ممكن تكون فقير على فكرة!
عارف أنك مهما كنت غنيا ماديًا ممكن تكون فقيرا؟، آه، ناس كتير أغنياء وعندهم ثروات طائلة ولكن فقراء، فمصطلح الفقر بيختلف حسب نظرتك للفقر، بمعنى أنك ممكن تكون غنيا ماديًا ولكن فقيرا عاطفيًا أو عائليًا أو اجتماعيًا أو فكريًا، الفقر له أشكال وأنواع كثيرة، لكن إحنا دايمًا اللي بنحب نركز على نوع واحد بس من الفقر وهو الاحتياج للمال، وننسى الحاجات التانية خالص!
طب أنت عارف أنك لو فقير فكريًا مش هـتقدر تحقق النجاح أو الغنى المادي؟!، لأنه ببساطة لو عقلك مش شغال إزاي هـتقدر تنتج؟!، هـتقدر تقول للناس إنك موجود حاليًا على الساحة؟!، طبعًا لا!، مع أنه في كتاب "البحث عن التميز" للكاتب "توم بيتر" قال:
"إنك لو محاولتش تغير من نفسك وتحاول تتعلم حاجات جديدة وتغير مدارك فكرك مع التغيير اللي بـيحصل كل يوم حولك من تغيير تكنولوجي أو فكري أو تقني هـتفضل أنت مكانك، والعالم هو اللي بـيتحرك من حواليك بالرغم من أنك ثابت مكانك فلازم تسعى وإلا مع الوقت هـتبقى فقير بكل معاني الفقر!".
لذلك زي ما بـتهتم تكون غنيا ماديًا وتحاول تأمين مستقبل أبنائك ماديًا حاول تـؤمن لهم مستقبلهم عاطفيًا وعائليًا وفكريًا، علشان مش مهم أنهم يحصلون على اللي هما عاوزينه قد ما مهم يعرفوا يقدروا يحصلوا عليه إزاي، هنا بيكون السر، هو إزاي الإنسان بيقدر يوصل للي هو عاوزه وإيه هي أساليبه في الحصول عليه!
