بطاريق «مول مصر» تشعل سخرية النشطاء.. شريف: هعرف إزاي أنه بطريق مميز.. فستيكا: أطلب أتعامل معاملته.. شريف: عايز أشتغل بطريق.. فادي: آخر الشهر هيكون عامل 75 ألف جنيه.. وأبو محمد: دا أنت هيطلع
سخر نشطاء موقعي التواصل الاجتماعي «فيس بوك وتويتر» من تسعيرة مشاهدة البطريق في مول مصر، حيث طالب النشطاء بالعمل في المول كبطريق، مؤكدين أن وظيفة البطريق أكثر ربحًا من العمل كإنسان، وخاصة بعد أن تحددت الصورة مع البطريق بمبلغ 150 جنيها ولقاء البطريق حصري بمبلغ 450، أما اللقاء المميز فبلغ سعره 850 جنيها.
عايز اشتغل بطريق
قال شريف على: "ده أنا لو هشتري بطريق ولوحين تلج مش هدفع الـ 500 جنيه أيه شايفيني عبيط.. طب هعرف ازاي أنه بطريق مميز مهو لازم اعرف امال هدفع 850 جنيه ليه"، وأضاف فستيكا: "أنا مش عاوز منك حاجة يا مصر إلا طلب واحد فقط لا غير اتعامل معاملة "بطريق" في مول مصر".
وعلق هشام ثورجي: "أنا عايز أروح مول مصر واتحول لبطريق"، وردت يسر سو: "لقاء بطريق ايه اللي ف مول مصر بـ 400 جنيه؟ ده لقاء البيتزا أم 50 جنيها أو واحد شاورما من أهل الشام بيفرحني لمدة شهر".
وتابع طارق كينو: "مافيش اتعس من بطريق سايب القطب الشمالى.. وجاى يشتغل فـ مول مصر".
واسطة
وقال شريف جمال: "محدش يعرف واسطة في مول مصر عايز اشتغل بطريق أكون نفسى بقى"، وأضاف مازنجر زد: "لازم الرقابة الإدارية تراقب البطريق عشان مش هيشتغل بضمير إلا بعد ما ياخد رشوة زي موظفين الحكومة".
وعلق حسام ثروت: "لقاء البطريق حصري كمان.. يعني البطريق اللي تقابله ميقابلش حد غيرك".
ورد محمد عرفة: "ماهو مش كل الناس يعنى هتروح تقابل البطريق بـ800 جنيه.. ده انت يوم ما بتروح دريم بارك بتقلب الفيس"، وتابع محمد جاد الله: "يجب أن تدفع الثمن لكي تظهر في الصورة بجوار البطريق".
عبيط
وقال أبو محمد المصري: "الناس عاوزة تسيب البلد وتهاجر وفي بطريق عبيط جاي من القطب الشمالي علشان يشتغل في مول مصر.. دا انت هيطلع عينك"، وأضاف عماد حمدي: "عزيزي خاطف بطريق مول مصر؛ وحياة الغاليين عندك تعتبره زي عيالك بالظبط وبلاش تحطه مع الفراخ وما تخليش الواد ابنك يربطه من رقبته ويجرجره في الشارع... ارحموا بطريق قوم ذل".
وعلق مروان عبد الرحمن: "في كلام أن في بطريق اتسرق من مول مصر.. أنتا متخيل يا مان البطريق ده هيطلعوا عينه إزاي"، وتابعت المتحدة للدواجن: "هو البطريق اللي بيقولوا عليه ده ماينفعش نبيعهولكم على أساس أنه بط مستورد".
مخلوق راقٍ
وقال رامي رأفت: "البطريق مخلوق راقي.. تعرفوا تجيبوا بدلة توكسيدو زي بتاعته دي؟".
وأضاف إسلام جلال "وعشان تعمل مقابله معاه ب 850 جنيه.. ليه ياعم انا اخد نفسي واطلع على القطب الشمالي أجيب تلاته أربعه".
وعلق أسامة غازي "ثمن مشاهدة البطريق 955 جنيه.. بمعني أوضح مرتب شهر لمدرس حديث يادوب يلمحه ولو بربش بعينيه يبقوا ضاعوا عليه"، ورد أسامة نومان "اللهم جنبنا حظ البطريق اللي جه على مصر".
وتابعت إسراء زكي "في لقاء البطريق: البطريق هيمشيلك وتبص على مشيته.. في البطريق الحصري: هتشوف من غير ما تلمس.. أما بقى في البطريق المميز: احتمال تاخده يبات معاك كمان".
75 ألف جنيه
وقال محمد خالد: "اللى عايز يتصور مع البطريق 850 جنيه... دنا أجيب 8 بطات واقعد أكل فيهم شهر".
وأضاف كريم تاج الدين: "اتزحلق مع البطريق وتدفع 300- 500- 850 جنيه وزمان كنا بنتزحلق على ترابزين السلم ببلاش وكنا في قمة الانبساط"
وعلق محمد الدياسطي "هو البطريق اللي في مول مصر بـ85 جنيه ده بيجي معاه الرز والسلطات".
ورد فادي عمونيل: "مقابلة البطريق المميز بـ 850 جنيه!! يعني لو بياخد جمعة وسبت إجازة وبيعمل 4 ميتينجز بس في اليوم.. آخر الشهر هيكون عامل تقريبا 75،000 جنيه. لاء حيث كده بقي.. أنا بعرف أمشي زي البطريق عادي. وممكن أمشي أسقف برضو. وكده كده تخين ولو على أكل السمك بس فـمفيش أسهل منه".
