إزاي تتعامل مع الإحباط؟
أحيانًا ممكن يتملكك شعور بالإحباط أو الفشل، وممكن تقعد فترة مكتئب أو حزين أو مش في المود زي ما البعض بيقول، وبتقعد تفكر في إزاي ممكن تخرج من الحالة المزاجية السيئة دي.
خصوصًا لو كانت الحالة دي بسبب أنك وقعت وأنت بتحاول تعمل حاجة مهمة جدًا في حياتك، أو بمعنى أدق كنت بتاخد خطوة مهمة في حياتك واتشنكلت وأنت بتاخد الخطوة دي.
طبعًا من الجيد أنك تشعر بالحزن لأنك وقعت، لكن الأفضل أنك تتعلم وتقوم من وقعتك وتكمل في طريقك وهدفك، لازم تخلي فترة وقوعك مش كبيرة، لازم تقوم وتكمل في طريقك لحد ما توصل لهدفك اللي بتتمناه.
هتقول مش قادر أو خلاص الاكتئاب تملكني، هقولك تبقى غلطان، لأنك ببساطة لازم تعرف أن التجارب دي معمولة علشان تتعلم مش علشان تتكسر بسهولة منها.
والنهاردة ممكن أقولك على كام سر يخلوك تتخلص بسهولة من كل مشاعر الإحباط اللي عندك، بس ياريت قبل ما تكمل قراءة خلي معاك ورقة وقلم وطبق معايا واحدة واحدة.
١- حدد مشاعرك:
ناس كتير متعرفش الفرق بين ألم السقوط والإحباط لما بيصيب واحد، ألم السقوط هو بيبقى دافع أنك تقوم تاني وتكمل في طريقك ويبقى عندك ثقة في نفسك أنك تكمل حتى لو وقعت تاني، لا أنت مكمل مهما إيه حصل، لكن الإحباط هو أنك بعد ما تقع تفضل مستسلم وثابت في مكانك ومش عاوز تتحرك أو تبذل مجهود حتى علشان تقوم من وقعتك.
٢- تعامل مع مشاعرك:
علشان تتخلص من المشاعر السلبية عندك كذا طريقة وكذا حل ممكن تلجأ ليهم:
-صلي:
من أهم الطرق اللي تطمن أي حد هي الصلاة، الصلاة ليها مفعول سحري جدًا، ربنا عمره ما كسر حد راح محتاجله، فطبيعي هتلاقي الراحة في صلاتك.
- احكي لحد:
لما تكون مخنوق فكر تحكي لحد، أنت مبتبقاش مستني رد أنت بس بتبقى عاوز تخرج اللي جواك حتى لو هيتقالك بس معلش، فاحكي ومتستناش أي رد، بس حاول تخرج كل الطاقة السلبية اللي جواك وبكل الطرق.
-اكتب:
طبعًا لو أنت من هواة الكتابة، ممكن تفرغ مشاعرك كلها في الورق، ممكن بقى في صورة مذكرات، صورة جوابات إلى مجهول بدون عنوان، الطرق والوسائل كتيرة بس حاول أنت تتصرف مع المشاعر السلبية.
٣- كفى حزنًا ويلا نبدأ:
عارف؟؟، زي ما قولتلك في البداية، لو حزنت أنك وقعت فده كويس، ولو فكرت إزاي تقوم، فأنت كده أحسن، إيه رأيك بقى لو فكرنا إزاي نعرف نستغل اللي حصل في صالحنا؟؟
- أول حاجة بص للأمور بإيجابية:
مفيش حاجة في الدنيا بدون مقابل، والوقعة دي مقابل أنك تتعلم درس أو خبرة في حياتك فإياك تحزن مهما حصل.
- حط أهداف صغيرة:
ابتدي أنك تخطط لنفسك بأهداف صغيرة وابدأ حاول تحققها، بلاش تعمل زي اللي لما يفكر يعمل ريجيم يوقف أكل نشويات خالص، لا ابدأ بالتدريج وكله هييجي واحدة واحدة صدقني.
-خد أول خطوة وانطلق:
بعد ما تخطط وتتعلم من الدروس السابقة خد أول خطوة في حياتك وانطلق، متأجلش نجاحك أو أهدافك علشان مازلت لسه محبط، إوعى تفتكر أن السعادة في أنك تنجح، السعادة في المغامرة والتجربة نفسها صدقني، وافتكر دائمًا أن على قد سعيك هيكون نجاحك.
Fb.me/PWOFFICIAL
