يا ناس يا سيس.. هو ده الرئيس.. يا ناس يا عرة الريس بره !!

خير اللهم اجعله خير.. كانوا اعدين من سنة يقولوا محاكمة "القرن" ومحاكمة الجيل ومحاكمة مالهاش مثيل وفجأة كدة من غير مقدمات الرأجل ياخد براءة.. طب انا اصدقكم ازاى بقى بعد كدة ويا خسارة المصاريف والتكاليف.. ده انا كنت مكلفة والله والصرف باين..
وانا اللى كنت مجهزة الفستان الأسود.. زى الصندوق الاسود بالظبط ومستنية يقولولى ده اتحبس اقوم انزل اقف مع انصاره افقعلى صوتين واطلع بشوية فول نابت ورغيفين ومجهزة فستان تانى اصفر ومستنية يقولوا ده اتجنن اقوم اروحله وازوره فى السرايا الصفرا واخدلى لترين حاجة ساقعة يطروا على قلبه كدة فى الحر ده
قوم يطلع براءة !! طب انا دلوقتى أعمل واجب إزاى مع الراجل الأمير الكمل الطيب ده
ولا عايزينهم يقولوا عليا انى كنت يوم مع الثورة والعيال الفافى دول ... لا ده انا كنت باجاريهم بس عشان اعرف هما ناويين على إيه
لكن انا طول عمرى وانا فى البيت ومش فشر ابدا ولا كلام من ورا قلبى كنت باشغل اغنية .. أول ضربة جوية فتحت باب العبودية
وكنت وانا باستحمى بافتكر دايما أغنية هو اللى معلمنا هو .. هو اللى مربينا هو هو
وكنت دايما جوة عقل بالى باقول ولا يوم من أيامه وياما دعيتله وانا باصلى بس الصراحة كان نفسى يعملوا فيه أى منظر عشان أعرف اروح واتصور بقى بالفستان الأسود أو الأصفر أو حتى الموف الغامق بتاع الأحداث الحزينة على رأى اللى اسمه اتخفى "باسم"
بس انا خلاص هاقوم دلوقتى واجهز يفط الإفراج واكتبها بالروج وانشفها بالسيشوار وهاكتب عليها:
يا ناس يا عرة.. الريس برةه
يا ناس يا سيس.. هو ده الرئيس