بالفيديو.. لطفي لبيب: بحب شغل الشباب وعامل فيلم مخرجه في 3 ثانوي
كشف الفنان لطفي لبيب خلال حلقة الليلة من برنامج «معكم» مع الإعلامية منى الشاذلي، عن حبه للعمل مع الشباب، قائلًا: «أنا بحب اشتغل مع الشباب وعامل فيلم قريب مخرجه في 3 ثانوي واحد أخد جايزة في مهرجان وعايز يعمل فيلم تاني فلازم أقول له تعالى ياحبيبي أنا تحت أمرك».
وتحدث عن تجربة دعمه لمجموعة من الشباب خلال مشروع تخرجهم بكلية الإعلام بالإسكندرية، قائلًا: «شباب كلموني علشان المشروع ووافقت علطول وسافرت لهم إسكندرية».
وقال أحد الطلاب في مشروع التخرج: «إحنا وصلنا لرقمه وكلمناه وقلنا له عايزينك معانا فوافق علطول وكنا قبلها يأسنا وأجلنا التصوير لمدة شهر وطلب حاجة واحدة بس وهي أنه يشوف السيناريو قابلته وقعدت معاه 10 دقايق فقال لي تشرب إيه وجاب لي زبادو وأنا كان كل همي وقتها أنه يوافق على السيناريو ويعجبه».
وتحدث طالب آخر عن دعم لطفي لبيب لهم قائلًا: «أستاذ لطفي عرض علينا المساعدة كمان وقال لنا أنا شايف إنكم صرفتوا كتير وبتصوروا بـ3 كاميرات ممكن أساعد معاكم والدعم موقفش عند كده إحنا كنا خايفين ومتوترين إننا هنقابل أستاذ وفنان كبير بحجمه لكنه هون علينا كل ده وكان بيناديني يا أستاذ محمد وكان بيتناقش معانا وكان فيه رقي كبير في التعامل».
وأضاف لطفي لبيب: «دول ولادنا وإحنا لازم نساعدهم وفيه مواهب كتير جاية وتستحق المساعدة ولازم نقتطع من وقتنا للناس دي وأنا بشتغل كده وبحب الأفلام القصيرة وكتبتها قبل كده وتم إنتاجها».
