بالفيديو.. أول سائقة «توك توك» في بولاق الدكرور.. «داليا»: «الشغل مش عيب ولا حرام».. «بشتغل عشان أربي عيالي».. أتعرض لمضايقات من الشباب.. «لو دخل جوزي مكفي

الكثيرات تدفعهن الظروف القاسية إلى العمل في مجال يمكن وصفه بالغريب على بنات حواء، ليستطعن من خلاله توفير طلبات أسرهن والتغلب على سوء أحوالهم المعشية والاقتصادية.

ولا تعد «داليا» أول سيدة تلجأ للعمل بمجال غريب حيث قررت أن تخترق عالم الرجال وتعمل سائقة «توك توك».

وبالرغم من الظروف التي تمر بها «داليا» إلا أنها ترفض الاستسلام أو الرضوخ للعادات والتقاليد والتعليقات المختلفة التي يمكن أن تؤذى سمعها، وقررت مواصلة عملها.

امرأة تتحدى ظروفها
"داليا"، فتاة تبلغ من العمر 25 عاما متزوجة من خمسة أعوام ولديها ولدين ياسين 9 أشهر وعز 3 سنين، تعمل سائقة «توك توك» من نحو 10 سنين، تخرج من منزلها الساعة 10 صباحا وتعود 12 مساء.

وتقول "داليا": "أنا كنت شغالة على التوك توك من قبل ما اتجوز وكنت بصرف منه على ماما واخواتي وبعد ما اتجوزت جوزي قالي مينفعش تشتغلي الشغلانة ديه فروحت سبتها وبعدين رجعت تاني اشتغل، مكنش فيه فلوس خالص وجوزي على أد حاله فمكناش هنقدر نعيش".

وأضافت "داليا"، أن زوجها يعمل صنايعي، ويتحصل على أجر يومي 50 جنيها، قائلة: «الـ50 جنيها لا بتكفي إيجار ولا أكل، وأنا جبت لعب أطفال وكنت ببعيها بس مكنتش بتجيب همها خالص، ولما عرضت على جوزي إني أرجع اشتغل سواقة تاني رفض واتخانق معايا بس أنا صممت واشتغلت عشان أقدر أكفي عيالي".

عفاريت الأسفلت
وتابعت "داليا": "أتعرض لمضايقات كثيرة أثناء قيادة الـ«التوك توك»، وخاصة من الشباب الذين يعملون في نفس المهنة، ورغم ذلك أصر على الاستمرار في العمل.

موضحة: «الشباب والرجالة في الأول كانوا بيضايقوني جدًا، وفي رجالة مكنتش بترضي تركب معايا، وأوقات كتير كانوا بيزنقوا عليا، وأنا كنت بتضطر أتخانق معاهم عشان يسبوني في حالي، وكنت بقولهم الأرزاق بتاعت ربنا، وكانوا بيقولولي انتي بتاخدي لقمة عيشنا".

وتابعت "داليا": "جوزي بيثق فيا جدا، وعارف إنى أعرف أخد حقي من أي حد يضايقنى"، وأضافت: "أنا لو دخل جوزي مكفي عيالي وبيتي مكنتش هشتغل تاني، بس هو على قد حاله ويدوبك الفلوس اللي بياخدها على قد مصاريفه هو وبس".

عيب وحرام
ووجهت "داليا"، نصيحة لكل السيدات، قائلة: "أنا بنصح كل الستات أنهم يشتغلوا وميسمعوش كلام اللي يقولهم إن الشغل عيب وحرام، الست زيها زي الراجل لازم تشتغل وتتعب، عشان تأكل عيالها بالحلال، وميعملوش حساب للناس لأن الغلبان في البلد ديه بيتاكل حقه، واللي يقولك عيب وحرام قوليله انت مش بتديني حاجة".

استغلال المالك
وعن أمنية "داليا" في الحياة، قالت: "نفسي اشتغل على توك توك يكون ملكي، والفلوس بتاعته تكون ليا ولعيالي ومحدش يقاسمني فيها، وده هيفرق في معايا قوي لأن صاحب التوك توك بيستغلني كتير وبيقولي انتي شغالة عندي».

وتابعت: «نفسي حال البلد يتعدل» وناشدت الرئيس عبدالفتاح السيسي قائلة: «حس بالناس الغلابة وقدرهم ياريس».

وأكدت: "أنا مكملة في شغلانتي ديه وعمري ماستعريت منها، وبشتغل كمان في العيد جزارة، وده كله عشان أربي عيالي واعلمهم أحسن تعليم واضمنلهم مستقبل أحسن مني بكتير".