًا، يحمل اسم «#ضيعت_عمرك_في»، الذي تصدر قائمة الموضوعات الأكثر تداولًا عبر الموقع.
وتباينت ردود مستخدمي «تويتر»، من خلال الهاشتاج، فجاءت بعض التدوينات تحمل طابعا ساخرا، فيما جاء بعضها الآخر معبرًا عن حالة من السخط والحزن.
التعليم
قال رؤوف: «ضيعت عمري في المذاكرة والتعليم وبعدين عرفت إن كل ده من غير واسطة ورشوة ملهمش أي ستين لزمة»، وغرد: حامد: «ضيعت عمري في تحمل مسئولية ناس وحبهم أكتر من نفسى»، وعلقت منى: «#ضيعت_عمري_في الدراسة والآخر وضعت شهادتى تحت مرتبتي ونمت عليها».
الناس النضيفة
وعلقت وسام: «هو على قد ما ضاع على أشكال زبالة على قد ما عمرنا ما كنا هنعرف قيمة الناس النضيفة اللي في حياتنا دلوقتي ربنا بيسبب الأسباب الحمد لله»، وغردت ضي: «محاولة تطبيق ما ينبغي أن يكون، في زمن لا يعرف ما ينبغي أن يكون، وإن عرف تجاهل، وفعل ما لا ينبغي أن يفعل، ولا حياة لمن تنادي».
البلايستيشن
وقالت نجلاء: «كنت أبقى شايفة الصح وعاملة مش واخده بالي منه وعارفه نهاية، وآخرة اللي أنا فيه وبيحصل بس نقول إيه بنجيب الأرف لنفسنا»، وعلق نبيل: «أحلام يقظة وأمنيات وأعيش واقع منيل مليء بالصفعات»، وعلق محمد ساخرًا: «#ضيعت_عمري_في لعب البلايستيشن»، وقالت إيناس: «حاجات مفيش حاجه منهم صح أو مفيده حتى التعليم».
السفر
وذكرت مروة: «ضيعت_عمري_في التعليم، واكتشفت بعد 16 سنة تعليم أن الست ملهاش غير بيتها وجوزها»، وعلقت آية ساخرة: «ضيعت_عمري_في حاجات كتير مثلًا السفر سافرت كل البلاد الخروج خرجت في كل الأماكن حققت كل أهدافي ده طبعًا كله وأنا بحلم لأنه بيضيع في النوم».
وتابع محمد: «لو ركّزت على اللي ضاع منك عمرك ما هتشوف اللي بيستناك.. الدنيا واسعة دور فيها على رزقك».
