مي كساب بعد إنجاب ابنتها: كنت فاكرة نفسي جامدة طلعت فستك
كشفت الفنانة مي كساب، أنها أصبحت تعاني بشدة بعد إنجابها مولودتها الأولى "فريدة" من زوجها المطرب الشعبي "أوكا".
وكتبت "مي" عبر صفحتها الشخصية على موقع التواصل الاجتماعي "فيس بوك": "أول ما أهل جوزي بيمشوا من البيت بأحس أني اتعريت بجد مش عارفة من غيرهم كنت عملت إيه.. اديني قاعدة أهو عاملة زي العيلة الصغيرة وماسكة في إيدي عيلة صغيرة وببقي محتاسة وبأحاول أقوي نفسي طول الوقت واعمل فيها جامدة بس أنا كدابة ولا طلعت جامدة ولا أي حاجة".
وأضافت "مي": "بعيط لما بتعيط، وبعيط لما بقعد بيها لوحدي، صح محمد حرام بيعمل اللي عليه وبيطلع يشيلها معايا ساعتين عشان أنا أنام فيهم، بس أول ما بينام وأفضل أنا برضه بيها لوحدي بأفضل أعيط زي العيال، ما أنا عيلة ومن غير حضن أمي".
وتابعت "مي": "ياااااااه يا أمي سيبتيني بدري قوي وأنا عيلة ومحتاجالك قوي كنت فاكرة نفسي جامدة، طلعت فستك خالص بحاول أبقى أم وأنا من غير أم صعب قوي إحساس مش هيحسه غير اللي زيي وبس الله يرحمك يا أمي يا طعم الحياة يا كل الحياة".
يذكر أن الفنانة مي كاسب استقبلت مولودتها الأولى من المطرب الشعبي "أوكا" منذ ما يقرب من شهر بأحد المستشفيات الخاصة وأسمتها "فريدة".
