نصر فتحي اللوزي يكتب: براءة الدولار
![الدولار](images/no.jpg)
يا ناس فكروا بالعقل بطلوا ظلم
لما ارتفع سعر الدولار كان هم
وعيشنا على امل يتحقق الحلم
ينزل الدولار يشيل عننا كل غم
الدولار هينزل قدام الجنيه هانت
حكومتنا الرشيدة بالوعود قالت
اوعوا تصدقوا حد كاره وشامت
بكره الدولار يمد ايده لنا شاحت
ياناس من إسكندرية لبنى مزار
للأقصر لكل نجع وعزبة ودوار
الجنيه شد حيله وهيطلع النهار
هيركع قدامه ابن اللئيمة دولار
قلنا يا فرج الله هترجع الأسعار
هناكل لحمة فراخ مع الخضار
مين قال إن الزمن دايما غدار؟
حبل المشنقة للفقر بذل الدولار
ونزلت السوق ياليتنى ما نزلت
الأسعار نار والحالة زى الزقت
الدولار نزل يدوب انا كدا قلت
مش هقول انا ايه والله سمعت
واحد عاقل زى حبايبى القراء
قاللى يا أهبل النزول كلام هراء
كلام الجرايد بيطير مع الهواء
وعد الصبح يموت في المساء
طب حد يقوللى ايه هو السبب
قالوا نقولك بس بلاش غضب
الدولار برئ والسعر أبو لهب
كداب وكدبة وصل لحد الركب
***
زادت جمارك على ضروريات
والقيمة المضافة مصدر آهات
وسعر البنزين والكهربا انفلات
وكمان الميه ابوك السقا مات
الغاز بيكوينا سعره بقى غالى
الأسعار حرقت املنا واحوالى
سوق الغلابة من الرقابة خالى
يا حكومة املى فيكم راسمالى
آسفين لك سامحنا ياسى دولار
العيب على صناع الهم بالقرار
هيقولوا ايه لربنا ومنه لا فرار
يوم الحساب إما جنة وإما نار