المستهبلون!!

في نفس ذات الوقت لما تدخل محل حلاق وتلاقي لوحة متعلقة ومرسومة بالخط الكوفي مكتوب فيها «وُجُوهٌ يَوْمَئِذٍ نَاعِمَةٌ».. عادي الراجل خد من كتاب ربنا اللي جه على هواه وكتبه في لوحة عشان الزبون يحس كدا بعد ما يخلص حلاقة دقنه أنه من أهل الجنة ووشه ناعم بعد وشين بالموس!!
ولما تلاقي نفسك في عز الحر داخل محل عصير عشان تبل ريقك بكوباية عصير قصب ولا مانجا وتلاقي صاحب المحل معلق لوحة بخط تثليثي «وَسَقَاهُمْ رَبُّهُمْ شَرَابًا طَهُورًا».. الحمد لله فضل ونعمة من عند ربنا.. إية أجواء الجنة اللي بيعيشونا فيها دي الجماعة دول.. جزاهم ربنا خيرا.
ولما تكون ماشي بعربيتك وتلاقي عربية نص نقل قدامك وكاتب على العربية من ورا «رَبَّنَا وَلَا تُحَمِّلْنَا مَا لَا طَاقَةَ لَنَا بِهِ» يا سلام.. عموما أهو أحسن من اللي بيكتب «ما تبصليش بعين رضية وبص للى اندفع فيا» ولا اللي كاتب «اتنين ملهمش أمان الفرامل والنسوان»..!
أما الحانوتي.. تقريبا كلنا كدا متوقعين أنه معلق لوحة مكتوب فيها «كُلُّ مَنْ عَلَيْهَا فَانٍ».. عموما كتر خيره أهو واحد زيه زي غيره كتير بياخد من القرآن الكريم اللي بيجي على مزاجه وبياخد الآية من سياقها ويرسمها على نفسه زيهم زي الراجل اللي مش حافظ غير «مَثْنَى وَثُلَاثَ وَرُبَاعَ»..!
لكن لما يطلع شيخ ويفسر «فَإِنَّ حِزْبَ اللَّهِ هُمُ الْغَالِبُونَ» إن حزب الله هما الجماعة بتوع «نعم» يبقى عيب قوي وساعتها كلنا هنغنيله : يا راجل عيب.. يا سيدي عيب.. عيب.. عيب !!